Framkvæmdir við byggingu nýs steypuskála Norðuráls ganga vel, að sögn Sigrúnar Helgadóttur framkvæmdastjóra Norðuráls á Grundartanga. Ístak er aðalverktaki við framkvæmdina en fjöldi annarra fyrirtækja kemur einnig að verkefninu sem fullbúið mun kosta um 16 milljarða króna.

Blaðamaður Skessuhorns brá sér í vikunni sem leið á Grundartanga og tók meðfylgjandi myndir af húsinu. Búið var að mestu að reisa burðarvirki fjögurra bursta og byrjað að klæða blágrænu klæðningu á hluta nýbygginganna, en liturinn er í stíl við aðrar byggingar fyrirtækisins og fellur vel að þeim. Gert er ráð fyrir að nýja framleiðslulínan verði gangsett á fyrri hluta árs 2024. Um 80-90 störf eru á framkvæmdatímanum að ótöldum afleiddum störfum. Um fjörutíu ný varanleg störf verða til hjá Norðuráli þegar framleiðsla hefst á næsta ári.

Í þessum nýja steypuskála stendur ekki til að auka magnið sem framleitt er af áli heldur verður þetta áframvinnsla. Þannig verður aukið virði þess áls sem verksmiðjan framleiðir, færri kolefnisspor stigin en fyrir afurðina fæst hærra verð á mörkuðum. Viðbótarorkuþörf er um 10 megavött og hefur verið samið um þá orkuviðbót með umhverfisvænni orku. Raunar hvernig sem á það er litið er bygging þessa nýja steypuskála því þörf framkvæmd, ekki síst í ljósi umræðunnar um loftslagsmál. Verið er með umhverfisvænum hætti að taka viðbótarskref í framleiðslu áls hvort sem litið er til umhverfisþátta hér heima eða á heimsvísu.

Talið er að við framleiðsluna megi spara orku sem nemur 40 prósentum með því að fullvinna verðmætara ál. Fram til þessa hafa álhleifarnir verið fluttir óunnir til Evrópu, þeir bræddir þar og síðan mótaðir í álsívalninga. Nú á að færa þá framleiðslu á Grundartanga, auka þar verðmætasköpun og selja afurðina frá þessari nýju framleiðslulínu sem álstangir eða sívalninga. Álið verður notað til framleiðslu á bílum og ýmsum öðrum tæknibúnaði.

*Athafnasvæði Norðuráls er stórt. Nýbyggingin er til hægri á mynd.*

Nýr steypuskáli risinn á Grundartanga