ÍA og Völsungur áttust við í 2. deild kvenna í knattspyrnu á laugardaginn og var leikurinn á Norðurálsvelli á Akranesi. Toppbaráttan í deildinni er afar spennandi og eins og staðan er núna eru átta lið af ellefu að berjast um þessi tvö sæti sem gefa þátttökurétt í Lengjudeildinni á næsta ári. Skagakonur voru með yfirhöndina í fyrri hálfleik, þær voru miklu betri en náðu ekki að nýta fjölmörg færi sem þær fengu. Eina færi gestanna í fyrri hálfleik varði markvörður ÍA, Lucia Rodriguez, á ótrúlegan hátt en staðan markalaus í hálfleik.