Það leynast víða lunknir handverksmenn í Snæfellsbæ. Einn þeirra er Heimir Þór Ívarsson sem stundar sjómennsku að aðalstarfi og er bryti á vertíðarbátnum Ólafi Bjarnasyni SH. Heimir stundar gæsaveiðar á haustin og er nær eingöngu í Skagafirði við veiðar á heiðagæs, en að hans sögn er mest af heiðagæs á þeim slóðum. „Ég fer með félögum mínum á þær veiðar og erum svo sem ekkert að veiða of mikið, bara svona fyrir okkur og svo ef afgangur er þá gefum við vinum og vandamönnum gæsina. Fuglinn reykjum við og gröfum. Veiðifélag okkar heitir Éttu meira.is,“ segir Heimir og hlær. Þar vísar hann til þess að einn af veiðifélögum hans er alltaf svangur og þar að leiðandi þurfa þeir að stoppa í hverri vegasjoppu til þess að hann fái að næra sig. „Svo náttúrulega er ég á rjúpu á haustin ásamt hundi mínum. En nú þegar veiðitímabilið liggur niðri er ég að dunda mér við að gera veiðihnífa fyrir veiðimenn. Það er talsverð vinna að gera þessa hnífa, en þá geri ég algjörlega frá grunni,“ segir Heimir Þór.

„Ég nota Baader stál í blöðin sem ég fæ frá fiskvinnslu-fyrirtækjum hér á nesinu. Nú læt ég laser skera þau í Micro í Hafnarfirði, en áður skar ég blöðin til með slípirokki, en það var allt of mikil vinna sem fór í það.“ Heimir gerir sköftin á hnífana úr hreindýrahorni og í hulstrin notar hann nautshúðir sem hann handsaumar. Að endingu merkir hann hvern og einn hníf kaupandanum. „Þetta er mikil föndurvinna,“ segir Heimir og bætir við að það fari margar klukkustundir í að búa til hvern hníf. „Ég er ekki að gera þetta til þess að græða á þessu. Mér þykir gaman af því að búa til hluti því íþróttakennarinn minn sagði við mig þegar ég var í skóla að ég gæti aldrei orðið íþróttamaður vegna þess að ég væri svo tapsár, þannig að ég lærði handavinnu af mömmu en hún var handvinnukennari í barnaskólanum í Þykkvabæ. Hún kenndi mér að prjóna og sauma,“ segir Heimir.

Heimir segist hafa notað netið mikið til þess að læra hnífasmíðina og hafi lært mikið af þeim snillingum sem eru í hnífasmíði og deili af reynslu sinni. „Ætli ég sé ekki búinn að selja um 70 hnífa. Ég hef ekkert verið að auglýsa mig en kaupendur hafa bara verið að skoða mitt Facebook og Snapchat,“ segir hann að endingu.

af

Hnífar sem Heimir hefur smíðað og eru í smíðum.

Heimir með sinn fyrsta hníf sem hann smíðaði og á sjálfur.

Smíðar veiðihnífa frá grunni