“Drullusokkar sem virða ekki vegalokanir hafa stórskemmt vegslóðana“

Í gær fóru félagarnir Snorri Jóhannesson og Guðmundur Kristinsson, formaður Veiðifélags Arnarvatnsheiðar, í skoðunarferð á heiðina. Venjulega er opnað fyrir veiði um miðjan júní en ljóst að það mun dragast eitthvað þetta sumarið vegna mikils klaka í jörðu og aurbleytu á vegslóðum á heiðinni. Heiðin var að mestu leyti snjólaus í vetur og því hljóp klaki djúpt í jörðu. Á heiðinni var í gær einungis þriggja stiga hiti og því gengur hægt að klakinn hlaupi úr jörðinni. Það sem er öllu verra er að í ferðinni sáu þeir félagar afar ljót ummerki eftir að farið hafði verið á jeppa inn á vegslóða og þeir stórskemmdir.

„Það er skemmst frá því að segja að það er allt ófært norðan Norðlingafljóts. Vegurinn er forblautur þannig að við urðum frá að hverfa. Öllu verra var að við sáum að einhver hálfviti hefur farið yfir vaðið og ekið í átt að Úlfsvatni og skorið veginn niður á klaka. Sumsstaðar voru vilpur þar sem hann eða þeir hafa lent í basli. Þetta kemur til með að kosta veiðifélagið mikla peninga að laga, þar sem búið er að hræra ofaníburðurinn saman við drulluna, þannig að ekki er víst að dugi að hefla vegina,“ segir Snorri.

Hann segir að bannskilti um akstur sé á veginum við Stefánshelli í Hallmundarhrauni en það hafi ekkert að segja. „Lokun gildir fyrir öll ökutæki og má einu gilda hverrar gerðar þau eru, buggybílar og fjórhjól þar með talin. En þetta hefur verið jeppi svo því sé til haga haldið. Það er sorglegt að menn skuli ekki geta beðið eftir að umferð sé leyfð og veiði hefjist. Nánast allt sem kemur inn fyrir veiðileyfi og gistingu í skálum veiðifélagsins hefur á undanförnum árum farið í að bæta aðgengi og aðbúnað veiðimanna. Því er það sárara en tárum taki að einhverjir drullusokkar skuli gefa veiðifélaginu og heiðarlegum veiðimönnum fingurinn með þessum hætti. Ég geri ráð fyrir að þessar skemmdir nái alla leið að Úlfsvatni, en það kemur í ljós síðar. Allir heilbrigðir menn hefðu snúið við, við þær aðstæður sem hafa verið þarna. En það er ljóst að við getum ekki hafið sölu veiðileyfa á venjulegum tíma þann 15. júní en vonum að þetta skáni fljótlega,“ sagði Snorri.

Opnun á Arnarvatnsheiði mun seinka þetta árið