“Ég sakna mest þegar ég var ung, bjartsýn og áhyggjulaus,” segir Greta María Árnadóttir í Stykkishólmi sem er gestur í yfirheyrslu vikunnar í Skessuhorni að þessu sinni:

Nafn: Greta María Árnadóttir

Hvar ertu fædd og hvenær? Ég fæddist á Landspítalanum á jóladag árið 1985, við bjuggum þá á Leifsgötu í Reykjavík.

Hvernig myndir þú lýsa þér í þremur orðum? Hjartahlý, fagurkeri og forvitin, svona til að einblína á góðu hliðarnar.

Áttu gæludýr? Við erum ekki með nein gæludýr á heimilinu eins og er. Okkur langar mikið í hund þegar það er rétti tíminn til þess. Mig hefur alltaf dreymt um að eiga hest en ég veit nú ekki hvort það komi einhvern tímann að því.

Hvers saknarðu mest frá því í gamla daga? Frelsið við það er vera ung, bjartsýn og áhyggjulaus.

Hvað færðu þér ofan á pizzuna þína? Það fer alveg eftir hvaða skapi ég er í ef við gerum pizzu hvað fer á hana. Mér finnst voðalega gott að gera mexíkó pizzu með kjúklingi, lauk og sterkum kryddum, Parmaskinku pizzu með klettasalati og parmesan osti eða jafnvel kartöflu pizzu með beikoni og rósmarín.

Hvað er uppáhalds nammið þitt? Allt með lakkrís finnst mér gott og dökkt súkkulaði.

Hvaða tungumál værir þú til í að kunna? Ég væri til í að kunna ítölsku og ferðast um þar.

Hvað er það skemmtilegasta sem þú gerir? Það skemmtilegasta sem ég geri er að vera með fjölskyldunni minni.

Ertu hjátrúarfull? Nei, svo sem ekki en ég hef gaman af hjátrú og verð að viðurkenna að stundum þori ég ekki öðru en að trúa henni. Þannig að jú, ég hlýt að vera eitthvað hjátrúarfull.

Hvað myndi bíómynd um þig heita? Eat, laugh, love.

Hver er uppáhalds mánuðurinn? Mér finnst svo æðislegt þegar árstíðirnar breytast en uppáhalds mánuðurinn er örugglega desember. Það er svo mikil gleði alls staðar og ævintýralegur mánuður. Og hvenær fær maður annars að vera með lifandi tré í stofunni?

Hvað ertu mest hrædd við? Ég er mjög lofthrædd og get orðið það við að fara bara upp í stiga. Eitt af því sem ég hef mestar áhyggjur af er að fólki í kringum mig líði ekki vel.

Hver er uppáhalds skyndibitinn? Djúpsteiktur kjúklingur.

Hver er uppáhalds staðurinn þinn á Íslandi? Flatey, þar kynntist ég kærastanum mínum fyrir ellefu árum síðan. Ég á margar góða minningar þar um góða tíma og svo er þetta falleg eyja og falleg sigling þangað.

Hver er minnisstæðasta gjöfin sem þú fékkst þegar þú varst lítil? Ég man held ég best eftir kanínubangsa sem mamma og pabbi gáfu mér ein jólin. Hann var hvítur í bleikum fötum og með baunir í rassinum svo hann gæti setið. Þetta var uppáhalds bangsinn minn í mörg ár.

Ef þú þyrftir að velja þér nýtt nafn hvað yrði þá fyrir valinu? Ég mundi ekki vilja neitt annað nafn þar sem ég er nefnd eftir ömmu minni sem átti mjög stóran hlut í hjarta mínu og sem ég sakna á hverjum degi.

Hvað ætlaðir þú að verða þegar þú yrðir stór? Það var margt sem mig langaði að verða, meðal annars tannlæknir, leikari og fatahönnuður.

Vandræðalegasta augnablikið? Þau hafa eflaust verið nokkur en ég reyni nú bara að gleyma þeim fljótt aftur. Ég get þó sagt frá einu sem gerðist í sumar. Ég var í sumarbústað með fjölskyldu minni og var á leið í heita pottinn þegar það er sagt við mig að sundbolurinn minn sé nú orðinn slitinn. Ég beygi mig niður til að sýna svilkonu minni að hann sé eitthvað slitinn aftan á og hún tekur mynd til að sýna mér. Ég bara sprakk úr hlátri þegar allur rassinn á mér blasti við mér og ég fór að hugsa að ég hefði kannski verið svona í sundlauginni heima!

Hvar sérðu þig eftir tíu ár? Eftir tíu ár verð ég með mína eigin verslun og skapandi verkstæði, annað hvort í Stykkishólmi eða Reykjavík. Við verðum með hund og ferðumst mikið um Ísland og út í heiminn og upplifum nýja hluti.

Greta María í yfirheyrslu vikunnar