Spjallað við Jón Þór Hauksson þjálfara ÍA um tímabilið í sumar

Skagamenn léku í sumar í næst efstu deild karla í knattspyrnu sem nefnist Lengjudeildin en höfðu fjögur árin þar á undan leikið í efstu deild. ÍA lauk leik í efsta sæti deildarinnar og tryggði sér þar með sæti í Bestu deildinni á næsta tímabili. Jón Þór Hauksson var þjálfari Skagamanna eins og í fyrra og blaðamaður Skessuhorns kom við hjá honum í síðustu viku til að fara yfir tímabilið með honum og rifjaði það upp að í viðtali fyrir mót hefði Jón Þór sagt að markmiðið væri einfaldlega að fara beint aftur upp. Hvernig er tilfinningin að hafa náð þessu takmarki og var ekki gaman að upplifa stemninguna og fögnuðinn á Norðurálsvelli þennan dag?

„Hún var virkilega góð og ljúft að klára að vinna deildina. Eins og mótið fór af stað þá var það virkilega sætt, við vorum lengi búnir að stefna að því og tala um það í langan tíma að Afturelding myndi tapa nógu mörgum stigum fyrir okkur til þess að vinna deildina. Það snerist um það að við myndum klára okkar og við gerðum það bara frábærlega og virkilega gaman að gera það. Dagurinn var geggjaður, mikil stemning fyrir leik uppi í húsi og frábær stemning á leiknum sjálfum. Menn voru byrjaðir að hita upp fyrir hádegi þannig að það var virkilega vel gert og frábært að upplifa það. Stemningin síðan eftir leik kórónaði daginn og gaman að fagna með ungum áhorfendum á vellinum og þeim eldri í stúkunni.“

Takturinn var ekki alveg kominn í liðið
En ef við förum yfir tímabilið í heild sinni þá hófst það í byrjun maí þar sem tapið heima á móti Grindavík, gerið svo jafntefli við Vestra og Aftureldingu og náið síðan fyrsta sigrinum á móti Leikni í Breiðholti í lok maí. Þetta var kannski ekki alveg óskabyrjunin á mótinu, voruð þið að vanmeta þessi lið eða hver var ástæðan fyrir þessu? „Nei, alls ekki. Það kom á daginn að þessi lið flest voru með betri liðum deildarinnar og spiluðu svo fyrir skömmu í umspilinu. Þetta voru virkilega erfiðir leikir og alls ekkert vanmat í gangi hjá okkur. Við töpuðum tveimur af þessum fyrstu fimm leikjum sem við ætluðum svo sannarlega ekki að gera og báðir á heimavelli í þokkabót. Byrjunin reyndist okkur erfið en vallaraðstæður voru mjög slæmar og eftir á að hyggja hefðum við mögulega átt að spila þessa leiki í Akraneshöllinni. Það kom síðan á daginn að við vorum besta liðið í þessari deild en við náðum ekki alveg okkar takti í okkar spili í þessum fyrstu leikjum. Þar fyrir utan höfum við gert miklar breytingar á milli ára og erum með nýtt lið í þessum uppbyggingarfasa. Það eru 15 leikmenn sem fóru frá okkur eftir tímabilið í fyrra þannig að það voru miklar breytingar á liðinu. Þá misstum við rétt fyrir mót tvo leikmenn úr varnarlínunni, þá Alexander Davey og Hákon Inga Einarsson, sem höfðu spilað allt undirbúningstímabilið og við þurftum því að gera breytingar á vörninni stuttu fyrir mót. Takturinn var ekki alveg kominn í liðið þarna en sem betur fer fundum við hann í kjölfarið og litum aldrei til baka eftir það.“

Í byrjun júní kemur tap á móti Fjölni heima, síðan naumur útisigur á Ægi og þið fylgið því síðan vel á eftir með þremur sigrum gegn Þrótti Reykjavík, Selfossi og Þór Akureyri. Fjórir sigrar í röð, það hlýtur að hafa verið gott fyrir sjálfstraustið og hvað breyttist? „Það breytist með því að sigrarnir þeir næra, það er bara þannig og eftir leikinn á móti Fjölni og staðan var slæm þá var trúin til staðar. Síðan í kjölfarið detta sigrarnir inn og í næstu 17 leikjum töpuðum við bara einu sinni, við sýndum hversu við vorum megnugir og það réði úrslitum held ég hvað við höfðum mikla trú á verkefninu.“

*Lið Skagamanna í sumar. Ljósm. Ágústa Friðriksdóttir*

Sendum skýr skilaboð
Fyrstu vikuna í júlí vinnið þið Njarðvík á heimavelli, gerið síðan jafntefli við Vestra og síðan kemur sigur á móti Grindavík úti. En í lok júlí er komið að stórleiknum gegn Aftureldingu sem á þessum tímapunkti hafði unnið Selfoss 9:0 í leiknum á undan. Þeir voru með ellefu stiga forskot á ykkur í toppsætinu en þið áttuð einn leik til góða og voruð í þriðja sæti á eftir Fjölni. Hvernig lagðir þú þennan leik upp og var þetta ekki afar mikilvægur sigur upp á framhaldið? „Við vissum að það var algerlega nauðsynlegt miðað við gengi Aftureldingar á þessum tíma að fyrir utan það að taka stigin þrjú þá þurftum við að senda skilaboð í deildina. Afturelding var taplaust á þessum tímapunkti og við þurftum að fara þarna og sýna öðrum liðum að þeir væru ekki ósigrandi. Við gerðum það og áttum frábæran leik og sigurinn var síst of stór. Við fórum á okkar forsendum í leikinn en fyrst og fremst að senda skýr skilaboð. Þá var þetta auðvitað mikilvægur sigur, bæði fyrir okkur og ekki síst fyrir deildina. Maður vissi það á einhverjum tímapunkti að Afturelding myndi lenda í brekku og spurningin var hve brött sú brekka yrði og hún reyndist þeim ansi erfið.“

Fyrir verslunarmannahelgina í byrjun ágúst tapið þið stórt heima fyrir Leikni, vinnið svo Gróttu og Fjölni á útivelli og Ægi heima, gerið jafntefli við Þrótt í bænum og síðan er lokaleikurinn í ágúst á móti Selfossi sem þið vinnið með einu marki í jöfnum leik. Þarna eruð þið komnir upp að hlið Aftureldingar og þrjár umferðir eftir. Eftir að vera búnir að elta nánast allt mótið sáuð þið ekki þarna tækifæri á að taka fyrsta sætið og sleppa við umspilið? „Ekki spurning, eftir leikinn á móti Aftureldingu skullum við frekar harkalega niður á jörðina á móti Leikni og svöruðum því síðan mjög vel. Sá leikur reyndist okkur mjög mikilvægur fyrir lokakaflann á mjög margan hátt og ég var gríðarlega ánægður með hvernig leikmannahópurinn brást við honum. Við spiluðum fjóra leiki í framhaldinu á tólf dögum sem virkilega reyndi á hópinn og í leiknum á móti Þrótti vorum við frekar kraftlausir. En eftir nauman sigur á móti Selfossi sáum við að möguleikarnir voru ansi góðir að taka efsta sætið.“

Byggðu upp nýtt lið á gömlum gildum
Þið takið síðan öll stigin í erfiðum útileikjum á móti Þór og Njarðvík og eftir sigurinn gegn Gróttu er ljóst að sæti í Bestu deildinni á næsta tímabili er tryggt. Hverju viltu þakka þennan árangur og var þetta ekki þolinmæðisverk? „Við vorum einfaldlega með sterkt lið, öfluga liðsheild og það var mikil samheldni í liðinu. Ég er mjög ánægður hvernig til tókst að byggja upp nýtt lið og mér finnst það hafa tekist mjög vel. Það er náttúrulega þannig að þegar lið fellur niður um deild að þá er ákveðin uppbygging fram undan og við vorum sannarlega í þeim sporum fyrir ári síðan. Við ákváðum þá að byggja upp nýtt lið á gömlum gildum. Við erum með mikið af uppöldum leikmönnum í leikmannahópnum og undantekningarlaust með 15 uppalda leikmenn í 18 manna leikmannahópi og yfirleitt með níu leikmenn af ellefu í byrjunarliðinu. Við erum með góða blöndu af ungum og efnilegum leikmönnum í bland við eldri og reyndari leikmenn og það skilaði okkur sigri í deildinni. Varðandi þolinmæðina að þá er það bara þannig að þegar ÍA spilar í næstefstu deild þá er ekki mikil þolinmæði í gangi að hanga þar eitthvað mikið. Þú færð ekki mörg ár í að byggja upp en sem betur fer þá voru menn sammála um það hvaða leið ætti að fara og voru alveg tilbúnir að gefa sér tíma í það verkefni.“

Ef maður rýnir í tölfræðina í sumar þá vinnið þið sex heimaleiki af ellefu, gerið tvö jafntefli og tapið þremur miðað við að á útivelli vinnið þið níu leiki og gerið tvö jafntefli. Einhver skýring á þessu? „Þetta er auðvitað magnaður útivallarárangur og þetta hlýtur að vera met í stigafjölda á útivelli í tólf liða deild. Ég held að þetta sé annað árið í röð sem við erum með fleiri stig á útivelli heldur en á heimavelli, það er auðvitað mikið áhyggjuefni og það hefur mikið verið rætt um vallarmál á Akranesi undanfarin ár. Við erum að lenda eftir á hvað þá aðstöðu varðar, Akranesvöllur er eldgamall og hefur lítið verið gert fyrir hann síðustu sjötíu ár nema að það eru sett á hann tvö tonn af sandi á vorin. Það eru alls konar hugmyndir í gangi en persónulega myndi ég vilja sjá að það væri ráðist í framkvæmdir á æfingasvæðinu þar sem við fengjum gervigrasvöll með bráðabirgðastúku sem gæti þá verið okkar heimavöllur á meðan á framkvæmdum stæði.“

*Úr leiknum örlagaríka við Aftureldingu. Ljósm. Lárus Árni Wöhler*

Fáir framherjar betri en Viktor
Viktor Jónsson varð markahæstur í deildinni með 20 mörk í 22 leikjum og hafði mest skorað fimm mörk á einu tímabili fyrir ÍA á fjórum árum í efstu deild. Það hlýtur að hafa skipt miklu máli að hafa framherja í formi eins og Viktor í sumar og ánægjulegt fyrir hann eftir meiðslavandræði síðustu ára? „Það er fyrst og fremst gríðarlegt ánægjuefni að hann sé loksins laus við meiðsli og hann var lykilmaður í okkar liði í sumar. Það eru fáir framherjar á Íslandi sem eru betri en hann inn í vítateig andstæðinganna og Viktor naut góðs af sóknarleik liðsins í sumar. Við höfðum á mjög skemmtilegu sóknarliði að skipa í sumar og skoruðum mörg mörk úr föstum leikatriðum, hröðum skyndisóknum og eftir vel uppbyggðan sóknarleik. Þó að Viktor hafi verið langmarkahæstur í liðinu þá er óhætt að segja að við spiluðum fjölbreyttan sóknarleik í sumar og erfitt fyrir liðin að stöðva einhvern einn þátt í okkar leik. Við höfðum mörg vopn í okkar vopnabúri og afar öflug liðsheild þar að baki.“

Hvernig er með leikmannamálin? Einhverjir að renna út á samning og á að styrkja liðið fyrir komandi átök í Bestu deildinni? „Þessa dagana er verið að vinna í leikmannamálunum og það er ljóst að við þurfum að styrkja liðið fyrir næsta tímabil. Steinar Þorsteinsson og Jón Gísli Eyland eru samningslausir og við vonumst til þess að þeir skrifi undir nýjan samning á næstu vikum. Gísli Laxdal er farinn í Val, Alex Davey er á förum og Pontus Lindgren einnig. Leikmannaveltan hjá ÍA undanfarin ár hefur verið allt of mikil og það er eitt af lykilmarkmiðum okkar að stoppa það og ná stöðugleika í þeim málum.“

Hvernig líst þér á næsta tímabil og hver er stefnan? „Ég er mjög spenntur að halda áfram að þróa þetta lið og er mjög ánægður með hvernig það hefur tekist hingað til. Nú getum við byggt ofan á það og komið af krafti inn í Bestu deildina á næsta ári. Vonandi náum við stöðugleika, bæði í félaginu og veru okkar í efstu deild, það er stefnan.“

Eitthvað að lokum? „Takk fyrir stórskemmtilegt knattspyrnusumar!“

vaks

„Ætlum að koma af krafti inn í Bestu deildina á næsta ári“

Spjallað við Jón Þór Hauksson þjálfara ÍA um tímabilið í sumar

Spjallað við Jón Þór Hauksson þjálfara ÍA um tímabilið í sumar