Spjallað við Aron Ými Pétursson að loknu tímabili

Knattspyrnufélagið Kári frá Akranesi endaði í fimmta sæti í 3. deild karla í knattspyrnu í sumar með 32 stig, vann níu leiki, gerði fimm jafntefli og tapaði átta leikjum. Liðið lék annað árið í röð í þriðju deildinni og í fyrra varð liðið í fimmta sæti eins og nú. Aron Ýmir Pétursson og Andri Júlíusson tóku við liði Kára í byrjun janúar af Wout Droste sem var þjálfari Kára frá byrjun ágúst til loka tímabilsins í fyrra. Blaðamaður Skessuhorns heyrði í Aroni Ými fyrir helgina og minnti hann á að hann hefði gefið það út í viðtali við Skessuhorn fyrir mót að þeir ætluðu sér að gera sig gildandi í toppbaráttuna og hann taldi sig vera með hóp í það. Þið byrjuðuð alls ekki vel í mótinu, fenguð aðeins fjögur stig í fyrstu fimm leikjunum og toppbaráttan fokin út um gluggann. Komuð þið ekki nógu vel undirbúnir til leiks eða hver var ástæðan?

Úrslitin sögðu ekki allt
„Við teljum okkur hafa komið mjög vel undirbúna inn í mótið og þó svo við fengjum ekki mörg stig úr fyrstu leikjum mótsins þá var spilamennska liðsins í þeim leikjum mjög góð en við vorum ekki nógu öflugir inn í vítateigunum sitt hvorum megin. Úrslit leikjanna sögðu ekki allt, í mörgum leikjum sem við töpuðum vorum við ánægðir með frammistöðuna og svo voru líka leikir inn á milli sem unnust þrátt fyrir það að frammistaðan hafi ekki verið góð.“

Fyrsti sigurinn kom í byrjun júní og nokkrum dögum síðar komust þið Káramenn í fréttirnir þegar leikmaður ykkar var bitinn í fótinn af leikmanni Kormáks/Hvatar. Hvernig var að vera vitni að þessum skrípaleik og hafði þetta atvik einhver áhrif á hópinn? „Það var mjög sérstakt og maður hafði fulla samúð með Marinó Hilmari Ásgeirssyni sem fékk rautt spjald fyrir það að draga leikmanninn af fætinum á Hilmari Halldórssyni. Þetta er náttúrulega hlutur sem ég vona svo innilega að ég verði aldrei vitni að aftur. Einnig fannst mér viðbrögð Kormáks/Hvatar við þessum atburði mjög léleg. Þeir reyndu að gera eins lítið úr þessu og mögulegt var og sums staðar sá maður skrif á þeirra vegum þar sem verið var að slá þessu upp í grín. Kormáks liðið var mjög sterkt fótboltalið og þeir voru vel að því komnir að fara upp um deild en hvernig þeir höndluðu þetta atvik var þeim ekki til framdráttar. Hvað varðar hópinn okkar þá voru menn eðlilega smá slegnir en við létum það svo sem ekkert trufla okkur og lífið hélt bara áfram.“

Vissum alltaf að stigin myndu koma
Í kjölfarið spilið þið sex leiki og vinnið þrjá leiki, gerið tvö jafntefli og tapið einum. Þarna virðist liðið vera að að ná sér á strik eftir erfiða byrjun og koma sér frá hættusvæðinu. Var það ekki ákveðinn léttir fyrir leikmenn og þjálfara? „Við vorum aldrei að spá í því hvar við vorum í töflunni fyrr en bara í síðustu umferðunum enda var það aldrei á planinu að stefna eitthvað upp um deild þó svo við vildum vera eins ofarlega og við gátum. Við vorum að einbeita okkur að frammistöðu og þá sérstaklega einbeita okkur að frammistöðu einstaklinga í leikjum. Við vissum það alltaf að stigin myndu koma ef við héldum áfram okkar leik og myndum ekki missa sjónar á okkar gildum sem við teljum að við höfum ekki gert.“

En síðan tekur við annar slæmur kafli þar sem þið tapið fjórum leikjum og gerið eitt jafntefli. Þið komist til að mynda í 0-2 fyrir norðan á móti Kormáki/Hvöt eftir fyrri hálfleikinn en tapið síðan 4-2. Hvað var í gangi á þessum tímapunkti? „Á þessum tíma kallaði ÍA þrjá leikmenn til baka úr láni til þess að klára tímabilið með þeim og erum við mjög stoltir af því að þeir strákar hafi átt sinn hlut í því að hjálpa ÍA liðinu upp um deild. Þegar það gerist þá gáfum við næstu ungu og efnilegu strákum stærra hlutverk í liðinu og gáfum þeim tíma til að aðlagast, gera sín mistök og læra af þeim. Við erum mjög ánægðir með það hvernig þessir strákar uxu í þeim hlutverkum.“

Kári átti ágætis endasprett undir lokin þar sem þeir unnu þrjá leiki af fjórum og þar á meðal góðan sigur á toppliði Reynis. Aron Ýmir segir að það hafi verið gott að enda tímabilið á jákvæðum nótum og þeir hafi verið sérstaklega ánægðir með það hvernig þessir strákar sem fengu stærra hlutverk undir lok tímabilsins uxu inn í hlutverkið sitt og það sé ljóst að þeir séu klárlega tilbúnir í enn stærra hlutverk á næsta tímabili. En að öðru, leikmenn Kára fengu alls 51 gult spjald og átta rauð spjöld í 22 leikjum í sumar. Hver er skýringin á þessari spjaldasöfnun? „Menn taka mótlætinu misjafnlega. Við töldum okkur eiga skilið fleiri stig en við fengum miðað við spilamennsku en þegar á móti blés þá vorum við oft fljótir í kjánaleg spjöld. Það er eitthvað sem við þurfum að laga hjá okkur fyrir næsta tímabil og eitthvað sem við munum vinna í með hópnum í vetur.”

Byrjunarlið Kára fyrir fyrsta sigur sumarsins sem var á móti Elliða. Ljósm. Kári

Næsta skref að bæta enn frekar í
Þú sagðir í viðtalinu fyrir mót að markmiðið væri að gefa þessum ungu og efnilegu leikmönnum ykkar tækifæri á að spila fullorðins fótbolta og hjálpa þeim að taka næsta skref á sínum ferli. Hvernig gekk samstarfið með ÍA í sumar og er að vænta einhverja breytinga á því? „Samstarfið gekk mjög vel en þó komu upp hlutir sem við þurfum að laga og gera betur. Þetta var fyrsta árið sem samstarfið var svona mikið og með þessum hætti þannig að það er undir okkur komið að halda áfram að gera það sem gekk vel og laga það sem betur mátti fara. Í heildina spiluðu 14 leikmenn frá ÍA hlutverk með Kára í sumar, þar af tólf á 2. flokks aldri, en þrír af þeim voru svo kallaðir til baka um mitt tímabil. Margir af þessum strákum tóku miklum framförum en á sama tíma lærðu þeir helling. Næsta skref er að bæta enn frekar í, bæta við mannskap í þjálfarateyminu í kringum þessa stráka og bæta innviðina enn frekar. Við stefnum ótrauðir á það að halda áfram samstarfinu og gefa bara meira í ef eitthvað er.“

Nú eruð þið Andri ekki með mikla reynslu í þjálfun í meistaraflokki. Hafið þið Andri lært mikið af þessu tímabili? „Já, þetta tímabil var alvöru skóli fyrir okkur. Við gerðum fullt af mistökum en teljum okkur hafa lært helling. Þetta er „learning by doing“ dæmi. Stærsta áskorunin í þessu starfi er að finna jafnvægið milli 2. flokks og Kára sem og að finna hverjum og einum leikmanni verkefni sem hjálpar honum að bæta sig sem leikmann.“

Aron Ýmir segir að endingu að eins og staðan er núna þá verði hann og Andri áfram þjálfarar Kára á næsta tímabili og stefna að því að bæta við einum þjálfara inn í teymið til að bæta í utanumhaldið og einn liður í því sé að fjölga þjálfurum. En einhver lokaorð? „Sveiflukennt og lærdómsríkt tímabil er að baki en tækifærin til að taka næsta skref eru svo sannarlega til staðar.“

vaks

„Tækifærin eru svo sannarlega til staðar“

Spjallað við Aron Ými Pétursson að loknu tímabili

Spjallað við Aron Ými Pétursson að loknu tímabili