Yfirheyrslan er fastur liður í Skessuhorni. Gestur í henni að þessu sinni er Ingi Björn Róbertsson, blikksmiður og uppistandari á Akranesi.

Nafn: Ingi Björn Róbertsson

Hvar ertu fæddur og hvenær? Ég er fæddur á Sjúkrahúsinu á Akranesi 19. maí 1989.

Hvernig myndir þú lýsa þér í þremur orðum? Iðinn, orðheppinn og æðrulaus.

Áttu gæludýr? Nei.

Hvers saknarðu mest frá því í gamla daga? Plaströrum í drykki sem verða ekki að einhverju mauki og góðum ruslapokum sem rifna ekki.

Hvað færðu þér ofan á pizzuna þína? Ég borða í raun hvað sem er á pizzu. En ég bjó einu sinni til þessa pizzu, hún var geggjuð. Pepperoni, rjómaostur, pikklað chili, jalapeno, ananas. Toppað með chili mæjó.

Hvað er uppáhalds nammið þitt? Villiköttur eða þristur. Annars lifi ég í þeirri blekkingu að ég borði ekki nammi en fæ mér samt alltaf þegar það er í boði.

Hvaða tungumál værir þú til í að kunna? Væri til í að geta talað mörg því ég hef svo gaman að því að tala við fólk.

Hvað er það skemmtilegasta sem þú gerir? Borða góðan mat með góðum vinum. Líka smíða og brasa eitthvað.

Ertu hjátrúarfullur? Nei. Ég myndi ekki muna allt og hvenær ég ætti að vera það.

Hvað myndi bíómynd um þig heita? Barn úr Borgarnesi. Á ensku væri það Small Town Kid. Myndin væri svona blanda af Harry Potter og Ace Ventura. En gerist á Hernámsárunum í svona Quentin Tarantino stíl.

Hver er uppáhalds mánuðurinn? Júlí, reyndar bara af því það var svo gott veður í júlí, annars er ég maí maður.

Hvað ertu mest hræddur við? Að eitthvað komi fyrir börnin mín. Og líka að ég myndi missa húmorinn, það væri hræðilegt.

Hver er uppáhalds skyndibitinn? Hamborgarabúlla Tómasar.

Hver er uppáhalds staðurinn þinn á Íslandi? Húsafell.

Hver er minnisstæðasta gjöfin sem þú fékkst þegar þú varst lítill? Reiðhjól.

Ef þú þyrftir að velja þér nýtt nafn hvað yrði þá fyrir valinu? Ég myndi velja nafnið Viðar Engilbertsson og svo væri ég alltaf að nöldra á facebook og skrifa greinar í blöð.

Hvað ætlaðir þú að verða þegar þú yrðir stór? Ég ætlaði held ég bara að verða maðurinn hennar mömmu, það gekk ekki upp.

Vandræðalegasta augnablikið? Þegar ég keyrði af stað þegar ég var að taka bensín og reif dæluna frá. Fattaði svo að ég hafði gert það þegar þær hringdu í mig frá N1 og spurðu hvort ég hefði verið að taka bensín, þá var ég kominn vel á veg frá Akranesi.

Hvar sérðu þig eftir tíu ár? Ég verð sennilega að brasa eitthvað og segja mjög lélega pabbabrandara.

Hræðilegt ef ég myndi missa húmorinn