medium

large

thumbnail

1536x1536

2048x2048

small

custom-size

Vítaverður framúrakstur

Allt frá saumnálum til hjólastóla til í Dísubúð

Tveir árekstrar í vikunni

Styrktar- og minningarsjóður Þorkels og Kristínar leystur upp

Skessuhorn komið í tveggja vikna fríi

Ragnar aftur í starf byggingafulltrúa

core/paragraph

Heimasíðan Á sigurslóð <a href="https://asigurslod.is/">(asigurslod.is)</a> var kynnt til leiks á föstudaginn í Tónbergi á Akranesi og voru margir áhugamenn um knattspyrnu mættir á staðinn. Feðgarnir Jón Gunnlaugsson og Stefán Jónsson hafa undanfarna áratugi safnað ómetanlegum heimildum um sögu knattspyrnunnar á Akranesi. Á heimasíðunni, sem var opnuð rétt fyrir leik ÍA og Gróttu á laugardaginn, kemur fram hjá Stefáni að knattspyrna hafi ávallt skipað stóran sess í lífi hans.

„Bæði pabbi minn og bróðir spiluðu lengi með ÍA þannig að tilvera mín var ávallt glædd ÍA litunum. Valur kemur líka sterkt inn í myndina enda bæði afi Einar og bróðir mömmu, Halldór kenndur við Henson, gegnheilir Valsmenn og voru oft fjörugar umræður á mannamótum, jólaboðum og í afmælisveislum. Þetta hafði allt áhrif á mig og var maður eins og svampur að hlusta á sögur af knattspyrnuleikjum fyrri tíma. Endalaust að afla sér upplýsinga og fróðleiks sem hefur loðað við mig til dagsins í dag. Snemma var ég farinn að fletta í blöðum og bókum og lét ekkert framhjá mér fara í því sem var að gerast í knattspyrnuheiminum. Þetta hefur aldrei yfirgefið mig fullkomlega. Ég var líka uppnuminn þegar ég fór með pabba upp á völl, í salinn sem hýsti m.a. verðlaunagripina og veifurnar úr Evrópuleikjum Skagamanna (sem er núna partur af þreksalnum) og þetta þótti mér virðingarvert. Veifur gömlu stórliðanna Barcelona, Köln, Sporting Lisbon, Aberdeen og fleiri liða blöstu við. Þótti þetta segja ýmislegt hvert þessi litli klúbbur hafði þó áorkað á skömmum tíma. Þetta hafði varanleg áhrif á mig og hefur haft mikið að segja um hvatann og eldmóðinn á bak við þetta verkefni. Að þessi stórglæsilega saga sem er ávallt að endurskrifa sig á að eiga sér heimili hvort sem það er á safni eða eins og í þessu tilfelli, á veraldarvefnum.“

Á kynningunni í Tónbergi fór Stefán yfir hugmyndafræðina á bak við heimasíðuna og Gunnlaugur, eldri bróðir hans, flutti einnig stutt erindi um bakgrunn hennar. Þá flutti Eggert Hjelm Herbertsson formaður Knattspyrnufélags ÍA þakkarávarp til þeirra feðga og þá tók einnig til máls Hrönn Ríkharðsdóttir formaður Íþróttabandalags Akraness. Að lokum flutti Stefán Pálsson sagnfræðingur erindi um sögulega leiki ÍA og Fram en Stefán er mikill stuðningsmaður Fram.

core/image

Fékk kyndilinn frá guðföður verkefnisins

Stefán segir enn fremur á heimasíðunni að þetta verkefni hefði aldrei getað orðið til nema með elju, áhuga og dugnaði eins manns sem er faðir hans, Jón Gunnlaugsson. „Það má segja að hann hafi fengið kyndilinn að þessari varðveislu frá guðföður verkefnisins, Helga Daníelssyni, sem sagan segir að hafi afhent pabba kassa af liðsuppstillingabókum ÍA frá m.a. gullaldarárunum fyrstu. Hann var hættur þessari skráningu og hefur sjálfsagt fundið á sér að pabbi væri best til þess fallinn að halda utan um þetta. Pabbi hefur núna um áratugaskeið haldið til haga upplýsingum um knattspyrnuna hér á Akranesi, sem manni kann að finnast lítilvægt en er í raun einsdæmi í þessum bransa söfnunar, grúsks og blaðamennsku því í fórum okkar, fyrir hans tilstilli eru allir keppnisleikir ÍA frá upphafi (og næstum því) allir markaskorarar og dagsetningar og ártöl. Þessu þurfti á gervihnattaröld að finna samastað á veraldarvefnum. Ásamt því að safna á einn stað öllum vitnisburði hvort sem það er í formi ljósmynda, blaðagreina, myndbanda, leikskrár og fleira því tengt og opna þetta fyrir stuðningsmönnum og öðrum áhugamönnum um knattspyrnu. Það verður að nefna það að svona verkefni verður aldrei fullklárað, á meðan knattspyrna er stunduð á Akranesi og fólk finnur í fórum sínum eitthvað sem það telur eiga heima á þessum vef þá verður þetta verkefni ávallt í uppfærslu. En líta má á síðuna sem samastað fyrir knattspyrnusöguna, rafrænt safn minninga. Það má alltaf læra eitthvað af sögunni.“

Stefán segir síðan á FB síðu sinni eftir að síðan hafði verið opnuð formlega á laugardaginn, að margra ára jafnvel áratuga, vinna sé loksins að skila sér í þessari heimasíðu sem vonandi getur orðið bæði til gagns og gamans. „Þetta er ekki neinn endapunktur, ég myndi frekar segja að þetta sé upphafið að einhverju meira og stærra en það er samt sem áður mikil gleði og smá léttir að við séum að fylgja þessari heimasíðu úr hlaði í dag.“

Fréttaveita Vesturlands

Sögusíðan Á sigurslóð opnuð formlega