Unnið hefur verið að endurbótum og lagnagerð á um 550 m kafla Borgarbrautar í Borgarnesi síðan í júlí 2022. Verklok eru áætluð í október á þessu ári en það er Þróttur ehf. á Akranesi sem er með verkið.

„Vegurinn var orðinn mjög lélegur. Hann hafði verið steyptur á sínum tíma en var orðinn sprunginn og holóttur,“ segir Guðmundur S. Pétursson, umsjónarmaður verksins fyrir hönd Vegagerðarinnar. Þessi kafli Borgarbrautar, frá Böðvarsgötu að Egilsgötu, er svokallaður skilavegur, það er vegur sem hefur verið í umsjá Vegagerðarinnar en verður nú skilað til sveitarfélagsins Borgarbyggðar. „En þar sem vegurinn var svo illa farinn var ákveðið að fara í endurbætur á honum áður en honum yrði skilað. Samhliða var tekin ákvörðun um að endurnýja allar lagnir í veginum, sem er í raun stærsti þátturinn í framkvæmdinni. Þetta eru til dæmis lagnir fyrir heitt og kalt vatn, frárennsli, rafmagn og fleira.“ Guðmundur segir að í samtali við íbúa og verktaka hafi orðið breytingar á framkvæmd verksins. „Við fengum ábendingar frá íbúum á svæðinu sem töldu óráðlegt að hafa hjáleiðir um íbúagötur á borð við Böðvarsgötu, Ólafsgötu og Skúlagötu eins og lagt var upp með. Þá breyttum við hjáleiðinni þannig að hún sneiddi framhjá þessum íbúagötum. Samhliða var fyrsti áfanginn lengdur að Skallagrímsgötu.“

Tilboð Þrótts ehf. í verkið hljóðaði upp á rúmar 430 m.kr. Samkvæmt útboðinu átti að gera hlé á framkvæmdinni yfir veturinn en Þróttur óskaði eftir því að fá að vinna eins lengi og kostur væri. Því er verkið komið mun lengra nú en áætlað var og hugsanlega verða verklok eitthvað fyrr. „En það er aldrei að vita hvað kemur upp úr jarðveginum sem mun hugsanlega tefja verkið því þarna er mikið af gömlum lögnum,“ segir Guðmundur.

Loftmynd af framkvæmdasvæðinu, frá Vegagerðinni.

Vegaframkvæmdir við Borgarbraut skulu klárar í október