Framkvæmdir eru hafnar við byggingu nýs fjölbýlishúss á tveimur hæðum við Brákarsund í Borgarnesi. Það er byggingarfyrirtækið Hoffell ehf sem byggir húsið sem er við Brákarsund 1-3. Í því verða fjórar íbúðir. Hoffell á aðra byggingu á svæðinu sem stendur við Brákarsund 5, en það hús skemmdist nokkuð í bruna fyrir nokkru. Unnið er að endurbótum og uppbyggingu á því samhliða nýbyggingunni.

Húsin eru bæði einingahús frá Noregi, en eru hönnuð af íslenskum arkitektum Arktika og Urbanhus í Noregi. Þau eru klædd með furuklæðingu; meðhöndluðum kjarnaviði sem gránar með tímanum og á að þola íslenskt veðurfar vel.

Nýbyggingin verður í svipuðum stíl og húsið við Brákarsund 5, en verður þó ívið lægra.

Að sögn Júlíusar Þórs framkvæmdastjóra Hoffells hafa framkvæmdir við lagfæringar og smíði húsanna tafist vegna ytri aðstæðna. Má þar nefna skort á vinnuafli og fleiri þætti. En nú er verkið komið í gang og hann reiknar með að nýja byggingin muni rísa á þessu ári samhliða því að unnið verði áfram að uppbyggingu á húsinu sem fyrir er.

Á sínum tíma undirrituðu Borgarbyggð og Hoffell ehf. viljayfirlýsingu vegna samstarfs um óhagnaðardrifið íbúðarhúsnæði við Brákarsund 5. Forsaga málsins er að Hoffell ehf. hafði þá plön um setja á stofn óhagnaðardrifið leigufélag sem byggir og leigir út íbúðir á svæðinu. Verklok voru þá áætluð í árslok 2021 en verkið tafðist samkvæmt ofangreindu en er nú komið aftur í fullan gang. Ekki hefur enn verið ákveðið hvernig íbúðum verður ráðstafað að uppbyggingu lokinni, en ytri aðstæður hafa áhrif á þá ákvörðun.

Myndir af byggingasvæðinu: gj.

Framkvæmdir hafnar við nýbyggingu við Brákarsund