Píanistinn Anna Þórhildur Gunnarsdóttir og söngkonan Solveig Óskarsdóttir skipa tveggja manna tónlistarflokkinn Dúó Áróra. Í síðustu viku ferðuðust þær um Vesturland og héldu þrenna tónleika. Þær hófu ferð sína í Vinaminni, safnaðarheimili Akraneskirkju, fóru þaðan í Borgarneskirkju og enduðu ferð sína í Stykkishólmskirkju síðastliðinn föstudag. Anna Þórhildur og Solveig numu við Tónlistaháskólann í Maastricht í Hollandi og útskrifuðust þaðan með sitthvora meistaragráðuna síðasta sumar, þær eru nú báðar fluttar heim til Íslands.

Á tónleikunum fluttu þær hressandi efni en þær sögðu blaðamanni Skessuhorns að eftir langt og strangt tónlistarnám hafi þeim einfaldlega langað að flytja létt og skemmtilegt efni. Tónleikarnir voru styrktir af Uppbyggingarsjóði Vesturlands og Menningarsjóð Borgarbyggðar og var þess vegna frír aðgangur á tónleikana. Þar að auki langaði þeim Önnu og Solveigu að gefa af sér til samfélagsins og fluttu þess vegna létta tónlist fyrir heimilisfólk á dvalar- og hjúkrunarheimilunum á Akranesi, í Borgarnesi og í Stykkishólmi fyrir tónleika.

Kvöldsólin skein á Borgarneskirkju þegar Dúó Áróra flutti skemmtileg verk á tónleikum þriðjudaginn 13. júní. Ljósm. sþ.

Fóru í tónleikaferð um Vesturland