Rætt við Hlyn Thor Ragnarsson athafnamann

Hlynur Thor Ragnarsson er einn eigandi Bara sem er bar og bistro við Borgarbraut í Borgarnesi, en staðurinn er í eigu tvennra hjóna; þeirra Hlyns og Sóleyjar Óskar Sigurgeirsdóttur eiginkonu hans, ásamt þeim Rakel Dögg Sigurgeirsdóttur og Magnúsi B Jóhannssyni. Bara opnaði 17. júní 2021 og hefur fengið góðar viðtökur heimafólks og ferðafólks. Eigendur Bara munu í ár standa fyrir hátíðinni Barafest þriðja árið í röð en hátíðin mun fara fram 5.-7. október í Grímshúsi í Brákarey.

Auk þess að vera einn eigandi Bara hefur Hlynur orðið sér úti um smá aukaverkefni en hann hefur undanfarið verið með Grímshús á leigu. Þar stefnir hann á að stofna bruggverksmiðju og viðburðastað. Blaðamaður Skessuhorns settist niður í kaffi með Hlyni og spurðist fyrir um Bara, Barafest og framtíðarsýn Grímshúss.

Gera allt frá grunni

,,Fyrsta sumarið sem við vorum í rekstri var enginn ferðamaður vegna Covid,“ segir Hlynur um upphaf staðarins Bara. ,,Næsta sumar urðum við að botnlangagötu, þar sem verið var að grafa upp Borgarbrautina. Þá keyrði enginn framhjá og enginn vissi af okkur nema heimafólk, svo þetta byrjaði aðeins brösuglega hjá okkur. Heimamaðurinn er samt alltaf frekar spenntur og við höfum reynt að sinna honum vel. Á meðan ferðamaðurinn er á ferli yfir sumarmánuðina erum við frekar að stíla inn á það að vera matstaður frekar en bar. Á meðan við höfum haft opið í sumar hefur húsið verið fullt, og þá aðallega af ferðafólki. Þá hefur maður ekki alveg orku til að sinna öðru líka, eins og djamminu. Við viljum skera okkur úr og útbúum þess vegna allan mat sjálf, alveg frá grunni. Svo við erum að úrbeina og hakka, búa til sósur og marinera kjöt.“

Sérstaðan í bjórnum

Hlynur segir bjórúrval Bara skapa sérstöðu fyrir staðinn. ,,Við erum bara með handverksbjór, ekki neina hefðbundna. Við erum með bjóra frá litlum bjórverksmiðjum af öllu landinu og skiptum þessu út eins og okkur dettur í hug eftir framboði. Við höfum staðið við það að hafa bjórúrvalið eftir okkar höfði en stærsti kúnnahópurinn eru útlendingar sem hafa sérstakan áhuga á því að smakka þessa sérstöku bjóra. Það er erfiður bransi að vera brugghús svo við veljum að versla við litlu verksmiðjurnar fremur en risana. Við erum t.d. alltaf með mjöð og höfum verið með allt að þrjár tegundir í einu. Af sterku vínunum tökum við eins mikið íslenskt inn og við getum, við erum með Stuðlaberg gin og Grábrók viskí og kaupum ekki annað inn af þessum tegundum. Viskíið Grábrók er t.d. búið til örfáum húsum frá okkur, svo okkur finnst sjálfsagt að bjóða upp á þetta frambærilega viskí sem framleitt er í Borgarnesi,“ segir Hlynur.

Saltstaukasafnið

Hlynur segir Bara hafa fest sig í sessi hjá heimafólki en ferðafólk kemur gjarnan til að berja saltstaukasafnið augum sem finna má afsíðis á staðnum. ,,Bara er að verða stofnun sem er orðin fremur sjálfbær en við höfum aldrei auglýst annars staðar en á samfélagsmiðlum. Við tókum þá ákvörðun að við vildum frekar láta orðið berast um hvað við værum frábær, í staðinn fyrir að við værum að reyna að sannfæra fólk um það sjálf,“ segir Hlynur og hlær. ,,En þetta virkar vel. Ferðamaðurinn sér okkur svo á netinu, það skiptir máli að vera með góða dóma sem koma upp þegar fólk gúgglar. Við erum með fimm stjörnur alls staðar, sem hefur mikið að segja. Við viljum líka að upplifunin af staðnum sé góð en það skiptir máli að fólk finni að það sé velkomið hingað til okkar.

Svo er þetta ekki bara bar, þetta er líka menningarstofnun því hér erum við með safn. Við erum til dæmis með minnsta saltstaukasafn í heimi hérna á baðherberginu,“ segir Hlynur og hlær. ,,Það er slatti af fólki sem kemur bara til að sjá það þar sem ferðamaðurinn sér það á netinu. Við erum með tvo saltstauka á hillu og afsökunarbeiðni fyrir að hafa brotið þann þriðja.“

*Grímshús. Hlynur stefnir á að opna þar bruggverksmiðju og viðburðastað.*

Heimsmeistaramót á Barafest

Hátíðin Barafest verður nú haldin þriðja árið í röð. Hugmyndin var upphaflega sú að líkja eftir októberfest og leggja áherslu á bjórtegundir og drykkju. Í ár verður hátíðin með breyttu sniði en áherslan mun nú vera lögð á menningu. ,,Við héldum Barafest í fyrsta sinn fyrir tveimur árum. Þá settum við upp tjöld í portinu milli Bara og Bílabæjar. Það ár komumst við að því að það var ekkert rosalega sniðug hugmynd að tjalda í Borgarnesi í október,“ segir Hlynur og hlær.

,,Hugmyndin var þá byggð á októberfest, sem er bara bjórdrykkja og skemmtun. Strax fyrsta árið fengum við einungis heimafólk til að koma fram en við eigum svo mikið af hæfileikaríku fólki sem gefur sig samt ekki út fyrir það að stíga á stokk sem tónlistarfólk. Við höfum þess vegna boðið upp á atriði á kvöldin frá upphafi og munum halda því áfram. Í fyrra fengum við svo að vera í Grímshúsi í Brákarey, þá héldum við okkur við þetta bjórþema og vorum með tónlistaratriði og gjörninga.

Í ár munum við selja bjór en ekki leggja sérstaka áherslu á það eins og fyrri árin, við verðum svo líka með aðra drykki og einhverjar veitingar. Núna ætlum við samt að skapa okkar eigin sérstöðu og búa til okkar eigið konsept. Við erum að færa okkur meira yfir í menninguna en við verðum með alls konar gjörninga. Hátíðin verður svolítið tónlistarmiðuð en við leggjum líka áherslu á íþróttir, við verðum nefnilega með heimsmeistaramót Vesturlands í skæri blað steinn, sem er að sjálfsögðu íþrótt. Svo verða fleiri gjörningar en í fyrra fengu gestir t.d. að horfa á málningu þorna. Það var að vísu svolítið seint um kvöld hjá okkur þá, svo fólk hafði kannski aðeins skerta athygli til að njóta þessa til fulls. Þetta vatt aðeins upp á sig og varð í staðinn þannig að maður var ekki að fylgjast með málningu þorna, maður var að fylgjast með manni sem var að fylgjast með málningu þorna,“ segir Hlynur glettinn.

Leikhús fáránleikans

Barafest verður stækkuð í ár en hátíðin nú mun standa yfir í þrjá daga í stað tveggja eins og fyrri ár. ,,Dagskrá verður á fimmtudag, föstudag og laugardag. Á fimmtudaginn verður frítt inn en aðgangseyrir verður föstudag og laugardag. Við stöndum nú í ströngu við að leggja lokahönd á dagskrána en við erum að skipuleggja hátíðina með nefnd sem heitir Hollvinir Bara. Við ætlum að byrja hátíðina í ár í Borgarneskirkju með hugvekju. Hugvekjan verður í útfararstíl en við munum jarðsyngja leiðindi og enda á bálför. Fólk fær að skrifa á miða eitthvað sem því finnst leiðinlegt og setja í kistu sem svo verður borin til bálkastar, það væri rosalega gaman að fylla kirkjuna. Líkfylgd verður svo yfir í Grímshús þar sem kórar Bara munu taka lagið, bæði drengjakórinn og kvennakórinn.

Svo munum við loka öll kvöldin klukkan eitt. Þannig höfðum við til stærri hóps, við ætlum að reyna að halda þessu á siðlegum nótum. Við erum smám saman að stækka hátíðina en í fyrra vorum við með leyfi fyrir hundrað manns en núna sóttum við um leyfi fyrir 150,“ segir Hlynur um hátíðina Barafest.

*Úr Grímshúsi, húsið er í dag notað undir kóræfingar en hátíðin Barafest verður einnig haldin þar 5.-7. október næstkomandi.*

Húsbandið Drusla á bömmer

Tónlistarfólk úr Borgarfirði mun koma fram á hátíðinni en Bara býr svo vel að búa að tveimur kórum og húsbandi sem að sjálfsögðu mun halda uppi fjörinu. ,,Kórarnir okkar, drengjakór Bara og Barakórurnar munu að sjálfsögðu koma fram. Svo erum við með húsband sem heitir Drusla á bömmer sem stígur að sjálfsögðu á stokk. Tóti trúbador mun einnig koma fram ásamt Jóni Snorra, Steinku Páls með harmonikkuna og hljómsveitinni hennar, ábreiðubandinu List. Eðlilega verður DJ Ingvar Breiðfjörð einnig á svæðinu en hann eyðilagði næstum því Grímshús í fyrra með mikilli stemningu, það var ævintýri. Það verður svo ballstemning síðasta kvöldið og alltaf þrjú til fimm atriði á hverju kvöldi.

Við verðum líka með hlaðvarpsmessu á laugardaginn með Veru Illugadóttur og Illuga Jökulssyni, ásamt þeim verða sennilega tvö önnur hlaðvörp úr héraði en t.d. hefur Myrka Ísland staðfest komu sína,“ segir Hlynur.

Brugghúsið Grímshús

Grímshús var byggt af útgerðarfélaginu Grími hf. árið 1942 og hannað af Halldóri H. Jónssyni sem einnig hannaði Borgarneskirkju, Hótel Borgarnes, Háteigskirkju, Hótel Sögu og fjölmörg önnur hús. Húsið var upphaflega á tveimur hæðum en m.a. hýsti efri hæðin skrifstofur Borgarneshrepps um tíma. Húsið varð fyrir miklum skaða þegar það brann á níunda áratugnum en á þeim tíma var húsið nýtt fyrir starfsemi sláturhússins og þar voru sviðnir hausar. Endurbætur á Grímshúsi hafa nú staðið yfir síðan Grímshússfélagið var stofnað af hópi velunnara þess árið 2013, en húsið er í eigu Borgarbyggðar.

Aðskilið starfi sínu á Bara hefur Hlynur nú tekið húsið á leigu og hyggst stofna þar bruggverksmiðju og viðburðastað. ,,Hugmyndin til að byrja með er sú að þetta verði viðburðastaður sem fær að þróast út í það að verða brugghús. Það væri gaman að fá brugghús á Vesturland, það sárvantar eitt slíkt. Nú erum við að nota Grímshús í kóræfingar en húsið er í fínu standi fyrir slíkar æfingar og viðburði eins og Barafest. Húsið er í rauninni í fullri notkun núna fyrir félagsstarf á borð við kór- og hljómsveitaræfingar.“

Hvenær sérðu fyrir þér að opna bruggverksmiðju í Grímshúsi? ,,Það er mikil vinna að koma því á laggirnar, það klikkar alltaf eitthvað í ferlinu. Ég fer á fullt með það að koma þessu verkefni af stað í byrjun næsta árs svo vonandi verðum við komin af stað með hækkandi sól næsta vor. Ég er búinn að ráða bruggara sem er nú þegar með sitt eigið brugghús. Þetta verður í rauninni ekki verksmiðja, þetta verður í minna sniði. Við munum mest ná að framleiða 1.200 lítra í einu en hver framleiðsla getur tekið tvær til fimm vikur, fer eftir því hvernig bjór er verið að brugga. Við munum bara brugga fyrir viðburði á staðnum og ekki koma til með að selja bjórinn út fyrir húsið.

Við sjáum líka fyrir okkur að geta hýst árshátíðir og eitthvað slíkt, við höfum fengið fyrirspurnir um slíkt á Bara en okkur langar frekar að grípa þessa hópa í staðinn fyrir að vísa þeim frá, eins og við höfum verið að gera. Bara er með pláss fyrir fjörutíu manns en í Grímshúsi munu komast fyrir um 100-150 manns. Við munum ekki setja upp fullbúið eldhús í Grímshúsi í fyrsta fasa svo við sjáum fyrir okkur að kaupa veisluþjónustu einhvers staðar að. Brugghúsið verður samt aðal aðdrátturinn og staðsetningin er náttúrulega alveg sér á báti. Það er svakalega fallegt að vera þarna í spegilsléttum firðinum en líka ekkert smá gaman þegar brimið brotnar á klettagarðinum svo sjórinn gusast yfir húsið.

Sviðslistir eins og tónlist, leiklist, gjörningar og myndlist munu vera þarna í forgangi og starfsemi hússins verður menningartengd fram yfir fyllerí. Við verðum ekki með opnanir, bara bókanir og opnun hússins er þá á vegum listafólksins sem er að nýta húsið hverju sinni,“ segir Hlynur að lokum.

Stendur í ströngu við að undirbúa Barafest og koma brugghúsi á laggirnar í Grímshúsi

Rætt við Hlyn Thor Ragnarsson athafnamann

Rætt við Hlyn Thor Ragnarsson athafnamann