Fer mannavillt að meðaltali þrisvar á dag

Nafn: Sigrún Ósk Kristjánsdóttir

Hvar ertu fædd og hvenær? Reykjavík, haustið 1980.

Hvernig myndir þú lýsa þér í þremur orðum? Glaðlynd, hugmyndarík og örlítið viðutan.

Áttu gæludýr? Nei.

Hvers saknarðu mest frá því í gamla daga? Snjallsímaleysis. Ég myndi heldur ekki slá hendinni á móti bláum Ópal.

Hvað færðu þér ofan á pizzuna þína? Yfirleitt allskonar grænmeti, ananas og rjómaost.

Hvað er uppáhalds nammið þitt? Úff, hvað má þetta vera langt? Kókosbollur, Lindubuff, ferskjuhlaup frá Haribo, súkkulaðihúðað mangó í risapokum úr Costco og Djúpur. Maður gerir ekki upp á milli barnanna sinna.

Hvaða tungumál værir þú til í að kunna? Ég lærði spænsku í Perú fyrir tæpum 20 árum og var orðin nokkuð góð, þótt ég segi sjálf frá. En það hefur fennt hressilega yfir þá kunnáttu svo ég held ég segi spænsku.

Hvað er það skemmtilegasta sem þú gerir? Ferðast og vera í kringum skemmtilegt fólk.

Ertu hjátrúarfull? Nei.

Hvað myndi bíómynd um þig heita? Með allt á hreinu. Nei, djók… „Skipulagt kaos.“ Eitthvað svoleiðis.

Hver er uppáhalds mánuðurinn? September. Engar væntingar til veðurs, rútínan að detta aftur inn, teppi, kertaljós og afmæli.

Hvað ertu mest hrædd við? Hákarla. Ég stóð mig að því að þora ekki að skrifa hvað ég er í alvöru hræddust við af ótta við að það raungerðist, svo líklega er ég hjátrúarfull eftir allt saman!

Hver er uppáhalds skyndibitinn? Mér finnst Lemon fínt. Hef almennt ekki smekk fyrir skyndibita. Sérhæfi mig í nammi.

Hver er uppáhalds staðurinn þinn á Íslandi? Akranes. Alltaf.

Hver er minnisstæðasta gjöfin sem þú fékkst þegar þú varst lítil? Páfagaukur sem ég fékk í jólagjöf þegar ég var sjö ára og Barbie-dúkka í pilsi sem lýsti í myrkri.

Ef þú þyrftir að velja þér nýtt nafn hvað yrði þá fyrir valinu? Vá, þessi er erfið. Ég átti á einhverju tímabili að heita Kolbrún en mömmu fannst skammstöfunin KÓK ekki passa fyrir utan þá staðreynd að ég hef alltaf verið kríthvít. Væri Ísdís ekki bara fínt?

Hvað ætlaðir þú að verða þegar þú yrðir stór? Dýralæknir.

Vandræðalegasta augnablikið? Ég fer mannavillt að meðaltali þrisvar á dag. Það er alltaf mjög vandræðalegt.

Hvar sérðu þig eftir tíu ár? Ekki hugmynd! Vil líka hafa það þannig.

Yfirheyrslan