Á fundi skipulags- og byggingarnefndar Borgarbyggðar 2. júní síðastliðinn var lagt fram erindi frá Orku Náttúrunnar (ON), en fyrirtækið hefur hug á að kaupa lóð að Digranesgötu 4 í Borgarnesi og reisa þar hleðslugarð sem myndi rúma 20 hleðslutengingar.

,,Þjóðvegur 1 liggur um Borgarnes og er lykil staðsetning á leið norður eða vestur og gefur ökumönnum traust á að skipta alfarið yfir í rafbíla og eins er þetta aukin þjónusta fyrir íbúa sveitarfélagsins. Fyrirhugað er að festa kaup á lóð 4 við Digranesgötu og byggja þar upp öflugan hleðslugarð með allt að 20 hraðhleðslutengjum. Þaðan er gott stígakerfi og lykil þjónusta og afþreying er í göngufæri frá þeim stað. Hugmyndir eru um að setja upp leiktæki, bekki og fræðsluskilti í samstarfi við sveitarfélagið. ON óskar formlega eftir leyfi skipulagsnefndar til að halda áfram viðræðum við núverandi lóðarhafa um uppbyggingu hleðsluþjónustu á lóðinni. Einnig óskar ON eftir afstöðu nefndarinnar til þess hvort möguleg uppbygging á lóðinni kalli á breytingar á gildandi skipulagsáætlunum og óskar þá ON eftir heimild til að leggja fram breytingu á deiliskipulagi í samræmi við erindið,“ segir í fundargerð. Fram kemur að nefndin tekur jákvætt í það að viðræður haldi áfram varðandi fyrirhugaða uppbyggingu hleðsluþjónustu á lóðinni sem skilgreind er sem viðskipta- og þjónustulóð, á Miðsvæði (M1) í aðalskipulagi og á deiliskipulögðu svæði.

Í sömu fundargerð er framlagt erindi frá Brimborg þar sem fyrirtækið óskar eftir því að sett verði niður bráðabirgða hraðhleðslustöð á lóðina Fitjar 1 sem er vestan megin við hringtorgið í ofanverðu Borgarnesi. Fyrirhugað er að setja upp tvær stöðvar, eina 180kw og aðra 120kw þar sem hver hleðslusöð væri með tveimur tengingum og því hægt að hlaða fjóra bíla í senn. Áætlað er að báðar stöðvarnar yrðu 180kw með tíð og tíma. Skipulags- og byggingarnefnd telur lóðina henta vel til að hýsa tímabundnar hraðhleðslustöðvar.

ON vill reisa tuttugu hleðslustöðvar í Borgarnesi