medium

large

thumbnail

1536x1536

2048x2048

small

custom-size

Tók upp myndbönd við aksturinn

Nokkur fjölgun brottfara frá landinu

HSH verður Fyrirmyndarhérað ÍSÍ

Afli í september var 98 þúsund tonn

Stór æfing lögreglu og viðbragðsaðila fer fram í dag

Teitur býður sig fram í forystusætið

core/paragraph

Ný grunnsýning verður opnuð laugardaginn 23. september kl. 14:30 í Byggðasafni Snæfellinga og Hnappdæla í Norska húsinu í Stykkishólmi. Sýningin leysir af hólmi fyrri grunnsýningu safnsins sem staðið hefur yfir á miðhæð hússins síðan 2001. Í tilkynningu frá Norska húsinu segir að byggðasafnið hafi hlotið öndvegisstyrk Safnaráðs árið 2020 til að ráðast í gerð nýrrar grunnsýningar og var víðtækt samráð haft um sýninguna þar sem íbúar á Snæfellsnesi tóku virkan þátt í samtalinu um nýja grunnsýningu. Niðurstaða stýrihóps sem hélt utan um undirbúningsferilinn var að ný sýning myndi fjalla um ungt fólk á Snæfellsnesi á tuttugustu og tuttugustu og fyrstu öldinni. Anna Melsteð þjóðfræðingur í Stykkishólmi var ráðin sem sýningarstjóri og Finnur Arnar Arnarsson er sýningarhönnuður.

Sýningin ber heitið „Hjartastaður - Sjóndeildarhringurinn með augum ungs fólks á Snæfellsnesi frá 1900“ og dregur fram sjónarhorn ungs fólks á umhverfi sitt og tengingu þess við átthagana en saga Snæfellsness blandast þar inn í enda ótalmargir utanaðkomandi þættir í sögunni sem höfðu afgerandi áhrif á líf ungmenna á tímabilinu 1900 til samtímans. „Reynt er að endurspegla menningu og veruleika ungs fólks á Snæfellsnesi meðal annars með viðtölum við Snæfellinga á ýmsum aldri. Auk þess varpa heimildir og gögn annarsstaðar frá ljósi á sögusvið sýningarinnar. Dustað er rykið af hluta þeirra 6000 gripa sem Byggðasafnið varðveitir og tengjast umfjöllunarefninu. Má þar finna forvitnilega hluti sem á einhverjum tímapunkti hafa haft áhrif líf ungs fólks. Hlaðvarpsþættir, byggðir á rannsóknarviðtölum sem gerð voru fyrir sýninguna líta dagsins ljós fyrri hluta árs 2024 auk þess margskonar viðburðir tengdir efni sýningarinnar eru áætlaðir,“ segir í tilkynningu.

Safnstjóri Byggðasafns Snæfellinga og Hnappdæla er Hjördís Pálsdóttir. Safnið er opið alla daga frá kl. 12-16 fram að aðventu. Þá tekur við jólaopnun og opið alla daga kl. 12-17.

Ný grunnsýning opnuð á laugardaginn í Norska húsinu í Stykkishólmi