Hin fjölskylduvæna Hvanneyrarhátíð verður haldin laugardaginn 12. ágúst nk. frá klukkan 13:30 til 17 á Hvanneyri. Þennan dag taka heimamenn vel á móti gestum og gangandi með fjölbreyttri dagskrá. Upphaf hátíðarinnar má rekja til Safnadagsins sem Landbúnaðarsafn Íslands tók þátt í og bauð þá velunnurum sem og gömlum nemendum að koma á Hvanneyri og kíkja á safnið, sér að kostnaðarlausu, og hitta gamla félaga og vini. Nú hefur Safnadagurinn verði færður til en Hvanneyrarhátíðin hefur staðið sem sér viðburður sem vaxið hefur fiskur um hrygg undanfarin ár og fjöldi gesta margfaldast á milli ára. Að morgni hátíðardagsins verður hátíðarmessa í Hvanneyrarkirkju klukkan 11:00.

Meðal dagskrárliða í ár verður keppni í akstursleikni að hætti Guðmundar Hallgrímssonar, opið fjós verður hjá Hvanneyrarbúinu, leiðsögn verður um Frúargarðinn, markaður verður í hlöðu Halldórsfjóss, náttúrufræðsluhorn sniðið að yngri kynslóðinni verður fyrir áhugasöm, Ungmennafélagið Íslendingur stendur fyrir leikjum og sprelli fyrir fólk á öllum aldri og tónlistarmennirnir Reynir del Norte og Torfi leika nokkur lög hvor fyrir sig í Hvanneyrarkirkju. Frá klukkan 14 til 16 mun Gunnhildur Lind ljósmyndari taka fjölskyldumyndir og á sama tíma verður frí andlitsmálun í boði fyrir börnin. Ef veður leyfir mun býflugnabóndinn Álfheiður Marinósdóttir segja gestum frá býflugunum sínum og opna búin og einnig verða gömul myndbrot sýnd frá sögu Hvanneyrar og Landbúnaðarháskóla Íslands. Þá mun matsala að venju vera á vegum Kvenfélagsins 19. júní og Skemmunnar kaffihúss.

Frír aðgangur verður að Landbúnaðarsafni Íslands, sýningin Konur í landbúnaði í 100 ár verður opin og ætla konurnar sem standa að Ullarselinu að leika listir sínar. Félagar í Fergusonfélaginu munu svo mæta á svæðið og stilla sínum glæsivögnum upp, ungum sem öldnum til gamans, ef veður leyfir. Klukkan 20 verður brekkusöngur í kirkjuhólsbrekkunni með Evu og Tóta sem lokar hátíðardeginum.

Allar nánari upplýsingar um hátíðina og dagskrá má finna á Facebook síðunni www.facebook.com/hvanneyrarhatid.

ás/ Ljósm. mm

Fjölbreytt dagskrá í boði á Hvanneyrarhátíð 12. ágúst