Rætt við Svövu og Unnstein í Blómasetrinu Kaffi Kyrrð í Borgarnesi

Hjónin Svava Víglundsdóttir og Unnsteinn Arason í Borgarfirði hafa um árabil rekið Blómasetrið Kaffi Kyrrð við Skúlagötu 13 í Borgarnesi auk þess að bjóða ferðafólki upp á gistingu í fjórum húsum. Óhætt er að segja að kaffihúsið þeirra hafi slegið í gegn og hefur skapað sér sterkt orðspor. Undanfarið hafa þau getað boðið allt að 30 manns gistingu. Nú hafa þau keypt eitt hús til viðbótar, hið reisulega sýslumannssetur við Helgugötu 5 í Borgarnesi, og hyggjast bæta herbergjum þar við í gistiflóruna. Við það geta þau aukið gestafjöldann aum 50%. Þrátt fyrir að hjónin séu að meðaltali 75 ára segja þau engan bilbug á sér að finna og draumar þeirra snúist ekki um að hætta að vinna þótt bæði séu komin á lífeyristöku aldur. Blaðamaður settist niður með þeim Svövu og Unnsteini í síðustu viku.

Sýslumenn hver af öðrum
„Við erum búin að skrifa undir kaupsamning og tökum við húsinu við Helgugötu 5 um miðjan október. Stofnuðum einkahlutafélagið Sýslumannssetrið ehf. til að halda utan um verkefnið,“ segir Svava. „Þetta er sögufrægt hús hér í Borgarnesi og gaman að við skulum nú vera að eignast það. Húsið var upphaflega byggt árið 1930 fyrir sýslumann og var síðan stækkað árið 1970 þegar sett var á það ris. Þetta er þrílyft hús sem stendur á eignarlóð, er samtals yfir 300 fermetrar auk bílskúrs,“ segir Unnsteinn. Þau segja að litlu þurfi að breyta innanhúss til að húsið smellpassi sem gististaður. Það hefur undanfarin sjö ár verið í einkaeigu en áður bjuggu í því hver af öðrum sýslumenn Mýra- og Borgarfjarðarsýslu. Auk Helgugötu 5 hefur Blómasetrið Kaffi Kyrrð leigt út gistipláss í húsunum við Skúlagötu 13 og 15 auk þess sem þau höfðu í sumar útleigu á tveimur íbúðum sem tilheyra nemendagörðum Menntaskóla Borgarfjarðar við Brákarbraut 8. Útleigan fer í gegnum bókunarsíður á borð við booking.com en umsjón og þrifum er stýrt frá Blómasetrinu.

Að störfum frá barnæsku
Þau Unnsteinn og Svava segjast hafa gaman af rekstri og að hafa mikið umleikis. Engan bilbug er að finna á þeim sökum aldurs, sem þau segja afstætt fyrirbrigði. „Það hafa ýmsir verið að spyrja okkur hvort við ætluðum ekki að fara að hætta rekstri. Svarið er alltaf á eina lund; að það standi ekki til og ég lít á það sem lífsstíl að stunda rekstur. Fólk á því að virða lífsstíl okkar. Við ólumst bæði upp við það frá æsku að fara strax að vinna fyrir okkur og taka virkan þátt í störfunum heima hjá okkur,“ segir Svava, en hún ólst upp á Refsstað í Vopnafirði en Unnsteinn er borinn og barnfæddur Borgnesingur og ólst upp í stórum hópi systkina. „Við lærðum því að fara fljótt að vinna. Frá því ég var 27 ára hef ég unnið við ferðaþjónustu. Lengst var ég á Vopnafirði með hótelið en síðar starfaði ég m.a. á Hótel Glymi, Hótel Borgarnesi og í tíu sumur með veiðihúsið við Haukadalsá í Dölum. Árið 2006 kaupum við Unnsteinn svo Blómaborg hér í Borgarnesi og breyttum nafninu í Blómasetrið. Keyptum svo fljótlega húsið sem m.a. hýsti gömlu sýsluskrifstofuna og höfum verið hér síðan.“

*Sýslumannssetrið við Helgugötu 5 í Borgarnesi.*

Þykir vænt um samfélagið
„Það er frumskilyrði í svona rekstri að hafa gott starfsfólk,“ segir Svava ákveðin og lætur vel af fólkinu sem hjá henni starfar – og bætir við: „Mannauðurinn er það dýrmætasta sem nokkurt fyrirtæki hefur. Svo hef ég alltaf lagt áherslu á það að láta mér líða vel í því nærsamfélagi sem ég er hluti af. Mér þykir þannig ótrúlega vænt um Borgarnes og Borgfirðinga og vill sjá samfélagið hér blómstra. Það er oft sagt að það þurfi heilt þorp til að ala upp eitt barn. Á sama hátt segi ég að það þurfi öflugt sveitarfélag og heilbrigt samfélag til að fyrirtækin hér nái að dafna og stunda kröftugan rekstur. Hér í Borgarnesi höfum við nokkur dæmi um harðduglega einstaklinga sem eiga sinn þátt í að hér er öflugt samfélag. Einstaklinga sem halda áfram að reka sín fyrirtæki þótt aldurinn hafi færst yfir. Sjáðu bara Pétur Geirsson á hótelinu og Eirík J. Ingólfsson húsasmið, sem dæmi. Samfélagið væri ekki samt ef svona karla nyti ekki við,“ segir Svava. Unnsteinn bætir því við að hann hafi þrátt fyrir veikindi fyrir nokkrum árum, verið óhræddur við það núna að taka tuttugu ára lán til að fjármagna kaupin á Sýslumannssetrinu. „Ég verð búinn að greiða upp lánið þegar ég verð 102 ára. Sjálfur stefni ég á að verða 106 ára og hef því ákveðið að lifa rólegu og skuldlausu lífi síðustu fjögur árin,“ segir Unnsteinn og hlær. Svava bætir því við að reksturinn gefi þeim vissulega tilefni til að hafa nóg fyrir stafni. „Unnsteinn hefur tilgang til að vakna á morgnana og fylgjast með því þegar ég er að stjórna fólkinu okkar. Svo tekur hann á móti gestum og er mjög viðræðugóður við þá sem hingað koma,“ segir Svava – og bætir við: „Það er ekki takmark hjá okkur að hanga heima. Hvað ætti ég svo sem að gera,“ spyr hún; „horfa á Unnstein horfa á sjónvarpið,“ segir hún og þau brosa til hvort annars.

Komið á húninn klukkan 8
Reksturinn hjá þeim hjónum hefur gengið vel undanfarin ár og byggist það væntanlega á jákvæðri umsögn sem gestir þeirra hafa verið að gefa. Þau eru að fá mjög góða umsögn á Trip Advisor, gistingin er með 9,8 í einkunn og kaffihúsið yfir níu. „Nútíma markaðssetning byggir á orðspori. Við fórum ágætlega út úr Covid, lokuðum bara eins stutt og stjórnvöld fyrirskipuðu og lögðum áherslu á að hér væri einhverja þjónustu að fá. Það datt því ekki langur tími út vegna heimsfaraldursins þótt staðirnir í kringum okkur væru margir lokaðir. Kaffihúsið hjá okkur er núna opið alla daga frá klukkan 8 til 20 og suma daga er nánast fullt frá morgni til kvölds. Strax og við opnum er fólk komið hingað í kaffi, ýmist akandi, aðrir úr gistingunni eða af öðrum gististöðum í Borgarnesi.“

Svava rifjar upp að ung í rekstri lærði hún ákveðna lexíu. „Til dæmis að sýna viðskiptavinum að þú sért traustsins verð. Í gamla daga þegar ég var með hótelið á Vopnafirði kom Kjartan Lárusson og fleiri frá Sambandi veitinga- og gistihúsa og var með fræðslu fyrir okkur sem þá vorum byrjuð að stunda ferðaþjónustu. Mér er minnisstætt þegar hann sagði við okkur; „ef þið auglýsið að það sé opið, þá standið við það.“ Það á aldrei að flakka með opnunartíma og svo lagði hann áherslu á þrautseigju, þolinmæði og bros. Í dag finnst mér allt of mikið um það að fólk hafi ferðaþjónustustaði opna þegar því hentar, loki í tíma og ótíma. Í greinina vantar því enn stöðugleika. Ef þú hins vegar sýnir þennan stöðugleika, þá verða viðskiptavinirnir ánægðir og gefa þér jákvæða umsögn.“

*Lögð er áhersla á notalegt umhverfi á Kaffi kyrrð.*

Notalegt umhverfi
Svava Víglundsdóttir kveðst mjög bjartsýn á framtíð ferðaþjónustu hér á landi og segist sjálf elska að mæta til vinnu alla morgna. „Þegar ég opnaði Blómasetrið Kaffi Kyrrð var ég staðföst í að það yrði aldrei þrennt á þeim stað. Í fyrsta lagi ætlaði ég aldrei aftur að reka bar, í öðru lagi ekki hafa sjónvarp á staðnum og svo ætlaði ég ekki að fara að reka matsölustað með kokki og risastóru eldhúsi. Ég hef staðið við öll þessi atriði. Við bjóðum hér upp á léttan matseðil með kaffi, brauði, salati og kökum. Svo leggjum við áherslu á að vera með notalegt umhverfi, góða stóla og þægilega sófa, þannig að fólki líði vel í okkar umhverfi. Þessi þjónusta hefur verið að gera sig, allavega erum við með átta starfsmenn og það er nóg að gera hjá okkur,“ segir Svava að endingu.

mm

*Vegfarendum um Skúlagötu dylst ekki að þarna er rekið kaffihús.*

Auka við reksturinn og bæta Sýslumannssetrinu við

Rætt við Svövu og Unnstein í Blómasetrinu Kaffi Kyrrð í Borgarnesi

Rætt við Svövu og Unnstein í Blómasetrinu Kaffi Kyrrð í Borgarnesi