medium

large

thumbnail

1536x1536

2048x2048

small

custom-size

ÍATV getur ekki lengur streymt leikjum kvennaliðs ÍA

Hildur SH fékk veiðarfærin í skrúfuna

Samtökin Sól til framtíðar formlega stofnuð

Héldu samráðsfund Öruggara Vesturlands í Borgarnesi

Ráðgjafi VÍS nú til staðar í útibúi Íslandsbanka á Akranesi

Jörð skalf undir Grjótárvatni snemma í morgun

core/paragraph

ÍA tók á móti liði Smára í 2. deild kvenna í knattspyrnu í gærkvöldi og var leikurinn í Akraneshöllinni. Leikurinn var styrktarleikur fyrir fjölskyldu Violetu Mitul leikmanns Einherja sem lést af slysförum um síðustu helgi. Leikmenn beggja liða, dómarar og flestir hinna 192 áhorfenda á leiknum, lögðu sitt af mörkum og komu 398 þúsund krónur inn í söfnunina á leiknum. Frábært framtak og Knattspyrnufélag ÍA hvetur einnig önnur lið til þess að gera slíkt hið sama og sýna í verki hvað fótboltasamfélagið á Íslandi getur verið fallegt. „Við erum hrærð yfir þessum viðbrögðum og sendum okkar hjartans kveðjur til allra sem lögðu söfnuninni lið og innilegar samúðarkveðjur til fjölskyldu og vina Violetu Mitul,“ segir á FB síðu KFÍA.

ÍA komst yfir strax á þriðju mínútu þegar fyrirliðinn Bryndís Rún Þórólfsdóttir fékk boltann fyrir utan teig og átti hörkuskot sem markvörður Smára réði ekki við. Aðeins fjórum mínútum síðar var Samira Suleman leikmaður ÍA með boltann fyrir utan vítateiginn í smá klafsi og lét loks vaða af um 25 metra færi á markið og knötturinn söng í netinu. Afar góð byrjun hjá heimakonum og Erna Björt Elíasdóttir bætti síðan við þriðja markinu tíu mínútum fyrir hálfleik. Vala María Sturludóttir átti þá fyrirgjöf af vinstra kanti beint á Ernu Björt sem afgreiddi boltann smekklega með ristinni upp í markskeytin. Staðan 3-0 fyrir ÍA í hálfleik og ljóst að gestirnir áttu ekki von á góðu í seinni hálfleik.

Varnarmaðurinn Jaclyn Poucel skoraði síðan fjórða mark ÍA fljótlega í seinni hálfleik eftir hornspyrnu þegar boltinn datt fyrir hana í markteignum og hún lagði hann með vinstri í netið. Sjö mínútum síðar sendi Róberta Lilja Ísólfsdóttir háan bolta á fjærstöng og þar var Vala María Sturludóttir á réttum stað og setti hann með föstu skoti í netið. Það er óhætt að segja að Skagakonur hafi skipt systralega á milli sín mörkunum í leiknum því Ylfa Laxdal Unnarsdóttir skoraði sjötta og síðasta mark ÍA í uppbótartíma. Bryndís Rún sendi þá góða sendingu yfir vörnina á fjær og þar var Ylfa mætt og afgreiddi boltann í mark gestanna. Lokatölur 6-0 fyrir ÍA og þær komu sér í afar góða stöðu fyrir síðustu umferðina í deildinni sem fram fer um aðra helgi.

Staðan í deildinni er nú þannig að ÍR eru í efsta sæti með 42 stig og ÍA í öðru sæti með 38 stig og hafa bæði lið leikið 19 leiki. Síðan koma Haukar og Völsungur með 34 stig og Fjölnir og Einherji eru með 33 stig en þessi lið hafa öll leikið 18 leiki. Um helgina spila til að mynda Haukar og Völsungur og Fjölnir og ÍR en leik Einherja og Álftaness hefur verið frestað. Það skýrist því líklega ekki fyrr en laugardaginn 16. september hvaða lið fylgir ÍR upp í Lengjudeildina á næsta tímabili. Þar mætir ÍA liði Álftaness syðra og nægir að vinna þann leik til að komast upp um deild. Það er því spennandi vika fram undan í einni mest spennandi deild Íslandsmótsins og fróðlegt að fylgjast með hvernig fer.

Fréttaveita Vesturlands

Skagakonur með stórsigur á Smára í styrktarleik