Snæfellsjökulshlaupið var haldið í 13. sinn laugardaginn 24. júní sl. Í ár voru 182 keppendur og voru brautarmet slegin í bæði karla- og kvennaflokki.

Hlaupaleiðin er 22 km löng. Ræst var hjá veitingastaðnum Arnarbæ á Arnarstapa, hlaupið yfir jökulhálsinn og endað í miðbæ Ólafsvíkur. Það eru Sigrún Ólafsdóttir og Ingunn Ýr Angantýsdóttir sem hafa umsjón með hlaupinu. „Það var slegið 10 ára brautarmet í karlaflokki í ár, sem var virkilega gaman. Þá var einnig slegið brautarmet í kvennaflokki í ár en fyrra metið var frá því í fyrra,“ segir Sigrún Ólafsdóttir í samtali við Skessuhorn.

Veðurguðirnir voru hliðhollir hlaupurunum í ár. „Við ræstum hlaupið frá Arnarstapa kl. 12 í flottu veðri og það hélst þurrt allan tímann. Að hlaupi loknu, kl. 15.30, var verðlaunaafhending í Sjómannagarðinum og það var frábært veður. Svo þegar við vorum að ganga frá um sexleytið þá byrjaði loks að hellirigna,“ segir Sigrún og bætir við að hlaupaleiðin hafi í ár alveg verið laus við snjó, sem sé fáheyrt.

Þorbergur Ingi Jónsson var fyrstur í mark í karlaflokki á nýju brautarmeti, 1:24:27, en fast á hæla hans fylgdi Þorsteinn Roy Jóhannsson sem var aðeins 15 sekúndum á eftir Þorbergi í mark.

Halldóra Huld Ingvarsdóttir var fyrst í mark í kvennaflokki á nýju brautarmeti, 1:41:20, rúmum tólf mínútum á undan næstu konu.

*Halldóra Huld Ingvarsdóttir var fyrst kvenna í mark á nýju brautarmeti. Ljósm. Snæfellsjökulshlaupið.*

*Þorbergur Ingi Jónsson var fyrstur í mark og setti brautarmet í karlaflokki. Ljósm. Þröstur Albertsson*

*Kæling að hlaupi loknu. Ljósm. Þröstur Albertsson.*

*Ólöf Kristjánsdóttir hafði næga orku! Ljósm. Snæfellsjökulshlaupið.*

Brautarmet slegin í karla- og kvennaflokki í Snæfellsjökulshlaupinu