medium

large

thumbnail

1536x1536

2048x2048

small

custom-size

Verkfallsaðgerðir dæmdar ólögmætar – nema í Leikskóla Snæfellsbæjar

Valdís ráðin í starf framkvæmdastjóra Höfða

Hvassviðri og úrhellisrigningu spáð við Breiðafjörð

Guðrún bætist í formannsslaginn

Agustson reitur í Stykkishólmi kynntur

Dagur tónlistarskólanna er í dag

core/paragraph

Knattspyrnumaðurinn tvítugi, Hákon Arnar Haraldsson frá Akranesi, er samkvæmt dönskum og íslenskum fréttamiðlum á leið til franska knattspyrnufélagsins Lille frá FC Köbenhavn. Er fullyrt að franska félagið greiði sem nemur allt að 2,5 milljörðum íslenskra króna fyrir Skagamanninn. Hlutur Knattspyrnufélags ÍA af þessum félagaskiptum gætu numið nokkur hundruð milljónum króna samkvæmt samningi sem gerður var við FCK þegar hann fór frá ÍA til dönsku meistaranna fyrir fjórum árum síðan.

Lille hafnaði í fimmta sæti frönsku deildarinnar á síðasta ári og mun leika í Evrópukeppninni í vetur. Liðið varð franskur meistari fyrir tveimur árum síðan. Fréttir herma að Hákon Arnar sé mættur í læknisskoðin hjá franska liðinu og aðeins eftir að ganga frá formsatriðum varðandi félagaskiptin.

core/image

Hér fyrir neðan má lesa viðtal sem birtist í Skessuhorni við Hákon 6. janúar 2022, þar sem hann ræðir m.a. um framtíðarsýn sína í knattspyrnunni.

Skagamaðurinn Hákon Arnar Haraldsson er þegar byrjaður að láta að sér kveða hjá FC Kaupmannahöfn í danska boltanum. Hann hefur nú leikið átta leiki með aðalliði félagsins, þann fyrsta gegn Vejle í dönsku Superligunni í 3:0 sigri nú í lok október. Hann gerði sér lítið fyrir og skoraði sitt fyrsta mark fyrir félagið í leiknum þegar hann kom liðinu í 2:0 með glæsilegu skallamarki. Hákon bætti um betur með mjög góðri frammistöðu í Sambandsdeild Evrópu þegar hann lagði upp bæði mörk FCK í 2:0 sigri gegn Slovan Bratislava nú í byrjun desember.

Þrír Íslendingar í hópnum

„Þetta var alveg frábært að fá að taka þátt í þessum leikjum og stíga þessi skref,“ segir Hákon Arnar í samtali við Skessuhorn. „Það gerði þetta nú enn ánægjulegra að bæði ég og Ísak Bergmann Jóhannesson lékum saman í Evrópuleiknum.“ Hákon Arnar gekk til liðs við danska liðið í júní 2019 og gerði þá þriggja ára samning, en hann hafði þá leikið nokkra leiki með meistaraflokki ÍA á undirbúningstímabilinu það ár. „Það voru nokkur lið sem sýndu mér áhuga, en eftir að hafa skoðað aðstæður í Kaupmannahöfn leist mér mjög vel á allt það sem þeir höfðu upp á að bjóða og hef ég ekki séð eftir þeirri ákvörðun að hafa samið við FCK. Mér líður mjög vel í Kaupmannahöfn. En það hjálpaði mér auðvitað mikið að foreldrar mínir voru mikið hjá mér úti. Móðir mín var meira og minna hjá mér fyrstu tvo veturna. Fyrir vikið leið mér mun betur í Kaupmannahöfn og aðlagaðist fyrr í stað þess að vera hjá danskri fjölskyldu eins og oftast er hjá ungum leikmönnum sem ganga til liðs við lið eins og FCK. Þau studdu mig með ráðum og dáð á þessum fyrstu árum mínum í atvinnumennskunni eins og þau hafa alltaf gert. Ég hef verið meira einn úti í haust eftir að ég aðlagaðist dvöl minni þar. Þá höfum við Íslendingarnir hjá liðinu haldið hópinn og erum allir góðir vinir. En hjá FCK eru nú þrír Íslendingar auk míns. Það er að sjálfsögðu Ísak Bergmann Jóhannesson og svo þeir Orri Steinn Óskarsson og Andri Fannar Baldursson sem kom að láni frá Bologna á Ítalíu.“

Fótboltafjölskylda

Hákon Arnar á nú ekki langt að sækja knattspyrnuhæfileika sína. Foreldrar hans eru þau Jónína Víglundsdóttir og Haraldur Ingólfsson. Þau léku bæði fyrir A-landslið Íslands á sínum tíma og fyrir ÍA að sjálfsögðu. Þá hafa systkini Hákons Arnars látið heldur betur að sér kveða í knattspyrnunni. Systir hans, Unnur Ýr, á fjölda leikja með ÍA og Tryggvi Hrafn bróðir hans á einnig fjölda leikja með ÍA og íslenska A landsliðinu og U-21 árs liðinu auk þess að spila með Halmstad í Svíþjóð og Lilleström í Noregi og nú með Val. Þá hefur yngsti bróðurinn Haukur nýlega gert samning við ÍA.

Endurnýjaður samningur

Hákon Arnar byrjaði að æfa með ungmennaakademíu FCK þegar hann kom til félagsins fyrir rúmlega tveimur árum síðan. Var þar fastamaður í liðinu sem vinstri vængmaður. „Þá var liðið undir stjórn Norðmannsins Stale Solbakken en eftir að nýr þjálfari, Jess Thorup, kom til liðsins færði hann mig í stöðu framarlega á miðjuna, svona eiginlega í áttuna eins og kallað er. Hefur sú staða hentað mér mjög vel. FCK leikur heimaleiki sína á þjóðarleikvangi Dana, Parken í Kaupmannahöfn. Æfingasvæði félagsins er í Frederiksberg sem er í um tuttugu mínútna aksturfjarlægð frá Parken. Æfingasvæðið og öll umgjörð í kringum félagið er fyrsta flokks og vel er hlúð að okkur yngri leikmönnunum,“ sagði Hákon Arnar að endingu.

Hákon Arnar er rétt að stíga sín fyrstu skref í atvinnumennskunni, aðeins 18 ára gamall. Hvort sem ferill hans verður í Danmörku eða annars staðar verður að koma í ljós en hann á svo sannarlega framtíðina fyrir sér og hæfileikarnir eru til staðar og verður spennandi að fylgjast með ferli hans í framtíðinni. En hann skrifaði nýlega undir nýjan samning við FCK til ársins 2026.

Fréttaveita Vesturlands

Hákon Arnar á leið í franska boltann fyrir risaupphæð