Hópur sem telur 41 einstakling á Akranesi hefur sent bæjarstjórn Akraneskaupstaðar gagnyrta umsögn vegna auglýstrar skipulagslýsingar aðal- og deiliskipulags Jaðarsbakka á Akranesi. Hópurinn vill vernda Jaðarsbakka og Langasand sem næst núverandi notkun svæðisins og mótmælir þeim fyrirætlunum sem uppi eru um m.a. byggingu hótels, íbúða og annarrar starfsemi á alls 17,5 ha svæði meðfram Langasandi. Fyrir hópnum fara Gísli Gíslason, Gunnar Sigurðsson, Jón Gunnlaugsson, Hörður Helgason og Sturlaugur Haraldsson sem titla sig áhugamenn um aðstöðu íþróttahreyfingarinnar á Jaðarsbökkum, verndun Langasands og aðgengi almennings að svæðinu. „Undirrituð leggja áherslu á vandaðan undirbúning fyrirhugaðra breytinga og virku samráði við almenning. Við treystum því einnig að breytingarnar gangi ekki gegn náttúru svæðisins, aðgengi almennings og nýtingu þess fyrir íþróttafólk til lengri framtíðar.“

Skessuhorni var send umsögnin og birtist hún í heild sinni hér undir aðsendar greinar.