medium

large

thumbnail

1536x1536

2048x2048

small

custom-size

Vítaverður framúrakstur

Allt frá saumnálum til hjólastóla til í Dísubúð

Tveir árekstrar í vikunni

Styrktar- og minningarsjóður Þorkels og Kristínar leystur upp

Skessuhorn komið í tveggja vikna fríi

Ragnar aftur í starf byggingafulltrúa

core/paragraph

Á degi íslenskrar tungu síðastliðinn laugardag var tilkynnt um þá ákvörðun Guðlaugs Þórs Þórðarsonar umhverfis-, orku- og loftslagsráðherra, að Kristinn Jónasson bæjarstjóri Snæfellsnesbæjar hljóti Náttúruverndarviðurkenningu Sigríðar í Brattholti 2023. Er þetta í fjórtánda sinn sem náttúruverndarviðurkenningin er afhent. Afhending viðurkenningarinnar hefur ekki átt sér stað, en mun fara fram á Snæfellsnesi og verður tímasetning kynnt síðar.

Í umsögn ráðuneytisins segir: „Kristinn hefur verið bæjarstjóri Snæfellsnesbæjar frá árinu 1998 og var virkur í baráttunni fyrir stofnun þjóðgarðs á utanverðu Snæfellsnesi, m.a. með vinnu sinni í starfshópi um stofnun þjóðgarðsins. Snæfellsjökulsþjóðgarður var stofnaður árið 2001 til að vernda bæði sérstæða náttúru svæðisins og merkilegar sögulegar minjar, ekki síst í tengslum við sjósókn, en hann er fyrsti þjóðgarður landsins sem nær að sjó. Kristinn hefur verið ötull við að vekja Snæfellsjökulsþjóðgarð til vegs og virðingar og bent á þau tækifæri sem tilkoma þjóðgarðsins hefur falið í sér. Meðal áherslumála Kristins er að auðvelda eigi fólki að ferðast um svæðið og kynnast því.“

Þá segir að í sveitarstjóratíð Kristins hafi Snæfellsbær, ásamt öðrum sveitarfélögum á Nesinu, komið að gerð svæðisskipulags Snæfellsness, verið aðili að Svæðisgarði Snæfellsness og fengið um árabil óháða Earth Check umhverfisvottun fyrir sjálfbær samfélög. „Kristinn hefur einnig verið ötull talsmaður þess að landsvæði Svæðisgarðsins Snæfellsness komist á skrá Menningarmálastofnunar Sameinuðu þjóðanna (UNESCO) yfir svonefnd MAB eða Maður og lífhvolfssvæði (e. Mand and Biosphere) og er sú vinna í gangi. MAB miðar að því að styrkja tengsl milli fólks og umhverfis á grunni vísindalegrar þekkingar. Undirritaðar viljayfirlýsingar liggja fyrir frá sveitarfélögunum fjórum á Snæfellsnesi og Snæfellsjökulsþjóðgarði, og er margvíslegur ávinningur af verkefninu fyrir nýsköpun og byggðaþróun á svæðinu. Auk framlags til náttúruverndar á Snæfellsnesi hefur hann einnig talað fyrir því að auka eigi vernd viðkvæmrar náttúru vítt og breitt um landið, s.s. á hálendi Íslands.“

Haft er eftir Guðlaugi Þór að eldhugar eins og Kristinn séu mikilvægir fyrir náttúru Íslands og sú vinna sem hann hefur lagt í fyrir Snæfellsjökulsþjóðgarð verður seint full þökkuð. „Kristinn hefur verið vakandi fyrir tækifærunum sem þjóðgarðurinn felur í sér og var að mörgu leyti á undan sinni samtíð. Það frumkvöðlastarf hefur skilað miklu til svæðisins og afrakstur þeirrar vinnu sýnir sig líka vel í þeim samhljómi sem ríkir milli íbúa Snæfellsnes og stórbrotinnar náttúru þjóðgarðsins.“

Fréttaveita Vesturlands

Kristinn hlýtur náttúruverndar-viðurkenningu Sigríðar í Brattholti