Fyrsta haustlægðin gekk yfir landið um helgina. Gul viðvörun var vegna hvassviðris á föstudagskvöld og fram á laugardagsmorgun. Þá var sömuleiðis varað við flóðahættu í ljósi þess að óvenjulega stórstreymt var samhliða komu lægðarinnar. Björgunarsveitir voru á föstudagskvöldið kallaðar út til að koma í veg fyrir foktjón. Til dæmis fór Björgunarfélag Akraness til aðstoðar á Mánabraut á Akranesi þar sem þakplötur voru teknar að losna.

Í gær hélt hvassviðrið áfram en vindátt varð vestanstæðari. Þá reyndust hús við Vesturgötu á Akranesi í hættu, en á laugardagskvöld gekk sjór yfir grjótvarnargarðinn við Krókalón og inn í nærliggjandi húsagarða. Mest var vatnshæðin og grjótburðurinn við hús númer 111 og 113b við Vesturgötu þar sem sjór fór yfir varnargarðinn og vatn flæddi í kjallara húsanna. Dæla þurfti úr kjallara og hreinsa frá niðurföllum sem engan veginn höfðu undan. Garðveggur og grasflatir eru illa farnar eftir atganginn. Við þessi hús er varnargarðurinn of lágur og segja íbúar að margsinnis hafi verið bent á hættuna og óskað eftir því við Vegagerðina og bæjaryfirvöld að grjótgarðurinn verði hækkaður. Þarna fylgir hæð grjótgarðsins landslaginu en ekki sjávarstöðu og dugar því engan veginn til varna. Meðfygjandi myndir eru teknar úr garðinum við Vesturgötu 113b í morgun.

Varnargarður of lágur og flæddi í kjallara húsa