Fyrr í vikunni fóru nemendur af 5. og 7. önn rafvirkjunar í Fjölbrautaskóla Vesturlands á Akranesi (FVA) í dagsferð þar sem fyrirtækin ÍSAL í Straumsvík og Landsnet voru heimsótt. Trausti Gylfason tók saman frétt um ferðina og sendi Skessuhorni:

„Lagt var af stað frá Akranesi snemma morguns en fyrri heimsóknin var til ÍSALS sem er eitt stærsta álframleiðslufyrirtæki landsins. Þar var tekið á móti hópnum af miklum höfðingsskap þar sem helstu tæknimenn rafmagnsmála fyrirtækisins gáfu sér tíma til að hitta nemendur. Skemmst er að segja frá að segja að miklar og fjörugar umræður spunnust um fyrirtækið en nemendur höfðu undirbúið sig vel og margar spurningar brunnu á þeirra vörum. Farið var í skoðunarferð um fyrirtækið sem mörgum fannst afar upplýsandi og skemmtilegur samanburður borinn saman við fyrirtækin sem eru á Grundartangasvæðinu. Í lok ferðar var skólanum (FVA) færð bókargjöf um sögu álversins í Straumsvík til ársins 2000. Nemendur geta gluggað í bókina á bókasafni skólans en bókin spannar sögu fyrirtækisins frá árinu 1968 til ársins 2000. Heimsóknina skipulagði samskiptastjóri fyrirtækisins og aðstoðarmaður forstjóra.

Eftir að hafa snætt hollustu á matsölustað í Hafnarfirði var ferðinni heitið upp á Geitháls en þar er fyrirtækið Landsnet með aðveitustöð m.a. fyrir höfuðborgarsvæðið. Um er að ræða mikið mannvirki þar sem m.a. eru innkomandi 220 þúsund kíló volta línur. Eftir munnlega tíma um háspennurofa, skilrofa, aflrofa og fleira var loksins kominn tími til að sjá slíkan búnað í reynd. Á móti hópnum tók úrvals lið tæknimanna frá Landsneti þar sem ekkert var til sparað við að deila út þekkingunni. Nemendur fengu fræðslu um dreifingu raforkunnar á Íslandi, allt frá virkjunum til notenda. Það sem þótti fræðandi var hversu mikil áhrif það hefur á allt landskerfið ef stórnotandi dettur óvænt út, t.d. ÍSAL. Þá þurfa vaktmenn í stjórnstöð Landsnets að vera viðbúnir til að bregðast við breyttu álagi.

Ferðin var í alla staði fróðleg og skemmtileg og kunnum við starfsmönnum sem tóku á móti okkur bestu þakkir fyrir frábærar og fróðlegar móttökur.“

*Nemendur í rafvirkjun FVA ásamt gestgjöfum ÍSALs.*

Rafvirkjanemar úr FVA heimsóttu ÍSAL og Landsnet