Sturluhátíð var haldin síðastliðinn laugardag að Staðarhóli í Saurbæ og að Laugum í Sælingsdal að viðstöddu fjölmenni. Um 200 manns sóttu samkomuna.

Staðarhóll er bær sagnaritarans Sturlu Þórðarsonar, eins merkasta sagnaritara Íslendinga, sem meðal annars er talinn hafa átt stóran þátt í ritun Sturlungu. Þar voru afhjúpuð fjögur söguskilti tileinkuð Sturlu, sem Sturlufélagið hafði látið gera. Að því búnu var farin söguganga með Guðrúnu Öldu Gísladóttur fornleifafræðingi sem sagði frá fornleifaskráningu og uppgreftri sem hún hefur staðið fyrir ásamt fleirum.

*Söguskiltunum hefur verið komið smekklega fyrir á Staðarhóli. Ljósm. sla*

Dagskráin hélt svo áfram í íþróttahúsinu á Laugum. Þar fluttu ávörp þau Einar Kárason rithöfundur, Torfi H. Tulinius prófessor og Vilborg Davíðsdóttir rithöfundur. Tónlistarflutning önnuðust Soffía Meldal, ung tónlistarkona í Dölum, en meðleikari hennar var Kristján Ingi Arnarson.

„Þetta var stórkostlegur dagur; alveg ótrúlegur satt best að segja. Fjöldinn sem kom segir sína sögu; Sturlunga og verk Sturlu Þórðarsonar lifa enn í hugum Íslendinga. Þetta er okkur, sem skipum stjórn Sturlufélagsins, hvatning til að halda áfram á sömu braut með áframhaldandi uppbyggingu á Staðarhóli og árlegri Sturluhátíð að ári,“ segir Einar K Guðfinnsson formaður Sturlufélagsins.

*Svipmynd af samkomunni á Laugum hvar hátt í 200 manns voru saman komin. Ljósm. ekg*

*Guðrún Nordal, Einar Kárason, Guðrún Ágústsdóttir og Einar K Guðfinnsson eiga öll sæti í stjórn Sturlufélagsins. Ljósm. sla*

*Einar Kristinn, formaður Sturlufélagsins, ávarpar gesti á Staðarhóli. Ljósm. sla*

Fjölmenni á Sturluhátíð í Dölum – myndir