Rætt við Björn Sólmar Valgeirsson um tímabilið í sumar

Skallagrímur úr Borgarnesi lauk leik í áttunda sæti í fjórðu deild karla í knattspyrnu í sumar með 19 stig, vann sex leiki, gerði eitt jafntefli og tapaði ellefu. Í fyrsta skipti í sögu Íslandsmótsins var fjórða deildin, fimmta efsta deild, tíu liða deild og fékk Skallagrímur óvænt sæti í deildinni eftir að Einherji tilkynnti í byrjun febrúar að það myndi ekki senda lið til keppni í meistaraflokki karla á komandi tímabili. Í byrjun apríl tóku þeir Björn Sólmar Valgeirsson og Viktor Már Jónasson við liðinu af þeim Viktori Inga Jakobssyni og Declan Redmond sem spiluðu síðan báðir með Skallagrími í sumar. Blaðamaður heyrði hljóðið í Birni Sólmari í liðinni viku varðandi tímabilið sem lauk fyrstu vikuna í september og innti hann eftir því þegar hann sagði í viðtali við Skessuhorn í vor að markmiðið væri einfaldlega að halda liðinu í deildinni. Ertu ekki ánægður að það markmið náðist og hvað ertu ánægðastur með ef þú lítur yfir tímabilið og hvað ekki?

Byggðu upp góða og skemmtilega liðsheild
„Markmiðið var fyrst og fremst að halda liðinu uppi, það tókst og erum við gríðarlega sáttir með það. Það sem við erum ánægðir með er að allir leikir í sumar voru hörkuleikir og við náðum að byggja upp góða og skemmtilega liðsheild. Einnig náðum við að breyta aðeins æfingakúltúrnum hjá okkur þar sem síðustu ár hafa strákarnir úr öðrum flokki ÍA einungis mætt á æfingu daginn fyrir leik og verið að æfa bara með 2. flokki upp á Skaga. En í ár æfðu þeir hundrað prósent með okkur og þar af leiðandi náðum við að vera með góðar æfingar og ávallt í kringum 20 á hverri æfingu. Það hefði ekki verið hægt án frábærs viðmóts hjá Knattspyrnufélagi ÍA og þökkum við þeim kærlega fyrir það. Það sem við erum kannski ekki sáttir með er til dæmis síðasti leikurinn gegn KH og svo líka svona litlir hlutir sem er kannski erfitt að nefna eitthvað sérstaklega. Svo kannski að ná ekki að tengja saman fleiri sigurleiki i röð og það að við vorum að fá á okkur allt of mörg mörk í byrjun leikja sem dæmi.“

Þið töpuðuð fyrstu tveimur leikjunum í mótinu, fyrsti sigurinn kom í byrjun júní og síðan var þetta svolítið upp og niður allt tímabilið. Þið voruð alltaf í neðri hlutanum án þess þó að vera í fallhættu. Hvernig gekk að mótivera leikmenn fyrir verkefnið og halda mönnum á tánum í sumar? „Já, við vorum ávallt í ákveðinni fallbaráttu en eins og þú segir kannski án þess að vera í einhverri svaka fallbaráttu. En það var lítið mál að mótivera strákana því við settum okkur alltaf svo lítil markmið inn á milli. Sum náðust og önnur ekki en svo var það líka bara viljinn hjá strákunum að vilja spila á fullu í allt sumar sem hjálpaði mikið til.“

Síðasti leikur sumarsins var á móti KH sem endaði um miðja deild og lauk með stórsigri Hlíðarendapilta, 8-1. Hvað gerðist eiginlega í þeim leik? „Síðasti leikurinn var hrein og bein hörmung og ömurlegt að enda fínt tímabil á þeirri skitu. Í þeim leik fengu margir leikmenn að byrja sem höfðu ekki fyrr verið að byrja marga leiki en það er ekki neitt hægt að sakast við þá. Þetta voru líklega bara of margar breytingar í einu, uppleggið hjá okkur var einnig bara rangt og því fór sem fór.“

Hvað með umgjörðina í sumar, var hún góð í kringum liðið og var góð mæting á heimaleikina? „Það má alltaf gera betur varðandi umgjörðina en því miður þá eru ansi fáar hendur í kringum meistaraflokkinn og skorum við á þá sem hafa áhuga á því að hjálpa til því án sjálfboðaliða verður þetta alltaf ansi erfitt. Mætingin var svona ágæt og mætti auðvitað vera betri en það var ávallt góður kjarni sem mætti á alla heimaleikina.“

Byrjunarlið Skallagríms gegn Vængjum Júpiters í sumar. Ljósm. vaks

Allir skiluðu sínu
Björn Sólmar segir að liðið í sumar hafi verið byggt upp á reynslumiklum heimamönnum, um tíu leikmönnum úr 2. flokki ÍA og þremur Spánverjum og segir hann að sú blanda hafi verið fín. Allir hafi staðið sig vel og þeir hafi náð að byggja upp góða liðsheild. En hvaða leikmenn að þínu mati stóðu sig vel í sumar og sluppu ykkar menn við meiðsli? „Við erum bara gríðarlega sáttir með alla þá leikmenn sem við vorum með og kannski ósanngjarnt að nefna einhverja sérstaklega. Allir skiluðu sínu og það var gaman að fylgjast með 2. flokks strákunum sem voru að stíga sín fyrstu skref í meistaraflokksbolta og sjá framfarirnar hjá þeim í sumar. Varðandi meiðsli þá lentum í smá meiðslum hér og þar en aðallega voru það okkar reynslumiklu leikmenn sem voru að kljást við meiðsli. Viktor Ingi Jakobsson spilaði bara sjö leiki í sumar, Birgir Þór Sverrisson missti af þremur leikjum vegna meiðsla, Declan Redmond missti af einhverjum leikjum og kannski það sem særði okkur mest var það að Elís Dofri Gylfason náði bara að spila tvo leiki í allt sumar.“

Hvað með aðstöðumálin, eitthvað að frétta af þeim? „Því miður þá er ósköp lítið að frétta af bættri aðstöðu hérna sem er mikið áhyggjuefni, bæði fyrir meistaraflokk og einnig fyrir okkar yngri flokka starf. Ef við ætlum að halda krökkum hér í fótbolta og halda þeim í heimabyggð þá þarf þetta að lagast sem fyrst og það mun hjálpa fótboltanum að fara á hærra stig.“

Nú var fjórða deildin í fyrsta skipti tíu liða deild, hvernig fannst þér það fyrirkomulag? „Okkur fannst fjórða deildin bara geggjuð og deildin er miklu miklu sterkari en fólk gerir sér grein fyrir því það eru mörg lið sem eru setja bæði mikinn metnað og pening í liðin sín.“ Björn Sólmar segir að lokum að ekki sé komið á hreint hvort hann og Viktor Már haldi áfram með liðið á næsta tímabili en þeir vilja þakka þeim sem studdu við bakið á liðinu í sumar kærlega fyrir stuðninginn. „Við vonum að þessi litlu framfaraskref sem voru tekin í sumar verði alltaf stærri og stærri á næstu árum.”

Úr leik Skallagríms og Árborgar í lok ágúst. Ljósm. glh

vaks

„Vonum að litlu skrefin verði stærri á næstu árum“

Rætt við Björn Sólmar Valgeirsson um tímabilið í sumar

Rætt við Björn Sólmar Valgeirsson um tímabilið í sumar