Um nónbil í dag var byrjað að mála neðsta hluta Kirkjubrautar frá Akratorgi á Akranesi í glaðlegum litum regnbogafánans. Það er gert í tilefni af Hinseginhátíð Vesturlands 2023 sem að þessu sinni verður haldin á Akranesi á og dagana í kringum laugardaginn 22. júlí næstkomandi.

Til að hefja götumálninguna tóku þátt fulltrúar frá Akraneskaupstað, Hinsegin hátíðar Vesturlands, ÍA og þriggja fyrirtækja sem styrkja hátíðina. Það eru Íslandsbanki, Steðji og Norðurál. Þegar fyrstu metrarnir höfðu verið málaðir tóku ungmenni á Akranesi við sköftunum en stefnt var á að ljúka málningunni í dag. Kirkjubrautinni var því lokað meðan málningarvinnan stóð yfir.

Hápunktur Hinsegin hátíðar Vesturlands að þessu sinni verður Gleðigangan sem fram fer á laugardeginum 22. júlí. Hún verður farin frá Ráðhússplaninu við Stillholt og gengið niður Kirkjubraut og endað á Akratorgi þar sem skemmtidagskrá fer fram. Á laugardagskvöldinu munu svo Guðrún Árný og DJ Glókollur halda uppi fjörinu. Fleiri fræðandi og skemmtilegir viðburðir verða alla helgina og verða þeir kynntir í Skessuhorni þegar nær dregur. Í tilefni hátíðarinnar verður allt Vesturland skreytt í regnbogalitunum og verður Hinsegin Vesturland með sölu á varningi í gamla Landsbankahúsinu við Akratorg vikuna fyrir hátíðina, fólki gefst þá tækifæri til að eignast regnbogafána og styrkja um leið gott málefni.

*Ungmenni tóku síðan við og máluðu frá Akratorgi og að Gamla kaupfélaginu.*

*Guðrún Steinunn Guðbrandsdóttir forseti Hinsegin Vesturlands.*

Litir fjölbreytileikans málaðir á Kirkjubrautina