Ungmennafélag Stafholtstungna hyggst stofna rafíþróttadeild innan félagsins, en rafíþróttir hafa rutt sér til rúms undanfarin ár þar sem um er að ræða heilbrigða nálgun á tölvuleikjanotkun. Á vefsíðu Rafíþróttasambands Íslands kemur fram að á æfingum rafíþrótta sé stuðlað að andlegum styrk og félagsþroska ungmenna. Einnig er lögð áhersla á líkamlega hreyfingu og heilbrigði þar sem ofspilun getur leitt af sér ýmsa líkamlega kvilla.