Willum Þór Þórsson heilbrigðisráðherra hefur ýtt úr vör kynningarátaki á aukinni þjónustu og ráðgjöf um heilsutengd málefni í símanúmerinu 1700 og á netspjalli Heilsuveru. Markmiðið með eflingu þjónustunnar er að auka þjónustu við almenning með heilbrigðistengdri ráðgjöf og vegvísun í viðeigandi þjónustu.

„Hjúkrunarfræðingar og annað sérþjálfað starfsfólk Upplýsingamiðstöðvar Heilsugæslu höfuðborgarsvæðisins og Læknavaktarinnar svara símtölum frá almenningi allan sólarhringinn, leysa úr erindum og benda á hvar viðkomandi getur sótt sér þjónustu ef þörf er á. Reynslan af þessari þjónustu sýnir að hægt sé að leysa úr sífellt stærri hluta erinda með fjarlausnum sem er betri þjónusta fyrir einstaklinginn og dregur jafnframt úr álagi á heilbrigðiskerfið,“ segir í tilkynningu frá Heilbrigðisráðuneytinu. „Það getur verið flókið fyrir almenning að vita hvert er best að sækja þjónustu þegar upp koma veikindi eða slys. Þetta hefur meðal annars leitt til þess að fólk leitar til bráðamóttöku, þar sem álag er mikið, með úrlausnarefni sem hægt er að leysa með öðrum hætti. Með einu símtali í síma 1700 eða netspjalli á Heilsuveru er hægt að fá ráðgjöf um hvert sé best að leita, en áfram er mikilvægt að hringja í neyðarnúmerið 112 í neyðartilvikum.“

„Við erum að búa til eina gátt inn í heilbrigðisþjónustuna til þess að einfalda verulega allt aðgengi fyrir almenning,“ segir Ragnheiður Ósk Erlendsdóttir, framkvæmdastjóri hjúkrunar hjá Heilsugæslu höfuðborgarsvæðisins. „Þetta eru leiðir sem er auðvelt að muna og auðvelt að læra; hringja í 112 í neyð en annars heyra í okkur í síma 1700 allan sólarhringinn eða í netspjalli Heilsuveru milli klukkan 8 og 22.“

Efla heilbrigðisþjónustu í síma 1700 og með netspjalli