Verkefnið Jól í skókassa á vegum KFUM og KFUK á Íslandi felst í því að gleðja börn í Úkraínu sem búa við bágar aðstæður og gefa þeim jólagjafir. Gjafirnar eru settar í skókassa og til að öll börnin fái svipaðar jólagjafir eru ákveðnir hlutir sem mælt er með að fari í hvern kassa. Gjafirnar eru sendar til Úkraínu en þar geisar stríð og margir sem búa við slæmar aðstæður og kröpp kjör. Að því er fram kemur á heimasíðu KFUM og KFUK er íslensku skókössunum meðal annars dreift á munaðarleysingjaheimili, barnaspítala og til barna einstæðra mæðra sem búa við sára fátækt. Gjöfunum hefur fjölgað ár frá ári og um síðustu jól var metfjöldi þegar 5.575 gjafir voru sendar frá Íslandi í skókössum.

Allir sem vilja geta tekið þátt í verkefninu og hafa undirtektirnar verið góðar frá því fyrst var farið af stað með verkefnið hér á landi árið 2004. Á heimasíðu kfum.is er að finna allar upplýsingar um hvernig skuli ganga frá kössunum og hvað skuli setja í þá. Mælt er með vettlingum, sokkum, húfum, treflum, nærfötum, peysum, bolum, tannbursta, tannkremi og fleiru. Upplýsingar um frágang skókassanna, gjafir í skókassana og hvað má ekki fara í þá er að finna á vef kfum.is

Móttökustaðir

Fjórir móttökustaðir verða hjá KFUM og K á Vesturlandi. Þar verður hægt að kaupa kassa sem hafa mynd af Alþingishúsinu og Dómkirkjunni ásamt texta á úkraínsku um landið okkar. Einnig er hægt að nota skókassa eins og verið hefur. Mótttökustaðir hér á Vesturlandi eru:

Akranes

Tekið er á móti skókössum í safnaðarheimili Akraneskirkju. 30. október – 3. nóvember á milli klukkan 10:00 og 15:00. Tengiliður (ath aðeins fyrir Akranes) er Irena Rut Jónsdóttir (868-1383). Á Akranesi er hægt að kaupa kassa í Axelsbúð, s. 896-1979.

Borgarnes

Tekið er á móti skókössum í Borgarneskirkju. Síðasti skiladagur er fimmtudaginn 2. nóvember. Tengiliður er Heiðrún Helga (869-0082).

Grundarfjörður

Tekið verður á móti skókössum í safnaðarheimili Grundarfjarðarkirkju fimmtudaginn 2. nóvember frá kl. 16:00 til 18:00. Tengiliðir eru Anna Husgaard Andreasen (663-0159) og Salbjörg Sigríður Nóadóttir (896-6650).

Stykkishólmur (Facebooksíða)

Tekið verður á móti skókössum í Stykkishólmskirkju fimmtudaginn 2. nóvember frá kl. 16:00 til 18:00. Tengiliðir eru Ásta Sólveig Hjálmarsdóttir(898-9688) og Kristín Rós Jóhannesdóttir (893-1558).