Blaðamaður Skessuhorns var á ferðinni seinnipart fimmtudags liðinnar viku með gras og afklippur af trjám sem hann losaði sig við í graspyttinum við móttökustöð Gámu á Akranesi. Það sem vakti athygli var hvað margir halda eða telja sér trú um það að mega henda hvaða úrgangi í móttökustöðina sem er þarna. Þarna mátti sjá timbur, alls kyns járn, steypuklumpa og einn bílstóll blasti einnig við. Þá voru óopnaðir ruslapokar sem voru vonandi líklegast með grasi sem fólk virðist ekki hafa nennt að tæma í pyttinn og henda síðan pokunum í gám sem er staðsettur við pyttinn.

Að sögn verkstjóra hjá Terra á Akranesi getur farið mikill tími í að hreinsa til á svæðinu og taka í burtu það sem ekki á að vera þarna og alveg með ólíkindum að fólk skuli detta sér þetta í hug. Graspytturinn er opinn allan sólarhringinn en með svona umgengni og ef hún ekki batnar verður skoðað að bjóða ekki lengur upp á þessa þjónustu. Sem þýðir að þá þurfa Skagamenn og nærsveitungar að koma í móttökustöðina í Gámu með sinn garðaúrgang og skila því af sér gegn gjaldi á opnunartíma.

Bílstól var hent í pyttinn ásamt öðru dóti.

Illa gengið um graspyttinn hjá Gámu á Akranesi