Rætt við Kim Klöru Ahlbrecht og Daniel Þór Ágústsson sem bæði eru ljósmyndarar og eigendur Blik Studio á Akranesi

Kim Klara Ahlbrecht og Daniel Þór Ágústsson eiga og reka ljósmyndastofuna Blik Studio á Akranesi. Stofuna opnuðu þau í ársbyrjun 2020 og var hún fyrst um sinn staðsett á Stillholti 23. Undir lok árs 2020 festu þau kaup á íbúð við Sandabraut 4 á Akranesi og umbreyttu bílskúrnum í ljósmyndastúdíó. Blik Studio er eina ljósmyndastofan á Akranesi og segjast þau Kim og Daniel einkar þakklát fyrir viðtökurnar sem þau hafa fengið. Stór hluti viðskiptavina þeirra eru bæjarbúar sem margir hverjir koma aftur og aftur. Kim og Daniel hafa getið sér gott orð sem brúðkaupsljósmyndarar og hafa þá sérstöðu að þau vinna tvö saman og missa með því móti ekki af neinu teljandi augnabliki og geta að lokum skilað nákvæmri sögu dagsins í formi ljósmynda.

Einkasonur þeirra Kim og Daniels heitir Finnur og er nýorðinn tveggja ára. Óhætt er að segja að hann sé ljós augna þeirra og hefur tilkoma hans m.a. gefið þeim aðra sýn á ljósmyndun. Hvert augnablik hefur nú meira vægi en áður. Blaðamaður leit við á Sandabrautinni morgun einn í liðinni viku og forvitnaðist um tilurð og rekstur Blik Studio og hæfileikaríku ljósmyndarana sem standa að baki því.

*Finnur í jólamyndatöku í stúdíóinu, 1,5 árs.*

Kynntust í sérnámi í ljósmyndun

Kim er uppalin á Akranesi frá sjö ára aldri. Þá fluttist hún, með foreldrum sínum, til Íslands frá Þýskalandi hvar hún hafði búið sín fyrstu sjö ár en faðir hennar, Peter Ahlbrecht er Þjóðverji. Móðir Kim er Anna Guðrún Ahlbrecht Benediktsdóttir.

Daniel er fæddur og uppalinn í Kópavogi og lágu leiðir þeirra Kim saman árið 2017 þegar þau lögðu bæði stund á nám í ljósmyndun við Tækniskólann í Reykjavík. „Við kynntumst í náminu og urðum strax góðir vinir. Það var svo nokkru eftir útskrift vorið 2018 sem við verðum par og það sumar tökum við að okkur fyrsta brúðkaupsljósmyndaverkefnið okkar saman. Og þá var ekki aftur snúið og við höfum í raun búið og starfað saman síðan þá,“ segir Kim.

*Hjónavígsla á þjóðhátíðardegi Íslendinga, 17. júní 2022, í Skeiðflatarkirkju í Mýrdalshreppi.*

Af hverju ljósmyndun?

Daniel segir aldrei hafa komið annað til greina fyrir hann en að mennta sig og starfa við ljósmyndun. Hann hefur haft áhuga á ljósmyndun frá barnæsku. Fljótlega eftir fermingu var hann farinn að taka mikið af landslagsmyndum og fékk hrós úr nærumhverfi sínu fyrir myndirnar. „Mamma var dugleg að ferðast með okkur systur mína og fara með okkur í göngur í náttúrunni og þaðan kemur líklega inn áhugi minn á landslagi. Ég ætlaði ekkert endilega að fara í að taka myndir af fólki en það bara gerðist,“ segir Daniel sem fékk á unglingsaldri ýmis ljósmyndaverkefni t.a.m. fyrir fjölmiðla. Þá helst íþróttaljósmyndun, viðburðaljósmyndun og af og til fréttaljósmyndun.

„Það er svolítið skemmtilegt hvernig grunnur okkar Daniels mætist,“ skýtur Kim að og heldur áfram. „Daniel kemur úr landslagi og líka þar á móti þeim mikla hraða sem er í eins og íþrótta-, frétta- og viðburðaljósmyndun. En mín fyrstu verkefni voru ungbarnamyndatökur. Þar er enginn asi heldur skiptir máli að horfa vel og ná detailum. Við höfum svo pússað okkur saman og við byggjum alveg klárlega á þessum grunni þegar við myndum t.d. brúðkaup,“ segir Kim en brúðkaupsmyndatökur eru stór hluti verkefna Blik Studio.

*Brúðkaupsmyndataka undir Kálfstindum við Lyngdalsheiði.*

Alltaf haft auga fyrir list

Aðspurð um hvaðan áhugi hennar sjálfrar á ljósmyndun komi á Kim erfitt með að setja fingurinn á það. Hún hafi ekki stefnt jafnt og þétt í þá átt líkt og Daniel en vissulega þegar hún horfir til baka sér hún marga þætti sem hafa mótað sig og ef til vill ýtt undir að hún fetaði þennan veg. Má þar nefna að Anna Guðrún móðir Kim er innanhússarkitekt og talaði hún alltaf mikið við Kim um hönnun og fagurfræði. „Hún var dugleg að fara með mig á alls konar listasýningar, söfn og líka í leikhús þannig að auga mitt hefur alltaf verið vakandi fyrir list. Síðan þróaðist það út í að mig langaði að taka myndir af listinni og fallegum hlutum.

Ég á t.d. minningar af því að hafa ung verið heima hjá foreldrum mínum að stilla plöntum og öðru upp og taka myndir af fallegum römmum í fallegu ljósi,“ segir Kim og hlær. Hún hafi þó aldrei haft það í huga að verða ljósmyndari heldur sá hún fyrir sér að verða flugfreyja. „Mér fannst líka alltaf skemmtilegt að taka myndir á ferðalögum og gerði mikið af því þegar ég ferðaðist um heiminn að loknum framhaldsskóla. Það var svo við einhver tímamótin að ég var mjög heilluð af því að verða ungbarnaljósmyndari og sú hugmynd varð til þess að ég skráði mig í ljósmyndanámið,“ segir Kim.

Blik Studio verður til

Kim starfaði sem flugfreyja hjá Icelandair árin 2018 og 2019 samhliða því að taka að sér myndatökur. Þau Daniel voru þá farin að gera út á það að mynda saman brúðkaup og var ekki lengur tími aflögu til að fljúga. „Við bjuggum á þeim tíma í Vesturbænum en í lok árs 2019 vorum við búin að bóka nær allt næsta sumar í myndatökum og sá ég því ekki fram á að geta flogið lengur. Það var þá sem við ákváðum að flytja upp á Akranes og freista þess að opna hér ljósmyndastofu, enda ljósmyndaverkefnin að öðru leyti ekki bundin við ákveðið landsvæði. Okkur fannst orðið tímabært að hýsa ástríðu okkar á ljósmyndun og Blik Studio varð þá til,“ segir Kim.

„Við sáum fyrir okkur að þjónusta Akranes og nágrenni og okkur var mjög vel tekið. Við fórum fljótlega að taka auglýsingamyndir fyrir fyrirtæki hér á svæðinu og Daniel fór svo í framhaldinu að mynda fasteignir. Svo vorum við farin að taka á móti fjölskyldum í stúdíóið og bjóða upp á prentþjónustu. Brúðkaupin fóru svo að spyrjast út um allt svæðið og eiginlega bara um allt land,“ segir Daniel.

Augnablik sem líða hjá

Nafnið Blik Studio hefur margþætta þýðingu fyrir Kim og Daniel en það kemur úr orðinu augnablik. „Í okkar vinnu erum við að fanga augnablikið en blik þýðir líka ljósglæta og hefur tengingu í þýska orðið Augenblick,“ segir Kim og bætir við að þeim hafi fundist heldur erfitt að finna nafn. „En okkur fannst þetta heillandi. Þegar við ákváðum nafnið vorum við ekki búin að stofna fjölskyldu en í dag þykir okkur nafnið mjög viðeigandi og það hefur dýpri merkingu fyrir okkur þar sem hvert augnablik með drengnum okkar er svo dýrmætt.“

Daniel og Kim eru sammála um að tilkoma Finns inn í líf þeirra hafi haft mikil og jákvæð áhrif á það hvernig þau í dag nálgast ljósmyndunina. „Eftir að ég varð faðir, kann ég á nýjan hátt að meta fjölskyldudýnamík, börn og það sem þeim fylgir. Ég veit hvernig myndir af Finni ég myndi sjálfur vilja og hvað situr eftir,” segir Daniel og Kim bætir við. „Ég tengi einnig við þetta í ljósmyndun nýbura. Nú hef ég sjálf átt ungabarn og vinnan í kringum ungabörnin og fjölskyldur þeirra á fyrstu dögum nýs lífs hefur nú mun dýpri merkingu fyrir mig. Ég er til dæmis farin að nota foreldra mun meira í myndatökunum núna, sem bakgrunn, af því ég sjálf kann mjög að meta myndirnar af okkur Daniel með Finni frá fyrstu dögunum hans. Svo eru öll þessi litlu smáatriði sem breytast fljótt og stundir sem líða hjá; litlu fingurnir, fellingarnar, húðin þeirra og mjúku hárin, þetta fiður sem er bara í nokkra daga og svo fer það. Öll þessi atriði sem manni finnast svo dýrmæt. Ég reyni að spegla mig í foreldrum eftir bestu getu og skila af mér tímalausum myndum sem hitta beint í hjartastað.“

Öll ljósmyndunarverkefni

Eins og áður segir hófst samstarf Kim og Daniels á því að mynda saman brúðkaup en það kom óvænt upp í hendurnar á þeim. „Það gekk mjög vel og okkur fannst þetta mjög gefandi og skemmtilegt. Við höfum myndað um 50 brúðkaup síðan þá og ferðast á milli landshluta til þess að vera með brúðhjónum á stóra deginum þeirra og höfum einnig myndað mörg brúðkaup hér í nágrenninu. Og alltaf finnst okkur jafn yndislegt. Okkur langar að nota tækifærið hér og koma á framfæri þakklæti til Skagamanna fyrir að leyfa okkur að vera með og fyrir að láta orðið sífellt berast. Það er okkur ótrúlega mikilvægt og er í raun okkar besta auglýsing,“ segir Kim.

Blik Studio tekur að sér öll ljósmyndunarverkefni, hvort sem það eru starfsmanna- og auglýsingamyndir eða að mynda fjölskyldur, ungabörn, fæðingar, brúðkaup, veislur, fasteignir, viðburði og hvað annað. „Við erum sérhæfð í augnablikum, og öllu sem tengist þeim,“ segir Daniel.

Fjölskyldumyndir eru mikilvægar

Fjölskyldumyndatökur hafa alltaf verið vinsælar hjá Blik Studio en nýlega fóru þau að leggja meiri áherslu á að bjóða upp á stórfjölskyldumyndatökur sem hefur verið mikil eftirspurn eftir. Þar kemur öll stórfjölskyldan saman, amma og afi eða langamma og langafi með alla sína afleggjara. Hægt er að taka myndirnar heima í stofu, úti í náttúrunni eða í stúdíóinu sjálfu. „Stórfjölskyldumyndir eru mikilvægar fyrir söguna,“ segir Daniel og Kim skýtur inn í: „Það getur verið skemmtileg og þýðingarmikil útfærsla að hafa myndatökuna heima hjá ömmu og afa. Margir muna lyktina og stemninguna heima hjá þeim og þá hafa myndirnar jafnvel enn meira gildi fyrir afkomendur.“

Að lifa sem ljósmyndari

Sem stendur vinnur Kim hlutastarf sem leiðbeinandi á leikskóla meðfram ljósmynduninni en Daniel starfar eingöngu fyrir Blik Studio. Segjast þau stefna að því að geta með tíð og tíma bæði unnið fullt starf við fyrirtækið sitt en ljósmyndun er tarnavinna og því er stundum mikið að gera og stundum lítið. „Það er mikilvægt að skipuleggja vel fram í tímann. Janúar og febrúar eru yfirleitt rólegir mánuðir en svo koma fermingarnar, stúdentamyndatökur og brúðkaup og fyrir jólin eru bæjarbúar og fólk annars staðar að duglegt að koma til okkar í myndatökur. Við erum að fá margar fjölskyldur til okkar í stúdíóið fyrir jól sem er alveg frábært,“ segir Daniel. „Svo fæðast ungabörn allt árið um kring og Daniel myndar fasteignir fyrir fasteignasölur hér í bænum svo það eru verkefni sem við göngum í óháð árstíma,“ segir Kim.

Vilja vaxa og dafna

Hvað framtíð Blik Studio varðar eru Kim og Daniel uppfull af hugmyndum og er áhugi þeirra og ástríða á faginu áþreifanleg. „Við erum í sífelldri framþróun og hugmyndavinnu með fyrirtækið og við vinnum jafnt og þétt að því að vera sýnileg á samfélagsmiðlum. Bæði erum við á Facebook og Instagram og með vefsíðuna blikstudio.is þar sem við erum með sýnishorn af okkar myndum og erum einnig farin að setja inn brúðkaupsblogg. Það væri draumur að opna einn daginn stúdíó í miðbæ Akraness þar sem við gætum verið með fastan opnunartíma, boðið upp á kaffi og víkkað þjónustustig okkar út í karton, innrömmun og fleira. Svona sjáum við fyrir okkur að Blik Studio vaxi og dafni á nýjan hátt og verði partur af ímynd miðbæjarins á Akranesi,“ segir Kim.

„Við erum sérhæfð í augnablikum“