Jóhanna Bergmann Þorvaldsdóttir bóndi var sæmd riddarakrossi, heiðursmerki íslensku fálkaorðunnar, fyrir frumkvöðlastarf í landbúnaði síðastliðinn laugardag, 17. júní. Jóhanna og Þorbjörn Oddsson hafa ræktað geitur að Háafelli síðan 1989 en ákváðu um síðustu aldamót að vinna markvisst að því að kynna íslenska geitastofninn og hans afurðir.

Fyrir ellefu árum síðan stofnuðu þau Geitfjársetur að Háafelli en setrið er opið yfir sumartímann þar sem heimsækja má geiturnar og kynnast afurðum þeirra sem seldar eru á staðnum. Í samtali við Skessuhorn frá síðasta ári segjast hjónin vilja fræða almenning, uppræta gamlar mýtur ásamt því að kynna afurðirnar og þeirra nýtni. ,,Við erum með 200 geitur yfir veturinn og svo eru 198 kiðlingar. Búskapurinn gengur vel og svo erum við líka með ostagerð. Við erum með starfsfólk hjá okkur á sumrin og erum auk þess búin að mynda félag með nokkrum börnum okkar í kringum búskapinn. Maður er ótrúlega þakklátur fyrir að þau vilji taka við og vera með okkur í þessu en mannauðurinn er það besta,“ segir Jóhanna þakklát í samtali við Skessuhorn á síðasta ári þegar rætt var við hjónin í tilefni tíu ára afmælis geitfjársetursins.

Jóhanna er hér með fálkaorðuna en barnabörnin föndruðu aðra fyrir Þorbjörn. Ljósm. Facebook.

Sæmd riddarakrossi fyrir frumkvöðlastarf í landbúnaði