Um fjögur hundruð nemendur stunda nú nám við Landbúnaðarháskóla Íslands

Landbúnaðarháskóli Íslands býður upp á nám á framhaldsskólastigi og háskólastigi. Aðalstarfsstöðin er á Hvanneyri í Borgarfirði en einnig er starfsstöð á Keldnaholti í Reykjavík. Nám við skólann er tilvalið fyrir þau sem hafa áhuga á náttúru Íslands, umhverfismálum, skipulagi, sjálfbærni, búvísindum og matvælaframleiðslu. Sérsvið skólans snýr að matvælaframleiðslu, sjálfbærri nýtingu auðlinda ásamt hönnun og skipulagi þéttbýlis og dreifbýlis.

Rósa Björk Jónsdóttir er kynningarstjóri Landbúnaðarháskólans. Blaðamaður Skessuhorns heyrði í henni til að forvitnast um skólann og skólastarfið sem fram undan er. Kennsla hófst mánudaginn 21. ágúst og segir Rósa Björk að starfið fari vel af stað. Nemendur eru um 400 en það er svipaður fjöldi og undanfarin ár. „Það varð mikil aukning í kjölfar covid faraldursins og hefur fjöldi nemenda haldist stöðugur síðan. Um helmingur nemenda er í staðnámi og hinn í fjarnámi. Sum eru í dagnámi en búa til dæmis á Akranesi eða í Reykjavík þannig að það eru alltaf einhver sem ekur á milli en önnur nýta sér að vera í fjarnámi. Til dæmis þau sem búa hinum megin á landinu.“

Rósa Björk segir að það sé aðeins annað kerfi hjá Landbúnaðarháskólanum en öðrum sambærilegum háskólum. „Hér er kennt á svokölluðum stuttönnum, þannig að skólavetrinum er skipt niður í fjórar sjö vikna annir, tvær annir að hausti og tvær að vori. Eftir hverja önn eru ein til tvær prófavikur. Þá ljúka nemendur við ákveðin námskeið á styttri tíma og klára áður en farið er í næstu námskeið. Fjarnemarnir koma í svokallaðar staðarlotur þar sem er skyldumæting og eru skipulagðar tvisvar á hverri stuttönn. Innan þessarra vikna eru verklegar æfingar, ferðir og þátttaka í kennslu sem krefst viðveru.”

Nemendur á fyrsta ári læra handtökin við vegghleðslu í Hreppslaug ásamt hleðslumeistaranum Unnsteini Elíassyni sem leiðbeindi.

Búfræðin alltaf vinsæl
Í boði er nám í búfræði á framhaldsskólastig og búvísindi, hestafræði, landslagsarkitektúr, náttúru- og umhverfisfræði og skógfræði kennd á háskólastigi. Hverjar eru svona vinsælustu greinarnar? „Það er auðvitað alltaf fullt í búfræðina því það eru bara ákveðið mörg pláss í boði. Einnig er sérstaklega góð aðsókn í búvísindin og í landslagsarkitektúrinn í haust og enn er fólk að banka á dyrnar þótt skólaárið sé hafið.“

Skólinn er með tvær alþjóðlegar meistaranámsbrautir en í haust fór af stað ný alþjóðleg námsbraut um endurheimt vistkerfa. „Námið er til tveggja ára og veitir alþjóðlega innsýn og þekkingu á sviði vistheimtarfræði og hagnýta þjálfun í aðferðafræði endurheimtar. „Hún er kennd á ensku og er meirihluti nemenda erlendis frá. Þetta er mjög spennandi ný braut sem verður gaman að sjá hvernig þróast á næstu árum,“ segir Rósa Björk. „Auk þess bjóðum við upp á aðra alþjóðlega meistaranámsbraut um loftlagsbreytingar á norðurslóðum og er hún núna kennd í fjórða skiptið.“ Rósa Björk segir að um 30 nemendur stundi nám hjá þeim á þessum alþjóðlegu brautum. „Á haustönn tökum við einnig inn skiptinema sem flestir koma frá evrópskum samstarfsháskólum og er mikil aðsókn í að koma til okkar í skiptinám. Í haust komu yfir 20 nemar sem bætast við á nemendagörðum og er háskólasamfélagið því mjög alþjóðlegt.“

Hvaðan koma nemendur af landinu og hvað eru margir nemendur á nemendagörðunum? „Í raun og veru alls staðar af landinu, bæði höfuðborgarsvæðinu og af landsbyggðinni. Stundum koma tímabil þar sem fleiri koma frá einum stað en öðrum. Á Hvanneyri eru nemendagarðar og það er mjög góð aðsókn í þá. Í haust búa um 150 nemendur á görðunum og er öll aðstaða þar til fyrirmyndar.“

Erlendir nýnemar og skiptinemar á leið í göngu um háskólasvæðið á Hvanneyri.

Mjög öflugt félagslíf
Við háskólann starfa um 90 manns í föstu starfi og svo bætast við stundakennarar. En hvernig er félagslífið? „Það er frekar öflugt félagslíf hérna. Við segjum oft í gríni að það verði til alls konar sambönd, hjónabönd, vinabönd til æviloka og jafnvel börn! Svo er gaman að segja frá því að nú er til dæmis þriðja kynslóð nemenda að koma í skólann, þannig að mömmur og pabbar og ömmur og afar þeirra eru búin að stunda hér nám, sérstaklega í búfræðinni. Það er nemandi hérna núna sem er að koma aftur í nám hjá okkur í náttúru- og umhverfisfræði sem var hér í námi 1997 í búfræði og bjó á heimavistinni, þannig að þetta getur farið í svona skemmtilega hringi.“

Rósa Björk segir að lokum að þau horfi björtum augum fram á veginn og séu að sækja fram á ýmsum stöðum, í rannsóknum og í eflingu kennslu og í bættri aðstöðu og aðgengi fyrir nemendur. „Það er svona okkar markmið, hér eru falin tækifæri. Það fer ekki mikið fyrir okkur en við erum mjög öflug í fræðasamfélaginu. Nemendur fá öðruvísi nálgun, þeir geta verið steinsnar frá höfuðborginni en samt úti í náttúrunni. Svo sinnum við brýnustu málefnunum sem snúa að því að framleiða matvæli framtíðarinnar, nýta auðlyndir náttúrunnar á sjálfbæran hátt og búa okkur sífjölgandi mannfólki og framtíðarkynslóðum gott umhverfi að búa í,“ segir Rósa Björk að lokum.

vaks / Ljósm. aðsendar

Nemendur að loknum fyrsta skóladegi á Hvanneyri.

Fyrsta vettvangsferð nýrrar meistaranámsbrautar í endurheimtarfræðum. Áhugasamir nemendur ásamt kennara skoða mismunandi vistkerfi í nágrenni Hvanneyrar.

„Erum mjög öflug í fræðasamfélaginu“

Um fjögur hundruð nemendur stunda nú nám við Landbúnaðarháskóla Íslands

Um fjögur hundruð nemendur stunda nú nám við Landbúnaðarháskóla Íslands