Í blaði sem helgað er sjómennsku er ekki úr vegi að birta uppskrift að girnilegum fiskrétti.

Skessuhorn leitaði til Óskars Þórs Þórðarsonar fagurkera og meistarakokks á Lava Resort á Miðhrauni II á Snæfellsnesi sem sendi okkur eftirfarandi uppskrift að fiskrétti, í tilefni sjómannadagsins. Verði ykkur að góðu.

Smjörsteiktur Steinbítur með beikon tómatsósu

Hráefni fyrir Steinbítinn

1 kg steinbítur skorin í 5-7cm bita.
1/2 bolli hveiti eða annað mjöl.
Salt og pipar, eftir smekk.
Rasp og safi úr einni sítrónu.
4 msk smjör.
2-3 msk hvítlauksolía.

Fyrir beikon tómatsósuna

250+ gr af beikon kurli.
1 laukur, smátt saxaður.
2 hvítlauksrif, kramin og söxuð.
1 dós niðursoðnir tómatar.
1 msk tómatpúrra.
Salt og pipar, eftir smekk.
1 chilli eða 10 chilliflögur.
20 gr ferskt Basil, klippt eða rifin.

Leiðbeiningar:

1. Byrjið á því að búa til beikon tómatsósuna. Í stórri pönnu, steikið beikonkurl við meðalhita þar til það er stökkt, um það bil 8-10 mínútur. Takið beikonið af pönnunni með sleif og setjið til hliðar á pappírsklæddan disk.

2. Bætið fínt söxuðum lauknum og söxuðum hvítlauk í beikonfituna. Eldið í 2-3 mínútur, hrærið af og til, þar til laukurinn er hálfgagnsær.

3. Bætið dósinni af niðursoðnu tómötunum og tómatpúrrunni út í, chilli, salti og pipar eftir smekk. Látið suðuna koma upp og látið malla á lágum hita í 10-15 mínútur, hrærið í af og til.

4. Þegar sósan hefur þykknað er ferskri basiliku og stökku beikoni bætt út í. Haldið sósunni heitri á meðan þið útbúið steinbítinn.

5. Til að undirbúa steinbítinn skal þerra hann. Blandið saman hveiti, sítrónubörk, salti og pipar í grunnt fat.

6. Veltið steinbítsbitum í hveitiblöndunni.

7. Bræðið smjör í stórri pönnu við meðalháan hita. Þegar smjörið er byrjað freyða, en áður en það brennur bætið steinbítsbitum út á pönnuna með smá bili á milli. Penslið með hvítlauksolíu, steikið í 4-6 mínútur, eða þar til steinbíturinn er gullinbrúnn og eldaður í gegn. Hellið sítrónusafa yfir.

8. Berið smjörsteiktan steinbít fram með beikon tómatsósunni undir eða setjið fiskinn í eldfast mót og sósuna yfir og leyfið því að hitna saman í 3-5 mín. á 160 gráðum.

Óskar mælir með gufusoðnu brokkolí, nýsoðnum kartöflum eða byggi í meðlæti með þessu.

Steinbítur á diskinn – uppskrift