„Næsta aðgerð er að draga niður umferðarhraða,“ segir Pálmi Þór Sævarsson, svæðisstjóri Vegagerðarinnar.

Á fundi stjórnar Samtaka Sveitarfélaga á Vesturlandi sem fram fór á dögunum var m.a. rætt um vegamál á Vesturlandi. Pálmi Þór Sævarsson svæðisstjóri Vegagerðarinnar var gestur fundarins og sagði frá stöðu vegamála á Vesturlandi. Í kjölfar umræðu um viðhald á Snæfellsnesvegi (54) samþykkti stjórn SSV eftirfarandi bókun:

„Stjórn SSV skorar á yfirvöld samgöngumála að veita nú þegar fjármunum til þess að fara í viðhaldsverkefni við Snæfellsnesveg (54). Viðhald á veginum, sérstaklega á kaflanum á milli Brúarhrauns og Dalsmynnis, þolir enga bið. Stjórn SSV tekur því undir áhyggjur Vegagerðarinnar um að ef ekki verður farið í endurbætur fljótlega þurfi að ráðast í aðgerðir eins og að draga úr umferðarhraða til þess að tryggja umferðaröryggi á veginum.“

Margir kaflar í slæmu ástandi

Pálmi Þór segir í samtali við Skessuhorn að margir kaflar á Snæfellsnesvegi séu orðnir slæmir og það sé fyrst og fremst langvarandi viðhaldsleysi, á vegakerfinu öllu, um að kenna. „Við höfum miklar áhyggjur af viðhaldsleysi við vegi hér á Vesturlandi og Vestfjörðum. Sér í lagi ástandi Vestfjarðavegar (60) í gegnum Miðdali og Reykhólasveit og Snæfellsnesvegar (54) en sá vegur er langur og fer í kringum allt Snæfellsnesið. Þar eru margir kaflar sem eru farnir að kalla á viðhald. Þá eru einnig vegakaflar á Vestfjörðum sem eru í slæmu ástandi,“ segir Pálmi.

Næsta aðgerð er að draga niður umferðarhraða

Sá vegarkafli sem bókun SSV snýr að liggur um Kaldármela, milli Brúarhrauns og Dalsmynnis og er um 19 kílómetra langur. Pálmi segir þann kafla ekki þola neina bið. „Þetta er gamall vegur með bundnu slitlagi sem farinn er að láta á sjá. Það er mikill umferðarþungi um veginn, bæði eru það allir ferðamenn sem sækja Snæfellsnesið sem keyra þarna um og einnig mikið af flutningabílum. Eins og staðan er orðin núna er ekkert hægt að gera nema endurbyggja veginn að fullu,“ segir Pálmi en í drög að nýrri samgönguáætlun (2024-2038) sem nú er komin í samráðsgátt er einmitt gert ráð fyrir 1.950 m.kr. í endurbyggingu þess vegarkafla. Þó ekki fyrr en á þriðja tímabili áætlunarinnar (2034-2038). Þá er gert ráð fyrir 11.500 m.kr. í lagfæringar á um 52 kílómetrum Snæfellsnesvegar um Skógarströnd. Áætlað er að hefja þær framkvæmdir árið 2027. En hvað er hægt að gera þangað til? „Á þessum vegum eru farnir að skapast hættulegir staðir þannig að mesta aðgerðin sem við getum farið í á þessu stigi er að draga niður hraða á þeim stöðum. En svo er spurning hvort fólk fari eftir því,“ segir Pálmi.

Dugar ekkert minna en að endurbyggja vegina

Þá er í drögum að nýrri samgönguáætlun gert ráð fyrir 1.600 m.kr. í endurgerð á 15 km kafla Vestfjarðavegar (60) um Reykhólasveit á öðru tímabili áætlunarinnar (2029-2033) og 1.100 m.kr. eru áætlaðar í endurgerð 10 km kafla Vestfjarðavegar um Miðdali, frá Reykjadalsá að Haukadalsá, á þriðja tímabili áætlunarinnar.

„Við erum búnir að berjast fyrir því lengi að koma þessum köflum, og fleirum, inn á Samgönguáætlun. Sá peningur sem Vegagerðin fær í styrkingarframkvæmdir hér á Vestursvæði dugar ekki til að endurbyggja vegina. Og vegna þess hve vegirnir eru illa farnir dugar ekkert minna en að gera það,“ segir Pálmi Þór Sævarsson, svæðisstjóri Vegagerðarinnar.

Hættulegir staðir farnir að skapast á Snæfellsnesvegi og Vestfjarðavegi