Norska ferjan Röst tekur við ferjusiglingum á Breiðafirði í haust

Vegagerðin hefur samið við Torghatten Nord AS í Noregi um kaup á ferjunni Röst. Skipið tekur að óbreyttu við ferjusiglingum á Breiðafirði í haust og leysir þar með ferjuna Baldur af hólmi. Kaupin koma í kjölfar útboðs síðastliðið haust þar sem einungis fékkst eitt tilboð, frá Torghatten Nord . „Upphaflega stóð til að leggja af ferjusiglingar á Breiðafirði við lok samnings við Sæferðir vorið 2023 en ákveðið var breyta þeirri ákvörðun og halda áfram siglingum í ljósi þess að miklar breytingar hafa orðið á atvinnustarfsemi á sunnanverðum Vestfjörðum bæði hvað varðar uppbyggingu fiskeldis og ferðaþjónustu,“ segir í tilkynningu á vef Vegagerðarinnar.

Ferjan Baldur sem þjónað hefur ferjusiglingum á Breiðafirði síðustu áratugi hefur sætt verulegrar gagnrýni bæði vegna öryggis og aðbúnaðar við farþega.

Á síðasta ári varð ferjan m.a. tvisvar vélarvana með stuttu millibili úti á Breiðafirði með farþega um borð. Þá hefur bæjarstjórn Stykkishólmsbæjar og Helgafellssveitar síðustu misseri ítrekað lagt áherslu á að annað skip hefji siglingar yfir Breiðafjörð sem allra fyrst þar sem núverandi ferja standist ekki nútímakröfur.

Ferjan Röst er smíðuð 1991, tekur 250 farþega og rúmar fimm stóra flutningabíla. Vegagerðin hefur nú boðið út rekstur ferjunnar á Breiðafirði og gerir ráð fyrir að gera samning við rekstraraðila í sumar. Í útboðinu, sem auglýst er á Evrópska efnahagssvæðinu, er miðað við að Röst sigli sömu áætlun og Baldur á ferjuleiðinni Stykkishólmur – Flatey – Brjánslækur – Flatey – Stykkishólmur.

„Afhending á ferjunni verður eigi síðar en 15. september og tekur þá við skoðun ytra og sigling til Íslands. Þá fer hún í slipp hjá Vélsmiðju Orms og Víglundar ehf. í Hafnarfirði sem átti lægsta boð í breytingar sem þarf að gera til að skipið geti þjónað siglingum á Breiðafirði. Þessar breytingar fela m.a. í sér að koma fyrir nýjum þilfarskrana, landfestuvindum, færa til lyftibjörgunarbáta, útbúa geymslusvæði á þilfari og mála skipið að utan. Gert er ráð fyrir að siglingar hefjist seinni hluta októbermánaðar,“ segir í tilkynningu Vegagerðarinnar.

Vegagerðin hefur keypt nýja Breiðafjarðarferju

Norska ferjan Röst tekur við ferjusiglingum á Breiðafirði í haust

Norska ferjan Röst tekur við ferjusiglingum á Breiðafirði í haust