Næsta sunnudag, 8. október, verður hátíðarguðsþjónusta í Innri-Hólmskirkju í Hvalfjarðarsveit þar sem fagnað verður enduropnun kirkjunnar og 130 ára vígsluafmæli sem var á síðasta ári. Agnes M. Sigurðardóttir biskup Íslands kemur og predikar við messuna.

Viðgerðir á kirkjunni hófust vorið 2021 og gert hefur verið við steypuskemmdir og kirkjan máluð að utan, skipt var nánast um allt timbrið í kirkjunni, nýir gluggar settir í, skipt var um þak og tréverkið í kirkjuturni lagað. Innan dyra var gert við skreytingaverk sænsku listakonunnar Gretu Björnsson á innanverðum gafli kirkjunnar og þá var allt loftið tekið í gegn og fært í gamla horfið auk ýmissa lagfæringa. Það var árgangur 1949 sem fermdist í kirkjunni árið 1963 sem hafði veg og vanda af því að koma framkvæmdum af stað fyrir rúmlega tveimur árum. Einnig hefur sóknarnefnd kirkjunnar haldið jólabasar árlega undanfarin ár og hefur ágóði af honum verið settur í framkvæmdasjóð kirkjunnar.

Frábært framtak

Ragnheiður Guðmundsdóttir formaður sóknarnefndar Innri-Hólmskirkju segir í spjalli við Skessuhorn að þetta sé náttúrlega stór áfangi sem verið er að ná, að það skuli vera búið að gera kirkjuna nánast upp. „Við erum að fagna því og einnig að halda upp á 130 ára afmæli hennar sem var fyrir einu og hálfu ári. Verkið tók mið af þeim peningum sem til voru í það og það skiptið en þegar er byrjað á einhverju svona þá er hálfnað verk þá hafið er, það verður einhvers staðar að byrja.“

Sveitarstjórn Hvalfjarðarsveitar styrkti verkefnið myndarlega, Minjastofnun og Jöfnunarsjóður sókna einnig og svo eru fjölmargir einstaklingar sem hafa styrkt verkefnið með smáum og stórum framlögum. „Kostnaðurinn við verkið er rétt tæplega 30 milljónir króna sem er frekar mikið fyrir svona litla sókn sem telur um 130 sóknarbörn, en þetta er alveg frábært framtak hjá fermingarhópnum frá árinu 1963. Kristófer Þorgrímsson, Kristján Gunnarsson, Lárus Ingibergsson og Elísabet Benediktsdóttir voru fremst á meðal jafningja úr þessum hópi sem tók að sér að koma þessu af stað og hafa haldið utan um verkefnið. Það er alveg stórkostlegt og verður seint metið.“ Ragnheiður segir einnig að verkið sé mjög langt komið en það eigi eftir að mála kirkjuna að utan, veggi og þak, og það verði gert næsta sumar. „Peningarnir eru búnir núna og þannig er bara staðan. Það er reyndar búið að grunna kirkjuna og hún verður hvít að lit þegar verkinu er lokið.“

Í Garða-og Saurbæjarprestakalli eru fjórar kirkjur; Akraneskirkja, Hallgrímskirkja í Saurbæ, Leirárkirkja og Innri-Hólmskirkja og sjá prestar úr þessum prestaköllum um hátíðarmessuna. Veislukaffi verður í Miðgarði eftir messuna og segir Ragnheiður að allir séu velkomnir. „Við vonumst eftir sem flestum í messuna og hlökkum til að fagna þessum áfanga.“

Hátíðarguðsþjónusta í Innri-Hólmskirkju á sunnudaginn