Nafn: Aldís Ásgeirsdóttir

Fjölskylduhagir? Maki og tvö börn í Grundarfirði

Hver eru þín helstu áhugamál? Mín helstu áhugamál um þessar mundir eru golf, crossfit og fjallahjól.

Hvernig er venjulegur dagur hjá þér um þessar mundir? Venjulegur dagur hjá mér er frekar breytilegur þessa dagana, það er ekki mikil rútína í gangi. Við vöknum með börnunum og svo reyni ég að stinga af í vinnuna í tvær klukkustundir meðan pabbi þeirra er heima. Svo reyni ég að komast á crossfit æfingu fyrir hádegi. Eftir hádegi tekur við einhvers konar afþreying með börnunum, helst að hjóla saman, sund eða leika úti ef veður leyfir. Á góðum degi væri það svo grill í kvöldmatinn og golf í logninu og kyrrðinni á Bárarvelli um kvöldið.

Hverjir eru þínir helstu kostir og gallar? Ég myndi segja að minn helsti kostur væri hvað ég er jákvæð og opin. Tek öllum hugmyndum með opnum hug og til í að skoða þær. Gallinn minn væri líklegast sá að ég á það til að telja mér trú um að hlutirnir séu minna mál en þeir eru og ætla mér um of. En oft verður það ævintýri sem verður að góðum minningum.

Hversu oft æfir þú í viku? Ég reyni að fara í golf þrisvar til fimm sinnum í viku og crossfit þrisvar til fjórum sinnum i viku en það gengur ekki alltaf eftir!

Hver er þín fyrirmynd í íþróttum? Ég á mér enga sérstaka fyrirmynd. Það er bara fullt af fólki sem hefur veitt mér innblástur af því hvernig leikmaður ég vil vera. Ég reyni að temja mér það að hughreysta sjálfan mig, vera brött þegar á móti blæs og ekki láta minn leik hafa áhrif á aðra.

Af hverju valdir þú golf? Fjölskyldan mín hefur spilað mikið golf í gegnum tíðina svo það hefur pottþétt haft áhrif á mig. En svo finnst mér golf ótrúlega áhugavert sport, hvert einasta smáatriði skiptir gríðarlegu máli og hausinn þarf að vera skrúfaður vel á allan tímann. Svo elska ég að íþróttir þar sem maður keppir við sjálfan sig, erfitt þegar illa gengur en stórkostlegt þegar vel fer. Maður fer stundum í tilfinningarússíbana á einum golfhring. Þetta er frekar dramatísk íþrótt stundum, haha.

Hver er fyndnastur af þeim sem þú þekkir? Pabbi minn fær þann titil. Enda með ótrúlega skemmtilegan persónuleika og tekur hlutunum ekki of alvarlega.

Hvað er skemmtilegast og leiðinlegast við þína íþrótt? Það skemmtilegasta við golfið er að eiga frábæran dag á vellinum. Forgjöfin gerir leikinn líka mjög skemmtilegan og jafnar alla út. En það leiðinlega. Það fer stundum í taugarnar á mér að 5 cm pútt telur jafn mikið og 200 m dræf. En það þýðir ekkert að pæla í því. Það eru allir að spila sama leikinn.

Íþróttamaður vikunnar- Er jákvæð og opin