Félagar í Golfklúbbi Borgarness fagna 50 ára afmæli félagsins laugardaginn 16. júlí nk. Haldið verður upp á afmælið með afmælismóti og þá er búið að rita afmælisblað með 50 ára sögu klúbbsins, undir ritstjórn Heiðars Lind Hanssonar, sem gefið verður út á laugardaginn, bæði á prenti og á nýuppfærðri heimasíðu golfklúbbsins. Rétt tæplega 300 meðlimir eru í klúbbnum í dag.

„Við verðum með boðsmót fyrir klúbbfélaga og fulltrúa úr nágrannaklúbbum sem við erum í samskiptum við og frá Golfsambandi Íslands. Þá erum við að gefa út afmælisblað með 50 ára sögu klúbbsins og ýmsum öðrum fróðleik. Til dæmis er þar viðtal við garðyrkjumeistarann okkar, hana Guðríði Ebbu Pálsdóttur sem hefur lagt mikla vinnu í trjá- og blómarækt á Hamarsvelli,“ segir Ingvi Árnason formaður Golfklúbbs Borgarness í samtali við Skessuhorn. Í afmælisritinu er líka gerð grein fyrir framkvæmdum sem golfklúbburinn hefur staðið fyrir á Hamarsvelli, þar sem fyrst voru sex holur, síðan níu, tólf og loks 18. Þá er einnig fjallað um hótel Hamar sem er eina „golfhótelið“ á Íslandi, staðsett við Hamarsvöll. „Svo er mikið fjallað um starf klúbbsins eins og kvennastarfið og hinn fræga pútthóp Hamars sem er búinn að vera starfandi í 15 ár. Ýmsar tölulegar upplýsingar eru einnig í ritinu, til dæmis listi yfir klúbbmeistara og hvaðeina,“ segir Ingvi.

Meðfylgjandi myndir voru teknar á Hjóna- og paramóti á Hamarsvelli dagana 23.-24. júní sl. og voru birtar á Facebook-síðu Golfklúbbs Borgarness.

Fimmtíu ára afmæli Golfklúbbs Borgarness um næstu helgi