Það var nóg að gera hjá kylfingum á Vesturlandi um síðustu helgi sem tóku þátt í sveitakeppni í golfi víðs vegar um landið. Keppnin fór fram frá föstudegi til sunnudags og er einn af hápunktum sumarsins hjá kylfingum.

Íslandsmót golfklúbba í 2. deild karla var haldið á Garðavelli á Akranesi og tóku alls átta klúbbar þátt. Í undanúrslitum mættust GSE og Leynir og Esja og GSS. Í úrslitum mættust síðan GSE og Esja þar sem Golfklúbbur Setbergs tryggði sér 3-2 sigur í spennandi viðureign. Golfklúbburinn Leynir frá Akranesi varð í þriðja sæti og Golfklúbbur Fjallabyggðar féll í 3. deild. Á Hamarsvelli í Borgarnesi fór fram keppni í 2. deild kvenna þar sem Golfklúbbur Selfoss tryggði sér sæti í fyrstu deild, Golfklúbbur Leynis varð í fjórða sæti og Golfklúbbur Borgarness í því fimmta en alls tóku níu lið þátt..

3. deild karla fór fram á Katlavelli á Húsavík og þar voru átta lið skráð til þátttöku. Golfklúbbur Bolungarvíkur sigraði Golfklúbb Borgarness í úrslitaleiknum um sæti í 2. deild að ári. Golfklúbbur Húsavíkur varð í þriðja sæti og Golfklúbburinn Geysir féll í 4. deild.

Á Víkurvelli í Stykkishólmi var 4. deild karla haldin og voru átta lið skráð til keppni. Golfklúbburinn Mostri úr Stykkishólmi og Golfklúbbur Grindavíkur léku til úrslita þar sem Mostri hafði betur 2-1. Golfklúbbur Sandgerðis endaði í þriðja sæti, Golfklúbburinn Vestarr úr Grundarfirði endaði í 7. sæti og Golfklúbbur Siglufjarðar féll í 5. deild.

Keppni í 5. deild karla fór fram á Silfurnesvelli á Höfn í Hornafirði og tóku alls sjö golfklúbbar þátt. Golfklúbburinn Jökull frá Ólafsvík sigraði Golfklúbb Hornafjarðar í úrslitaleiknum um sæti í 4. deild að ári. Golfklúbbur Álftaness varð í þriðja sæti.

Golfklúbburinn Esja er skipaður kylfingum af Snæfellsnesi.

Íslandsmót golfklúbba fór fram um helgina