Hundarnir Baltasar og Þoka veita heimilisfólkinu á Höfða, dvalar- og hjúkrunarheimili á Akranesi, mikla gleði. Rannsóknir hafa sýnt gagnsemi þess að vera með gæludýr á dvalar- og hjúkrunarheimilum sem og í öðrum búsetuúrræðum hjá fullorðnu fólki. Dýrin eru þá ýmist íbúar á heimilunum en svo er einnig nokkuð algengt að starfsmenn komi með gæludýrin sín með sér til vinnu. Á öllum þessum stöðum veita dýrin heimilisfólki gleði, stuðning og nánd.

Á Höfða eru það tveir hundar sem koma með eigendum sínum sem þar starfa. Það eru þeir Baltasar sem er í eigu Helgu Jónsdóttur forstöðukonu dagdeildar og svo hún Þoka sem er í eigu Ólínu Ingibjargar Gunnarsdóttir hjúkrunarforstjóra. Veita þeir báðir heimilisfólkinu mikla gleði. Auk þess er á heimilinu einn köttur sem er í eigu heimilismanns. Hann kemst út og inn um opinn glugga á herberginu sínu að vild, en kíkir einnig á heimilisfólkið af og til.

Köttur á svipuðum aldri
„Kisan er orðin 17 ára gömul og má því segja að hún sé í kattaárum á svipuðum aldri og margt heimilisfólkið hérna,“ segir Ólína Ingibjörg í samtali við blaðamann. „Kosturinn við það að við komum með okkar eigin dýr er að það þarf ekki að annast þau þegar við erum ekki á vakt. Við tökum þau heim með okkur og mætum svo aftur með þau á næstu vakt.“

Heimilisfólkið saknar hundanna þegar þeir af einhverjum ástæðum koma ekki með eigendum sínum.

Keyptir til fylgislags
Ólína Ingibjörg sagði að heimilisfólkið saknaði alltaf hundanna þegar þeir af einhverjum ástæðum koma ekki með eigendum sínum. „Ég held að íbúarnir sakni þeirra meira en okkar ef við erum fjarverandi og spyrja þá mikið um þá,“ sagði Ólína Ingibjörg og brosir. Hún segir að Baltasar og Þoka hefðu verið fljót að finna út hverja væri vænlegast að heimsækja þegar gott væri að ná sér í smá hundanammi, því nokkrir heimilismenn eru oft með slíkt góðgæti í herbergjum sínum til að tryggja sér heimsókn þeirra.

„Ég ákvað að prófa að koma með Baltasar hingað fyrir um þremur árum síðan og það tókst svona ljómandi vel og heimilisfólkið tók strax miklu ástfóstri við hann,“ segir Helga. Baltasar er af Chi Chu hundakyni, en Þoka er af Havanese hundakyni og er ættuð frá Hvanneyri. „Þessar tegundir henta mjög vel hér. Þau gelta nánast ekkert og líkar vel að láta klappa sér. Algengt er að Baltasar liggi makindalega á ganginum hérna frammi og er lítið að stressa sig þrátt fyrir töluverðan umgang af fólki og þarf stundum að láta hann færa sig þegar farið er til dæmis með matarvagnanna eftir ganginum.“

Gefur eigandanum mikið
Þoka fer meira inn á gangana hjá heimilisfólkinu og heilsar upp á það. En oft eru báðir hundarnir á ferðinni þar. „Heimilisfólkinu finnst skemmtilegt að fylgjast með þeim og láta okkur oft vita hvar þeir eru hverju sinni,“ segir Ólína Ingibjörg. „En það er einn einstaklingur sem við vitum um sem er örlítið hræddur við hunda og pössum við sérstaklega upp á að viðkomandi fái frið. Varðandi það að fá önnur dýr inn á heimilið þá stefnum við á að fá kisu inn á heimilið í framtíðinni. Gæludýr eru inn á heimilum hjá fólki og þetta er heimili þeirra sem hér búa og því lítur það sömu lögmálum. Við sjáum líka hvað það gefur gamla manninum mikið að fá að hafa kisuna sína hjá sér.“

Þjóðhollir og rammpólitískir
Helga segir að auk almennra skyldustarfa að Höfða hefði það sýnt sig að Baltasar væri afskaplega þjóðhollur hundur. „Þegar forsetahjónin, Guðni Th. Jóhannesson og Eliza Reid, komu í opinbera heimsókn á Akranes í tilefni af 80 ára afmæli Akraneskaupstaðar í desember síðastliðnum heimsóttu þau Höfða. „Í þessari heimsókn tók ég eftir því að Baltasar beið sallarólegur við eina súluna á aðalganginum. Þegar gestirnir komu eftir ganginum tók hann undir sig stökk og hljóp beint til Guðna forseta,“ segir Helga og hlær. „Hann sýndi það að hann kann sig svo sannarlega. Þá fór Baltasar ekki leynt með stjórnmálaskoðanir sínar. Fyrir síðustu bæjarstjórnarkosningar komu fulltrúar stjórnmálaflokkanna í heimsókn hingað á Höfða og bar Baltasar sig sérstaklega vel upp við fulltrúa Sjálfstæðisflokksins, en gaf fulltrúum hinna flokkanna minni gaum,“ segja þær Helga og Ólína Ingibjörg að lokum á léttu nótunum.

Í lok spjalls leit tíðindamaður Skessuhorns við í dagvistun á Höfða. Þegar dýrin bárust í tal voru allir sammála um að það væri dásamlegt að hafa þau Baltasar og Þoku á staðnum og það gæfi þeim mikið.

se

Guðmundur Guðjónsson með köttinn Skottu.

Gæludýr geta veitt mikla gleði á hjúkrunarheimilum