Aðgerðaáætlun um viðhald á leikvöllum liggur fyrir, vinna við úrbætur er hafin en fjármagn til viðhalds er lítið

Á Akranesi eru 15 hverfisleikvellir á dreif um bæinn. Eru þeir misjafnir í sniðum og að stærð og mega margir muna fífil sinn fegurri. Skessuhorn hefur á liðnum vikum fengið nokkrar ábendingar um illa farna leikvelli í bænum og leitaði svara hjá Jóni Arnari Sverrissyni sem er garðyrkjustjóri Akraneskaupstaðar og hefur umsjón með leikvöllum bæjarins. Síðastliðinn vetur gerði hann úttekt á öllum hverfisleikvöllum á Akranesi og er nú kominn með áætlun í hendurnar um hvað þarf að gera á hverjum leikvelli fyrir sig. Mun hann leggja áætlunina fyrir bæjarstjórn í haust til að koma viðhaldi við leikvelli inn í fjárhagsáætlun fyrir næsta ár, en einungis um þremur milljónum hefur verið ráðstafað í viðhald við leikvelli árlega síðustu ár.

*Nýlega var klárað að endurnýja leiktæki á leikvellinum á Vogabraut. Íbúar höfðu sent inn ábendingar um að gömlu leiktækin væru úr sér gengin.*

Skoðunarstofa gerir úttekt á leikvöllum árlega

Fram kemur í reglugerð (1025/2022) um öryggi leikvallatækja og leiksvæða og eftirlit með þeim að rekstraraðilum leiksvæða ber að sjá til þess að skipulögð leiksvæði séu skoðuð árlega samkvæmt kröfum um aðalskoðanir leiksvæða. Aðalskoðun leiksvæða er ástandsskoðun þar sem gerð er heildarúttekt á öryggi leikvallatækja, yfirborðsefna, undirstöðum og umhverfis á leiksvæðinu öllu. Reglugerðin gildir fyrir öll leiksvæði innandyra sem utan, skipulögð fyrir leik barna svo sem skólalóðir, gæsluvelli, opin leiksvæði og lóðir fjölbýlishúsa.

BSI skoðunarstofan hefur séð um úttekt á leikvöllum Akraneskaupstaðar síðustu ár. Hún skilar af sér skýrslu eftir hverja skoðun með samantekt um stöðu leikvallanna og aðgerðaáætlun fyrir komandi ár, þ.e. hvað þarf að laga áður en næsta úttekt fer fram. Aðspurður segir Jón Arnar að ekki séu neinar sektir eða viðurlög við því að laga ekki það sem sett er út á áður en næsta skoðun fer fram. En fái eitthvað leiktæki „rauða spjaldið“ í úttektinni beri kaupstaðnum að fjarlægja það strax. „Ef eitthvað gerist í leiktæki sem er með rauðan stimpil þá er kaupstaðurinn skaðabótaskyldur. Svo við reynum að fjarlægja slík tæki um leið þótt við getum ekki endilega sett neitt í staðinn strax,“ segir Jón Arnar í samtali við Skessuhorn.

Lítið fjármagn í viðhald leikvalla

Í fjárfestinga- og framkvæmdaáætlun Akraneskaupstaðar 2023-2026, sem samþykkt var í bæjarstjórn 13. desember 2022, er gert ráð fyrir 3,4 milljónum króna í viðhald og vinnu við leikvelli árlega. Hefur svipuðu fjármagni verið veitt í málaflokkinn síðustu ár. Í vetur gerði Jón Arnar sjálfur úttekt á öllum leikvöllum á Akranesi og útbjó bækling um hvaða úrbætur þarf að gera á þeim. Nú vinnur Jón Arnar og hans fólk eftir þeirri áætlun um endurbætur á leikvöllum en með svo lítið fjármagn í viðhald sé takmarkað hægt að gera. „Margir leikvellirnir eru mjög illa farnir og þarf nánast að endurnýja frá grunni og það kostar peninga. Ef það þarf að skipta út einum litlum kastala á leikvelli þá getur það kostað um þrjár milljónir og þá er lítið eftir í annars konar viðhald,“ segir Jón Arnar sem vonast eftir meira fjármagni í viðhald á leikvöllum fyrir næsta ár. „Ég er búinn að sýna umhverfis- og skipulagsráði bæklinginn og mun svo leggja hann fyrir bæjarstjórn í haust til þess að koma viðhaldi á leikvöllunum inn í fjárhagsáætlun fyrir næsta ár.“

*Sandkassinn á leikvellinum við Beykiskóga/Eikarskóga.*

Úttektir kostnaðarsamar

Þá kostar það um eina milljón króna á ári að fá skoðunarstofuna í hina árlegu úttekt. Segist Jón Arnar heldur vilja nota þann pening í viðhald og endurbætur á leikvöllum enda hafi bærinn ekkert að gera með nýja skýrslu á hverju ári þar sem ekki náist að bregðast við öllum athugasemdum skýrslunnar innan ársins, sökum peningaleysis. Segir í reglugerð að komi fram frávik með talsverðri eða hámarksáhættu við fyrstu aðalskoðun skuli aðalskoðun framkvæmd árlega. Það er heilbrigðisnefnd sem metur alvarleika frávika og hvort það þurfi að fylgja þeim eftir. Leiði aðalskoðun hins vegar ekki í ljós alvarleg frávik eða rekstaraðili hafi brugðist við frávikum og bætt úr er heilbrigðisnefnd heimilt að ákveða lengri tíðni milli aðalskoðana, allt að þrjú ár.

„Nú er ég kominn með plagg í hendurnar um hvað þarf að gera á hverjum leikvelli fyrir sig og vinna er hafin við úrbætur. Ég fékk þá í áhaldahúsinu með mér og við fórum yfir það sem við getum gert, þetta smotterí sem kostar ekki mikinn pening. Leikvellirnir eiga að uppfylla ákveðnar öryggiskröfur sem skoðunarstofan gerir úttekt á. Núna erum við t.d. að laga gúmmímotturnar á öllum leikvöllum en þær voru víða farnar að síga eða komnar á kaf í gras. Það er eitthvað sem kostar ekki rosalega mikinn pening en er mikilvægt öryggisins vegna. Svo á sumum stöðum þarf að skipta út heilu leiktækjunum og þá kostar það jafnvel allan peninginn sem leikvellirnir fengu úthlutað í fjárhagsáætlun. Þannig við erum að taka þetta litla núna, sem kostar minni pening, og svo þurfum við að fara fram á meiri pening í fjárhagsáætlun fyrir næsta ár.“

Fjarlægja leiktæki sem standast ekki kröfur

Síðastliðið haust var fjarlægður stór kastali á leikvellinum á Vogabraut. Sá kastali var mjög illa farinn og segir Jón Arnar að hann hafi nánast verið dæmdur ónýtur af skoðunarstofunni. Þar höfðu íbúar einnig sent inn ábendingar um leikvöllinn, að kastalinn þar væri kominn til ára sinna. „Við fjarlægðum þá kastalann og settum upp nýjan í staðinn. Sá er reyndar minni, en við settum þá líka upp sandkassa og klifurstaura. Í vor var klárað að setja öryggismottur allt í kringum kastalann og er leikvöllurinn því klár núna. Þá var líka stórt snúningstæki á leikvellinum í Jörundarholti sem við létum fjarlægja nýlega. Það var gamalt og brotið og því ekki annað í stöðunni en að fjarlægja það. Það var hins vegar ekki svigrúm til að setja annað í staðinn en nú er bara að bíða og sjá hvað hægt er að gera seinna.“

*Í sumar er unnið að því að laga gúmmímottur á öllum hverfisleikvöllum. Þær eru víða farnar að síga eða komnar á kaf í gras. Þessi leikvöllur er staðsettur í Jörundarholti.*

Fjölnota leikvöllur við Merkurtún

Nú er í gangi hönnunarvinna við stóran fjölnota leikvöll við Merkurtún en í hugmyndasamkeppninni Okkar Akranes sem haldin var í vetur var leikvöllur við Merkurtún ein sex hugmynda sem fengu flest atkvæði. Þá var ungbarnaróló einnig ein af sem atkvæðahæstu hugmyndunum og var ákveðið að finna ungbarnarólónum stað innan Merkurtúns. 30 milljónum króna var ráðstafað í hugmyndasamkeppnina, hluti upphæðarinnar fór í framkvæmd við kosninguna og restinni var deilt niður á verkefnin fimm.

Jón Arnar segir að sá peningur sem út af stendur, eftir að hönnunarvinnu við Merkurtún er lokið, verði notaður í að kaupa einhver leiktæki fyrir árslok. „Við þurfum að nota peninginn fyrir áramót þannig við stefnum á að kaupa einhver leiktæki til þess að nýta peninginn til fulls. Á næsta ári hefjast svo framkvæmdir við gerð leikvallarins sem verður fyrir ungabörn, lítil börn og stærri börn. Þá er Merkurtún líka hugsað sem almenningsgarður og samkomustaður,“ segir Jón Arnar.

Það er vinna í gangi

Þær 30 milljónir sem fóru í hugmyndasamkeppnina er peningur sem kemur til aukalega við þegar samþykkta fjárhagsáætlun. „Ég er mjög ánægður með hugmyndasamkeppnina og þau verkefni sem ákveðið var að ráðast í í kjölfarið. Við þurfum þó líka að hugsa um viðhald á því sem fyrir er og ástæðan fyrir því að margir leikvellir í bænum eru illa farnir er vegna þess að pening hefur ekki verið ráðstafað í viðhald. Við eigum að fara skipulega í þessa viðhaldsvinnu. Við getum ekki gert allt í einu en ég er kominn með plagg í hendurnar sem við vinnum eftir. Þannig það er vinna í gangi,“ segir Jón Arnar.

Meira fjármagn þarf til að viðhalda leikvöllum á Akranesi