medium

large

thumbnail

1536x1536

2048x2048

small

custom-size

ÍATV getur ekki lengur streymt leikjum kvennaliðs ÍA

Hildur SH fékk veiðarfærin í skrúfuna

Samtökin Sól til framtíðar formlega stofnuð

Héldu samráðsfund Öruggara Vesturlands í Borgarnesi

Ráðgjafi VÍS nú til staðar í útibúi Íslandsbanka á Akranesi

Jörð skalf undir Grjótárvatni snemma í morgun

core/paragraph

Kór Keflavíkurkirkju ásamt hljómsveit var með tónleika í Akraneskirkju á laugardaginn þar sem flutt voru lög írsku hljómsveitarinnar U2 og voru allir textar sungnir á íslensku. Textarnir eru eftir fjóra meðlimi kórsins og á Ómar Ólafsson fimm þeirra, Sólmundur Friðriksson samdi fjóra texta og kórstjórinn Arnór B. Vilbergsson og Freydís Kneif Kolbeinsdóttir sömdu bæði einn texta. Ómar tók að sér á tónleikunum að útskýra innihald textanna sem voru flestir í trúarlegum stíl og ekki annað hægt að segja það að þeir eru vel ortir og pössuðu ágætlega við lögin.

Hljómsveitin Sláinte var skipuð þeim Sólmundi sem spilaði á bassa, Þorvaldur Halldórsson spilaði á trommur, Þorvarður Ólafsson á gítar og Arnór spilaði á hljómborð og munnhörpu. Hljómsveitin var nokkuð þétt og gerði vel að ná hljómi U2 að einhverju leyti. &nbsp;Þorvarður gerði sitt besta til að ná sándi gítarleikara U2, The Edge, með gítarleik sínum og tókst það ágætlega. Hann gerði þetta einfalt enda ekki hver sem er sem nær þessum einstaka og oft klingjandi gítarhljómi sem The Edge hefur skapað á rúmlega 40 ára ferli hljómsveitarinnar.

Kórinn var kraftmikill og góð stemning í hópnum sem skilaði sér vel til áhorfenda sem voru í færra lagi enda knattspyrnuleikur í bænum á sama tíma. Kórmeðlimir létu það ekkert á sig fá og útkoman var ansi skemmtileg, sérstaklega í síðustu lögunum Allt í nafni hans, Veit alveg af þér og Feginn að fá að fylgja þér. Þá sungu nokkrir meðlimir kórsins einsöng í fimm lögum á tónleikunum og vert að nefna söng Páls Reykdals Jóhannessonar í laginu Ef Guð mun engla senda og samsöng þeirra Elmars Þórs Haukssonar og Ásdísar Rósu Gunnarsdóttur í Allt í nafni hans sem þau fluttu öll eftirminnilega.

Í heildina voru þetta tónleikar sem voru fluttir af einlægni og alúð og með virðingu fyrir tónlist þessara írsku fjórmenninga sem kalla sig U2. Kór Keflavíkurkirkju hyggst á næsta ári leggja leið sína til Dyflinnar á Írlandi þar sem hljómsveitin U2 byrjaði vegferð sína árið 1976 og aldrei að vita nema meðlimir kórsins hitti á strákana á förnum vegi, hver veit? Takk fyrir tónleikana og góða ferð!

Fréttaveita Vesturlands

Vel heppnuð U2 messa í Akraneskirkju