Ákall um bætt umferðaröryggi við höfnina í Stykkishólmi

Á fundi bæjarstjórnar Sveitarfélagsins Stykkishólms í lok júní síðastliðins voru lögð fram gögn í tengslum við fyrirhugaðan hafnarstíg í norðurhluta hafnarinnar í Stykkishólmi, við Súgandisey. Fyrir liggur hönnun á slíkum stíg meðfram Baldursbryggju sem er sunnan Súgandiseyjar til að bæta umferðaröryggi og er það hugsað sem samstarfsverkefni sveitarfélagsins og Vegagerðarinnar. Geta má þess að ríflega tuttugu skemmtiferðaskip eru skráð með komur til Stykkishólms í sumar svo eitthvað sé nefnt. Þá er mikil umferð akandi og gangandi um svæðið vegna ferjunnar Baldurs og er algengt að gangandi vegfarendur þveri Súgandiseyjargötu með tilheyrandi hættu. Í umferðaröryggisáætlun sveitarfélagsins er fjallað um að víða sé hættuástand á svæðinu, ekki síst meðfram Baldursbryggju, og því brýnt að grípa til aðgerða.

Hafnarstjórn ómyrk í máli

Málið hefur verið til umfjöllunar í skipulags- og byggingarnefnd og í bæjarráði, sem vísaði málinu til vinnslu í Hafnarstjórn Stykkishólmshafnar. Hún hefur ítrekað bent á að brýnt sé að farið verði sem fyrst í þessa framkvæmd til að auka öryggi gangandi vegfarenda á svæðinu. Ekki síst er þar bent á sívaxandi fjölda ferðamanna og að ferðaþjónustufyrirtækjum sem eru með ýmiss konar starfsemi í höfnum landsins hafi fjölgað mikið. Þessi umferð sé víða innan um starfsemi annarra aðila sem fari ekki í öllum tilfellum vel saman og geti skapað hættu fyrir gangandi umferð. Sveitarstjórn Stykkishólms tók á fundi sínum eindregið undir það að hafnarstígur sé nauðsynlegur hlekkur í bættu umferðaröryggi í og við höfnina og að brýnt sé að ráðast í umræddar framkvæmdir. Var Jakobi Björgvini Jakobssyni bæjarstjóra falið að fylgja málinu eftir.

Höfnin mikilvægur áningarstaður

Að sögn Jakobs er höfnin einn af mikilvægari áningarstöðum ferðamanna í sveitarfélaginu og því brýnt að öryggis sé gætt, sér í lagi fyrir gangandi vegfarendur. „Á svæðinu er mikil umferð í tengslum við ferjuna Baldur og því mjög mikilvægt að Vegagerðin, í samstarfi við sveitarfélagið, tryggi öryggi gangandi vegfarenda með því að flytja gangandi umferð sem nú er meðfram Súgandisey þannig að hún sé sjávarmegin með sérstökum hafnarstíg. Hann þarf að vera í senn aðlagandi og hagkvæmur og falla vel að heildaryfirbragði hafnarinnar og bæjarmyndarinnar í Stykkishólmi,“ segir Jakob í samtali við Skessuhorn.

*Höfnin séð frá Súgandisey. Ljósm. aðsend.*

Vanda þarf til verka

Jakob segir að afar mikilvægt sé að vandað sé til verka á þessu fallega hafnarsvæði. „Því liggja fyrir tvær vandaðar hönnunartillögur sem sveitarfélagið hefur unnið að og Vegagerðin er að fara yfir,“ segir hann. „Önnur einkennist af hörðum línum og köntum og dregur form sín af klettunum við höfnina á meðan hin tekur mið af hönnunarsamkeppni og þeirri framtíð sem við sjáum fyrir okkur á Súgandisey.“ Jakob tekur fram að það sé afar ánægjulegt hversu vel Vegagerðin hefur tekið í verkefnið enda sé skilningur hjá stofnuninni á mikilvægi þess að tryggja umferðaröryggi. Sérstaklega eigi það við um umferð til og frá ferjunni. „Það hefur nú þegar verið ráðist í fyrsta áfanga verkefnisins sem var að lagfæra kantinn og setja upp til bráðabirgða þungar varnir, m.a. til að koma í veg fyrir að bílar komist ofan í höfnina. En næsta skref er að koma upp formfögrum hafnarstíg sem fellur vel að umhverfinu og færa gangandi umferð alfarið yfir götuna, fjær Súgandisey. Ég á von á því að heyra frá Vegagerðinni á næstu misserum varðandi næstu skref í þessu mikilvæga umferðaröryggisverkefni,“ segir Jakob að lokum.

Ný hugsun í hönnun hafna