Óhætt er að segja að sannkölluð menningarhelgi sé framundan í Stykkishólmi því á morgun, laugardag, opna þrjár nýjar sýningar í bænum. Tvær eru í Norska húsinu og ein í Amtsbókasafninu.

Ný grunnsýning verður opnuð klukkan 14:30 í Norska húsinu í Stykkishólmi. Sýningin ber heitið„Hjartastaður – Sjóndeildarhringurinn með augum ungs fólks á Snæfellsnesi frá 1900“og dregur fram sjónarhorn ungs fólks á umhverfi sitt og tengingu þess við átthagana en saga Snæfellsness blandast þar inn í enda ótalmargir utanaðkomandi þættir í sögunni sem höfðu afgerandi áhrif á líf ungmenna á tímabilinu 1900 til samtímans. Reynt er að endurspegla menningu og veruleika ungs fólks á Snæfellsnesi meðal annars með viðtölum við Snæfellinga á ýmsum aldri. Auk þess varpa heimildir og gögn annars staðar frá ljósi á sögusvið sýningarinnar.

Sama dag opnar einnig í Byggðasafni Snæfellinga og Hnappdæla sýningin Solander 250: Bréf frá Íslandi. Sýningin er sett upp til að minnast þess að liðin eru 250 ár frá merkum erlendum vísindaleiðangri til Íslands árið 1772. Með í þeirri för var einn af lærisveinum hins heimsþekkta sænska náttúruvísindamanns Carls von Linné, náttúrufræðingurinn Daniel Solander frá Svíþjóð. Þá skrásetti Solander og safnaði margs konar fróðleik um náttúru Íslands, menningu, siði og klæðaburð þjóðarinnar. Á sýningunni túlka tíu íslenskir listamenn frá félaginu Íslenskri grafík þessa atburði og þær breytingar sem hafa orðið á landi og þjóð síðan.

Á Amtsbókasafninu opnar sýning sem ber heitið Fimmtíu ár af Einari Áskeli og hefst klukkan 13. Í tilefni af því að fyrsta bókin um Einar Áskel kom út árið 1972 setti bókasafn Norræna hússins saman sýningu í samvinnu við sænska sendiráðið og Sænsku stofnunina á Íslandi. Á sýningunni er spjald með Einari og pabba hans sem hægt er að mynda sig í, veggspjöld með ýmsum fróðleik um bækurnar og Gunillu Bergström höfund þeirra. Safnið allt mun fá á sig skemmtilegt yfirbragð af Einari og hans notalega heimi. Auk þess verða í tengslum við sýninguna lánaðir út sögupokar sem innihalda spil, bækur, kubba, bók og fleira sem tengist Einari. Sýningin er nú á ferð um landið og verður í Stykkishólmi frá 23. september til 7. október 2023. Sýningin verður formlega opnuð með ávarpi sænska sendiherrans Pär Ahlberger. Boðið verður upp á veitingar í anda Einars Áskels og ömmu hans og börnin geta litað myndir af Einari og tekið þátt í getraun um hann. Sýningin stendur til 6. október og er bókasafnið opið þriðjudaga til föstudaga frá 14-17.

Menning í fyrirrúmi í Hólminum um helgina