Eigendur Ikan ehf, þau Þorsteinn Máni Árnason og María Sigurjónsdóttir, hafa sent Fornbílafélagi Borgarfjarðar (FB) opið bréf. Ikan hefur eins og kunnugt er endurleigt af FB hluta gömlu fjárréttarinnar í Brákarey, en hefur ekki haft aðgang að húsnæðinu frá því í febrúar fyrir hálfu þriðja ári síðan, eftir að húsum í Brákarey var lokað af kröfu eldvarnareftirlits og Borgarbyggðar. Stjórn Fornbílafélagsins, sem leigusala, er í bréfinu gert ljóst að lög gilda um útleigu húsnæðisins sem byggir á leigusamningi sem gerður var 2018. Líta leigutakar svo á að samningnum hafi ekki verið rift. „Um samband leigusala og leigutaka gilda sérstök lög, Húsaleigulög nr. 36/1994. Eiga þau lög fortakslaust við um leigusamband FB við eiganda húsnæðisins og Ikan ehf,“ segir í bréfinu frá Ikan.