Skallagrímur endaði í fjórða sæti í fyrstu deild karla í körfuknattleik á síðasta tímabili og keppti síðan í fimm leikja einvígi við lið Hamars um sæti í Subway deildinni. Eftir mikla baráttu unnu Hamarsmenn einvígið í úrslitaleik og komust þar með upp í efstu deild á kostnað Skallagríms. Atli Aðalsteinsson er þjálfari liðsins ásamt Hafþóri Inga Gunnarssyni fjórða árið í röð og segir hann að í spjalli við Skessuhorn að undirbúningstímabilið sé alltaf á svipuðum nótum og leikmenn sjái að miklu leyti um sig sjálfa í byrjun en fylgi áætlun frá styrktarþjálfaranum þeirra. „Hópurinn kom saman í fyrstu vikunni í ágúst og skipulagðar æfingar hófust þá með allan hópinn saman. Undirbúningstímabilið gekk svona upp og ofan, við verðum að vera heiðarlegir með það að við hefðum getað gert betur í einhverjum tilfellum. Síðustu vikur hefur verið uppgangur og menn eru að komast í ágætis gír,“ segir Atli.

Hefur leikmannahópurinn eitthvað breyst frá síðasta tímabili? „Hópurinn heldur sér að mestu leyti í sama horfinu, við missum einn úr hópnum sem spilaði með okkur hluta úr síðustu leiktíð. Að öðru leyti eru það þessar hefðbundnu breytingar þ.e.a.s í erlendu leikmönnunum sem við verðum með í vetur. Keith Jordan Jr. hélt yfir í Kópavog og spilar með Breiðabliki og Milorad Sedlarevic fluttist austur á Hornafjörð og spilar með Sindra í vetur. Í hópinn hjá okkur tökum við inn 25 ára Bandaríkjamann, Darius Banks, og 31 árs Norðmann, Bouna Ndiaye. Á sama tíma erum við að taka inn unga leikmenn úr yngri flokka starfinu okkar sem við munum sjá taka sín fyrstu skref í vetur.“

Þið lentuð í hörku einvígi við Hamar í vor um laust sæti í Subway deildinni þar sem má segja að þið hafið verið þremur mínútum frá því að komast upp. Nú er nýtt tímabil að hefjast, er ekki markmið liðsins að stefna upp í vor? „Að sjálfsögðu förum við inn í tímabilið með það markmið að fara upp. Við vitum auðvitað að það er svakalega margt sem á eftir að gerast þangað til tímabilið klárast og lítil markmið á leiðinni sem við verðum að standast til að lokaniðurstaðan verði okkur í hag.“

Breyting er á fyrirkomulagi í 1. deild karla á þessu tímabili þar sem efsta liðið fer beint upp og liðin í 2. til 9. sæti fara í úrslitakeppni um hitt sætið. Hvernig líst þér á þetta dæmi? „Ég sem mikill stemningsmaður fagna því að sjálfsögðu að það sé verið að færa keppnina meira yfir í úrslitakeppnis fyrirkomulag. Mér finnst það miklu skemmtilegra heldur en hefðbundin deildarkeppni þar sem spilaður er einn leikur í viku.“

Rómantíkin á landsbyggðinni engu lík

Nú má segja að fyrsta deildin sé hálfgerð landsbyggðardeild. Í ár eru í deildinni Sindri, Selfoss, Þróttur Vogum, Snæfell, Þór Akureyri, ÍA og Hrunamenn ásamt ykkur eða átta lið af tólf. Er ekki alltaf jafn gaman og mikil stemning að spila út á landi? „Rómantíkin á landsbyggðinni er engu lík. Gömlu góðu gildin halda sér betur úti á landi þar sem íþróttahúsin eru eins misjöfn og þau eru mörg og því karakter yfir hverju húsi fyrir sig. Ferðalögin líta oft fjandsamlega út áður en farið er af stað en það eru yfirleitt þau sem skilja eftir flestar minningar utan vallar sem maður mun taka með sér í gröfina.“

Nú eruð þið Hafþór Ingi Gunnarsson að hefja ykkar fjórða ár sem þjálfarar liðsins. Það hlýtur að vera komin smá reynsla í bankann og er alltaf jafn mikill eldmóður í ykkur? „Fyrir mitt leyti þá er eldmóðurinn alltaf til staðar, annars væri ég farinn að gera eitthvað annað. Ég held að allir sem starfa í kringum liðin í landinu standi á svipuðum stað gagnvart sínu liði. Allir eru að reyna að gera sitt besta og finna réttu leiðirnar sem hentar hverju tilfelli fyrir sig. Fegurðin liggur að mínu mati í því, maður er alltaf að sjá fleiri og fleiri nýja möguleika og mismunandi nálgun. Hin eiginlega leið til að vinna er ekki til, reynslan hefur sýnt okkur það og við erum ánægð með á hvaða leið við erum með okkar starf.“

Atli segir að endingu að mikil tilhlökkun sé í hópnum fyrir tímabilinu og fólkinu í kringum þá sem safnast saman í Fjósinu reglulega og horfa á Skallagrím takast á við verðuga andstæðinga. Atli segir að hann vilji fyrir hönd liðsins koma á framfæri þakklæti fyrir veittan stuðning. „Ég treysti á að hlutirnir verði í sama horfi þegar við förum aftur af stað, stuðningur við liðið og körfuknattleiksdeildina er ómetanlegur og mikilvægur þáttur í því að við getum haldið áfram að koma upp flottum hópi einstaklinga í gegnum okkar starf. Við munum reyna okkar allra besta við að skemmta fólki í vetur og gera hann eftirminnilegan. Áfram Skallagrímur!“

vaks

Ætlum að reyna að skemmta fólki í vetur