Kannað hversu auðvelt er að finna lausar íbúðalóðir á Vesturlandi

Mikil eftirspurn hefur verið eftir lausum lóðum í nágrenni höfuðborgarsvæðsins síðustu árin sem meðal annars hefur leitt til mikillar uppyggingar á Akranesi og nágrenni sem og fyrir austan fjall. Blaðamaður Skessuhorns ákvað að setja sig í spor ímyndaðrar fjölskyldu úr Reykjavík sem ekki þekkti neitt til en vildi setjast að á einhverjum fimm stærstu þéttbýlisstaða á Vesturlandi. Voru þeir staðir valdir sem eru yfir 800 íbúa markinu: Akranes, Borgarnes, Grundarfjörður, Ólafsvík og Stykkishólmur.

Byrjað var að fara inn á vefsíður til að leita upplýsinga um lóðaframboð, enda væri það líkleg leið einstaklinga til að fá góða yfirsýn. Tekið skal fram að framboð á lóðum í viðkomandi bæjum getur verið mismunandi á hverjum tíma svo það var ekki til skoðunar sem slíkt, heldur aðgengi fólks að upplýsingum um það.

Niðurstöður þessarar óformlegu könnunar eru athyglisverðar og hér á eftir fer samantekt um leit hinnar ímynduðu fjölskyldu. Blaðamaður gaf sér að þar væri rúmlega þrítug kona á ferð, hún væri smiður og byggingaverktaki og að Jói eiginmaður hennar væri jafngamall og leikskólakennari að mennt. Þau eiga þrjú börn á grunn- og leikskólaaldri og langar að flytja á Vesturland og byggja sér þar þak yfir höfuðið.

Akranes

Það er Jói sem fer í tölvuna til leitar því hann er heimavinnandi. Hann byrjar á Akranesi með því að slá inn akranes.is. Þar er tengilinn Lausar lóðir áberandi strax á forsíðu. Bent er þar á annan tengil sem ber heitið Yfirlitsvefur með lausum lóðum. Hér er komið inn á fjórskipta síðu:

Grænir iðngarðar í Flóahverfi
Sementsreitur
Skógarhverfi
Dalbraut

Góðar útskýringar eru við hvert heiti svo auðvelt er fyrir þann sem ekki þekkir til að átta sig á staðsetningum og gerð lóða. Enn fremur er gott yfirlitskort þar sem viðkomandi reitir eru dökklitaðir og greinilega merktir. Þarna er einnig hægt að smella á þjónustukort þar sem ungar fjölskyldur geta séð hvar skólastofnanir eru staðsettar svo dæmi sé tekið. Jói párar orðið Akranes á minnisblaðið sitt og gefur bænum einkunnina tíu.

Borgarnes

Næst er það Borgarnes. Jói slær inn borgarnes.is og sér þá að viðkomandi sveitarfélag heitir Borgarbyggð. Þarna er tengillinn Lausar lóðir strax á forsíðu. Þegar smellt er á hann kemur upp síða sem er m.a. með tengli inn á Lausar lóðir í Borgarnesi. En þá kemur í ljós að þar eru engar íbúðalóðir tilgreindar, aðeins athafnalóðir. Jói sér þó að hægt er að smella á kort sem ber heitið Sólbakki deilskipulagsuppdráttur og það vekur vonir. En þar undir er bara skjal frá Verkís um óverulegar breytingar á deiliskipulagi fyrir iðnaðarhverfi.

Jói var búinn að skrifa orðið Borgarnes á blaðið sitt, en nú strikar hann yfir það og setur töluna tvo. Svo þar með lýkur líklega leit Jóa og Öldu að byggingalóð í Borgarnesi.

Grundarfjörður
Næst ákveður Jói að skoða framboð á íbúðalóðum í stærri þéttbýlisstöðum á Snæfellsnesi og byrjar á bæ sem hann sér á korti að heitir Grundarfjörður. Hann slær inn grundarfjordur.is. Á forsíðunni þar er hvergi sjáanlegur tengill inn á lausar lóðir. En ef skrollað er alveg niður á botn hennar er hins vegar tengill merktur: Ertu að flytja til Grundarfjarðar? Þar er að finna gagnlegar upplýsingar sem snúa að væntanlegum íbúum svo sem um kalt vatn, rafmagn, leik- og grunnskóla, heilbrigðisþjónustu, sorpflokkun og fleira. En ekkert um lóðir.

En Jói vill ekki gefast upp, hann er búinn að sjá á myndum að bærinn er á fallegum stað. Svo hann fer aftur á forsíðuna og leitar betur. Þá sér hann tengil sem heitir „Umhverfið mitt“ og ákveður að smella á hann. Þar má sjá lið sem heitir Skipulags- og byggingamál og þar undir er tengill á lausar lóðir. Léttist nú brúnin á Jóa þótt smellirnir séu orðnir óþarflega margir. Upp kemur kort af bænum þar sem reitir með lausum lóðum eru rastaðir til auðkenningar. En því fylgir hins vegar ekki hvað eru íbúðarhúsalóðir og hvað iðnaðarlóðir. En þarna sér Jói yfirskrift: Lausar lóðir í Grundarfirði, og önnur lína þar undir er: Listi yfir lausar lóðir. Loksins! Hann smellir á þetta. Upp kemur excel blað með götuheitum, og götunúmerum auk fermetratölu lóða. Sum heimilisföngin eru merkt Ekki með afslætti og Jói veltir fyrir sér hvað það muni þýða. Hann ákveður að fara til baka og á tengilinn Yfirlit yfir lausar lóðir, mynd. Þá kemur aftur upp fyrrnefnt kort með röstuðum reitum. Hann hörfar og smellir á tengilinn Áhugaverðar lóðir í Grundarfirði: lausar lóðir og lóðir á leið í deiliskipulagsferli, júlí 2022. Jói veltir fyrir sér af hverju þetta skjal sé ársgamalt, en lætur það ekki á sig fá og smellir. Upp kemur mynd sem samanstendur af sex misstórum loftmyndum þar sem ímyndaðar byggingar eru teiknaðar inn í þrívídd. Myndirnar gefa nokkra vísbendingu um hverjar þeirra eru íbúðabyggingar en ekki er auðvelt fyrir Jóa að finna lóð með þessar upplýsingar í hendi. Svo hann smellir til baka og sér þá tengilinn Umsókn um lóð. Þar undir getur hann sett inn heimilsfang og krossað við hvaða gerð af húsi hann óskar eftir að byggja. En þetta hefur ekki verið auðvelt ferli. Jói ákveður að fá sér kaffi og gefur Grundarfirði einkunnina þrjá; þetta er hálfgerður frumskógur.

Ólafsvík
Næst ákveður Jói að skoða vænleika þess að þau flytji til Ólafsvíkur. Hann er hins vegar ekki kunnugur og veit því ekki hvaða sveitarfélagi bærinn tilheyrir. Svo hann ákveður að slá inn olafsvik.is í vafrann. En þá kemur þetta: This site can’t be reached. Svo nú er Jói í vondum málum og ákveður að slá inn Ólafsvík í vafrann. Það fyrsta sem þá kemur upp er Wikipedia, en tveimur línum neðar er hægt að sjá orðinu Ólafsvík bregða fyrir undir slóðinni snb.is Þangað skreppur Jói og sér að sveitarfélagið sem Ólafsvík er í hljóti að heita Snæfellsbær. Þegar þarna er komið er hvergi að sjá tengil fyrir lausar lóðir. En Jói gefst ekki upp og fer í stikuna efst, þar eru fjögur lykilorð: Þjónusta, mannlíf, stjórnsýsla og íbúagátt. Jói íhugar hvað af þessu gæti nú átt við lausar lóðir og leitar fyrst undir þjónusta. Jú þar er yfirskrift sem hann gæti fundið eitthvað undir: Skipulag. Jú, vissulega, sjötta lína er þessi: Lausar lóðir. Jói fyllist bjartsýni og smellir. Þar stendur: Í Snæfellsbæ eru margar vel staðsettar lausar lóðir til húsbygginga. Frekari upplýsingar er að finna á vefsíðu Tæknideildar. Þar undir er tengillinn Vefsíða Tæknideildar. Jói smellir á hann. Upp kemur þetta. Not Found. Jói gefst upp og skrifar töluna núll á blaðið.

Stykkishólmur
Nú er Jói orðinn dálítið efins um að þeim Öldu muni lítast á Snæfellsnesið. En Stykkishólmur er eftir, fallegur staður sem gaman væri að búa á. Hann slær inn stykkisholmur.is. Þar er tengillinn Lausar lóðir áberandi strax á forsíðu og hann smellir vongóður. Hér má finna reglur um úthlutun á lóðum fyrir íbúðar- og atvinnuhúsnæði stendur þar. Þarna er tengill: Vefsjá Stykkishólms. Upp kemur kort þar sem hægt er að krossa við Lóðir og skipulag og það gerir Jói glaðbeittur. Litaðir reitir birtast. Jói verður fyrst svolítið ringlaður en ákveður að fara dýpra til að finna sér lóð. Upp koma litaðir deiliskipulagsreitir með lóðanúmerum. Það er hins vegar illskiljanlegt hvað af þessu eru iðnaðarlóðir og hvað íbúðarhúsalóðir. Svo nú gefst Jói upp, lítur yfir minnisblöðin og skrifar töluna tvo.

Um kvöldið ræða þau hjónin saman og taka ákvörðun um að flytja með fjölskyldu sína á Akranes.

Akranes	10
Borgarnes	2
Grundarfjörður	3
Ólafsvík	0
Stykkishólmur	2

gj

Alda og Jói vilja flytja vestur